Fálase

O alcalde de Quiroga, que leva 35 anos no cargo, confirma que non será candidato do PP ás eleccións municipais de 2023 tras a escisión do partido no histórico feudo da dereita na montaña de Lugo. Julio Álvarez xa suxerira esta posibilidade nos últimos días mentres o que fora o seu concelleiro de Cultura durante dúas décadas, José Luis Rivera, anunciaba que competirá pola alcaldía á fronte dun novo partido independente. A través dun comunicado, Álvarez -na imaxe, durante unha reunión na sede da Xunta en 2019- afirma que "motivos persoais" como a súa xubilación e "unha actividade no mundo empresarial axudaron tomar esta decisión" e mantén que "deixa Quiroga convertida nunha pequena cidade con todos os servizos". A vila quiroguesa ten actualmente uns 3.000 habitantes, 2.000 menos que cando Álvarez asumiu o bastón de mando en 1987.

• O PP escíndese no gran feudo da dereita na montaña de Lugo

O Congreso aproba por maioría absoluta a reforma para desbloquear o Constitucional e mudar varios aspectos do Código Penal malia ao boicot da dereita. A reforma pasa agora ao Senado, onde aínda pode influír unha eventual suspensión do propio Tribunal Constitucional, que abordará o luns o recurso do PP tras o adiamento da sesión deste xoves. Na imaxe, un intre do pleno [© Congreso]

• O Constitucional adía a votación para decidir se paraliza a reforma que pretende desbloquealo, como pide o PP
• 📺 VÍDEO | Rueda aplaude o recurso de Feijóo contra o desbloqueo do TC: "Teño clarísimo que é necesario reaccionar"

A Xunta pecha tres polígonos de bateas na Pobra do Caramiñal (A, B e C), na ría de Arousa, "como consecuencia da contaminación detectada" na zona e para "evitar que cheguen ao mercado produtos mariños en condicións non aptas para o consumo humano", segundo consta na resolución ditada polo Instituto Tecnolóxico para o Control do Medio Mariño de Galicia (Intecmar). Fontes do sector consultadas por Praza.gal atribúen o peche á vertedura de fuel detectada o pasado martes na Illa. A Consellería do Mar, a preguntas de Praza.gal, confirma que Salvamento Marítimo "solicitou a mobilización" de Gardacostas "ante a aparición de manchas de contaminación mariña" na zona. Medios aéreos e mariños, engade a Consellería, están a facer seguimento para determinar o alcance deste episodio e esclarecer o acontecido". Na imaxe, vista de bateas na ría de Arousa dende a A Pobra do Caramiñal [CC BY-SA Praza.gal]

• Chapapote na Illa de Arousa vinte anos despois do Prestige

A Xunta aproba un anteproxecto de lei para xestionar o litoral malia a oposición do Estado. O Goberno galego someterá nos próximos días o texto a exposición pública pero xa avanza que quere considerar “estratéxicos” os “establecementos de turismo litoral situados en inmobles preexistentes de valor histórico ou arquitectónico”.

• HEMEROTECA | A Xunta amaga con desafiar o Estado cunha lei para xestionar a ocupación privada da costa sen traspaso de competencias
• HEMEROTECA | As derrotas da Xunta na súa campaña pola ocupación privada de terreos públicos do litoral

O Tribunal Constitucional adía ao luns a súa decisión sobre se o Congreso pode aprobar hoxe a reforma xudicial proposta polo Goberno, o que deixa vía libre á tramitación. O PP tentou paralizar co seu recurso unha mudanza legal coa que o Executivo de Sánchez, que conta con votos para sacala adiante, quere desbloquear a renovación do propio Constitucional e introducir diversos cambios no Código Penal. 

• AMPLIAMOS 👉 O Constitucional adía a votación para decidir se paraliza a reforma que pretende desbloquealo, como pide o PP
• 📺 VÍDEO | Rueda aplaude o recurso de Feijóo contra o desbloqueo do TC: "Teño clarísimo que é necesario reaccionar"

Borja San Ramón gaña con claridade as primarias de Podemos Galicia e convértese no novo líder da formación, en substitución de Antón Gómez-Reino. A lista de Tecer Galicia obtivo o 68,9% dos 1.331 votos emitidos, impoñéndose á de Rexurdir Galicia liderada por Gonzalo Busqué.  

Dous axentes certifican a veracidade da caixa negra do Alvia e despachan nuns poucos minutos a sesión deste xoves do xuízo de Angrois. O rexistrador automático do tren limitouse a deixar constancia de todas as accións do maquinista xa desveladas ao longo dos nove anos de instrución do caso.

• A policía ratifica o seu papel menor e moi inicial na investigación de Angrois 

O Tribunal Constitucional celebra hoxe un inédito pleno a instancias do PP para decidir se paraliza a votación no Congreso para desbloquear o propio TC e mais introducir diversos cambios no Código Penal. O Goberno de España conta con votos dabondo para sacar adiante ambas reformas por maioría absoluta. Explícao infoLibre

O Congreso aproba a iniciativa do PP para "conxelar" as peaxes das autoestradas AP-9 e AP-53 para 2023, o ano no que remataría a concesión a Audasa na vía de conexión atlántica se Aznar non a tivera prolongado. A Comisión de Transportes, Mobilidade e Axenda Urbana acolleu a proposición non de lei presentada polos populares galegos, que será trasladada ao Goberno do Estado.

"É posible limitar as subidas das peaxes tanto chegando a acordos coas concesionarias, como asumindo as arcas públicas este incremento das tarifas, ou actuando desde o campo impositivo reducindo a carga fiscal das concesionarias e incluso rebaixando o IVE das peaxes", apunta o vicevoceiro de Infraestruturas do PP no Congreso, o deputado galego Celso Delgado [na imaxe], quen calcula que esta medida suporá "entre 13 e 15 millóns de euros".

• O PP pide máis subvención á peaxe da AP-9 no ano en que remataría a concesión se Aznar non a prolongase

O PP de Granada esixe ao Concello da cidade "chegar ata o final cos recursos administrativos e xudiciais que procedan" para impugnar a elección da Coruña como sede da Axencia Estatal de Supervisión da Intelixencia Artificial, á que a cidade andaluza tamén optaba. Os populares granadinos reclamaranllo ao alcalde do PSO, a través dunha moción na que defenden que a decisión foi "política e discrecional", xa que "estamos seguros de que a candidatura de Granada supera con creces o resto no cumprimento dos criterios técnicos", afirman.

• Despoboación, transporte, inmoble ou lingua: os motivos oficiais polos que A Coruña terá a Axencia de Intelixencia Artificial
• Feijóo pide coñecer “os criterios” polos que A Coruña terá a Axencia de Intelixencia Artificial e Rueda salienta que están no BOE