Fálase

O Concello de Lugo comunica que foi "víctima dun ciberataque" que xa foi denunciado ante o Centro Criptolóxico Nacional e a Policía Nacional. A UDEF xa iniciou unha investigación dos feitos, sobre os que descartan "que se trate dunha actuación de tipo indiscriminado dirixida por mafias", pois "parece obedecer a un ataque dirixido especificamente contra a Institución local xa que foi executado empregando como reclamo datos concretos e moi elaborados relacionados coa actividade da Administración".

O presidente de Iberdrola, Ignacio Sánchez Galán, cualifica de "parvos" á poboación que ten a tarifa regulada da luz, á que fai responsable de pagar máis por esa elección. As súas declaracións pódense escoitar en RTVE e o vídeo do momento, nesta ligazón. Na imaxe, de arquivo, Sánchez Galán con Feijóo, na inauguración en 2017 da central hidroeléctrica San Pedro II, nos Peares.

• DATOS | A inflación supera o 10% en Galicia impulsada pola luz e os carburantes
• HEMEROTECA | A Xunta dá voz nun comunicado oficial ao presidente de Iberdrola para que eloxie a “visión e o impulso” de Feijóo
• HEMEROTECA | O Supremo ve "sorprendente" un novo intento de Iberdrola de reducir o imposto galego aos encoros e lémbralle que "abusa" da xustiza
• HEMEROTECA | O BNG acusa a Feijóo de "complicidade coas eléctricas" amosando nas rúas a súa aperta co presidente de Iberdola

A directora do CNI admite escoitas a 18 líderes independentistas cataláns con autorización xudicial, segundo transcendeu da súa comparecencia na coñecida como comisións de segredos oficiais do Congreso. Entre os líderes espiados, segundo algunhas fontes, estaría o actual presidente da Generalitat catalá, Pere Aragonès. Na imaxe, Paz Esteban tomando posesión como máxima responsable dos servizos de intelixencia do Estado en 2020. 

• Diseccionando o CNI: das súas orixes franquistas á súa escasa transparencia e limitado control 

O derradeiro Consello da Xunta presidido por Feijóo aproba o cesamento de Mar Sánchez Sierra como secretaria xeral de Medios para incorporarse ao gabinete do agora líder do PP no partido. Aproba, igualmente, o cesamento da directora xeral do Gabinete da Presidencia, Marta Varela, que pasa a ocupar un posto semellante na dirección estatal do PP. Na imaxe, [CC-BY-SA Xunta], Sánchez Sierra intervén na súa toma de posesión en 2013. Previamente, exercera como directora xeral de Comunicación e anteriormente, outros cargos no equipo de confianza do agora presidente saínte.

• AMPLIAMOS 👉 "Ás veces equivoqueime por non ter información adecuada ou cintura para cambiar de opinión", di Feijóo na súa despedida do Consello da Xunta
• A dimisión de Feijóo deixa a Xunta en funcións: non pode convocar oposicións nin asinar convenios e ten limitado o gasto

Robe, Terbutalina, Morad, Estopa ou Grande Amore, no cartel da nova edición do Caudal Fest de Lugo, que regresa os vindeiros 16 e 17 de setembro no seu formato habitual tras a interrupción da pandemia. O Concello lucense vén de presentar a programación do festival, que se volve celebrar á beira do Miño e no que aínda se agardan novas incorporacións. A venda de entradas comeza o día 11 deste mes de maio.

O TSXG declara firme a condena á Xunta a rehabilitar o pazo de Lourizán tras negarse a facelo por non ser cedido a Ence. A Deputación de Pontevedra, que iniciara o preito, confirma que o Goberno galego non recorreu a sentenza, polo que adquire firmeza. "As peticións da Deputación á Xunta para que acometese a rehabilitación foron unha constante nos últimos anos", reitera a institución provincial. Tras a condena, a Xunta esgrimira que xa comezara cos traballos no recinto mesmo antes da sentenza. [Imaxe: © Deputación de Pontevedra]

• A Xunta é condenada a rehabilitar o pazo de Lourizán tras negarse a facelo por non ser cedido a Ence

Comezan na Coruña as obras da Cidade das TIC, o parque tecnolóxico que se instalará na antiga fábrica de armas. Prevese que o conxunto do recinto estea en funcionamento contra finais de 2024. [Imaxe: © Concello da Coruña]

• HEMEROTECA | Do fusil Máuser ao 5G: a nova vida da vella fábrica de armas da Coruña como parque tecnolóxico

Tanxugueiras, Familia Caamagno e A Banda da Loba encabezan o cartel do Festigal 2022, que regresa ao seu formato habitual tras a interrupción pola COVID. O festival impulsado pola Fundación Galiza Sempre e Galiza Nova celébrase os vindeiros 24 e 25 de xullo no Campus Vida de Santiago.

Santi Mina, futbolista do Celta, condenado a catro anos de prisión por abuso sexual. A sentenza da Audiencia Provincial de Almería condena o dianteiro a pagar unha indemnización de 50.000 euros e absolve o tamén futbolista David Goldar do delito de cooperación necesaria. 

• AMPLIAMOS 👉 O Celta aparta temporalmente a Santi Mina do equipo tras ser condenado a catro anos de cadea por abuso sexual

PARO REXISTRADO | As inscricións nas oficinas de emprego diminuíron en 2.734 en Galicia durante o mes de abril (-1,78%, fronte ao -2,77% da media estatal) e o paro rexistrado quedou en 150.602, o que supón 20.176 menos que un ano antes (-11,81%, practicamente a metade que a media). No mesmo mes, a afiliación media á Seguridade Social aumentou en 5.540 persoas, unha suba do 0,54% (0,93% na media, ata os 1,03 millóns, isto é, un 3,19% máis que no mesmo mes de 2021 (+5,06% no global estatal). Máis información, hoxe en Praza.gal

• AMPLIAMOS 👉 Máis do 40% dos contratos asinados en abril en Galicia foron indefinidos
• Os sindicatos reclaman neste 1º de Maio máis medidas e intervención pública ante a crise de prezos