Fálase

Ampliado o período "perigo alto" de incendios forestais en Galicia ata 15 de outubro. Medio Rural fai oficial no DOG a decisión de estender dúas semanas a época con maiores recursos contra o lume no monte, que ía rematar o 30 de setembro "debido ás actuais condicións meteorolóxicas". Na imaxe, incendio forestal a pasada semana en Quiroga [CC-BY-SA ATBrif]

• A nova lei de incendios prevé máis "paisaxes mosaico" no monte e endurecer as multas por non rozar
• O incendio de Quiroga xa é o segundo maior do ano en Galicia
• Vinte anos da vaga de incendios de 2006: o lume que nos levou ao futuro
• A Xunta autoriza usar maquinaria no monte con risco extremo de incendio entre ecos do caso Oímbra

O Supremo confirma 4 anos de cadea ao futbolista vigués Santi Mina por abuso sexual. O alto tribunal ratifica a condena por uns feitos ocorridos en 2017 en Almería. [Foto: Celta de Vigo]

• HEMEROTECA (2022) | O Celta aparta temporalmente a Santi Mina do equipo tras ser condenado a catro anos de cadea por abuso sexual

A RAG entrega ao proxecto Aquí Tamén Se Fala do instituto coruñés Rafael Dieste o premio Na lingua que eu falo para recoñecer o seu traballo "a prol da normalización do idioma na infancia e na mocidade". A iniciativa, destaca o presidente da RAG, Henrique Monteagudo, "presenta a lingua coma un elemento de liberdade, algo que se escolle e que se quere" e ao tempo "amosa que a inmigración non é unha ameaza que nos vén deteriorar, senón algo que nos vén enriquecer, que nos vén abrir ventás, portas para o mundo". "Estes rapaces ensináronnos que unha lingua pode ser tamén un lugar de chegada. Talvez o futuro do galego xa estea aquí", salienta o profesor Alberto Pombo, impulsor de ATSF e director do Rafael Dieste. Na imaxe, alumnado e profesorado participante no proxecto con membros da RAG e coa deputada de Lingua da Deputación da Coruña, Sol Agra, durante o acto de entrega. [Imaxe: ATSF]

• A RAG premia a Aquí Tamén se Fala: "As Irmandades estarían orgullosas"
• 📺 ENTREVISTA | Alberto Pombo: "A inmigración é unha oportunidade para o futuro da lingua galega" 

A xaponesa Resonac pon á venda a súa fábrica da Coruña. A multinacional busca comprador para a súa filial, no polígono da Agrela coruñés, dedicada á produción de eléctrodos de grafito e tecnoloxías de optimización para fornos de arco eléctrico, segundo adianta El Economista. A factoría galega conta con 200 traballadores. Foto: Xunta. 

"Golfas", "traidores" ou "Ceuta se defiende": ataque á sede da Cruz Vermella en Ferrol. O local da entidade social amence con pintadas acusándoa de "mafia de la invasión" ou de "ONG antiespañola". Tamén hai referencias ao Plan Kalergi, teoría conspirativa sen base difundida pola ultradereita. O pasado mes de abril adhesivos neonazis do grupo Núcleo Nacional e mensaxes contra migrantes apareceran tamén nas mesmas paredes. Fotos: Ferrol en Común. 

Máis dun milleiro de persoas impiden un acto de Vox en Santiago. Centos de manifestantes forman unha cadea humana ás portas do centro sociocultural San Marta, onde a formación de ultradereita tiña previsto inaugurar o curso político. 

O partido sinalou a alcaldesa de Santiago por ter "a responsabilidade de garantir" que exercesen o seu dereito "con liberdade e seguridade". Diversos colectivos sociais e políticos chamaran ao "boicot" do acto. Vídeo difundido por Vox. 

• 📺 Vox non pasou en Santiago (e o PP olla por se pasa)

A maior parte de Galicia superou os 30º este luns, con temperaturas de case 40 graos en Ourense e por riba dos 35 en Santiago. Meteogalicia advirte de máis calor nos vindeiros días e a Xunta mantén para este martes a alerta vermella no interior de Pontevedra. 

A Xunta saca a concurso 153 dereitos mineiros, 126 permisos de investigación e 27 para a explotación de xacementos xa existentes. Rueda anuncia que o Executivo galego exixirá ás empresas un plan social para deixar "o maior retorno económico no territorio". 

• A Xunta quere reactivar as polémicas minas de Corcoesto, San Finx e Santa Comba

O xuíz Peinado abre xuízo oral a Begoña Gómez por delitos de tráfico de influencias e malversación. O xuíz envía ao banco cos acusados a esposa do presidente do Goberno de España logo de corrixir o final da súa instrución polas correccións da Audiencia de Madrid. Foto: CC-BY-SA Thomas Holbach.

• ✍️ HEMEROTECA - OPINIÓN | A denuncia de Begoña Gómez por tráfico de influencias

O BNG insta o goberno de Candia no Concello de Lugo a "non utilizar intelixencia artificial xenerativa na promoción" municipal. "Dende a moción de censura do PP coa concelleira tránsfuga converteuse na solución para anunciar todo tipo de actividades", lamenta o voceiro do Bloque e tenente da alcaldía ata a censura, Rubén Arroxo, quen lembra "que diversos colectivos profesionais" do deseño, ademais da Escola Superior de Arte e Deseño Ramón Falcón "fixeron público o seu malestar". A formación trasladará a petición a través dunha moción no vindeiro pleno municipal "onde reclamará consenso da corporación" ao respecto. Na imaxe, Arroxo e o resto do grupo municipal do BNG lucense.

• HEMEROTECA | O PP defende o concurso non profesional para o cartel do San Froilán e o uso da IA