Fálase

Xa se coñecen as gañadoras e gañadores do VIII Concurso de microrrelatos, que organiza PuntoGal coa Real Academia Galega e a colaboración da revista Luzes. O xurado escolleu tres relatos en cada categoría: adulta, xuvenil e infantil, ademais de seleccionar seis textos finalistas. Presentáronse case mil historias cun máximo de 200 palabras. Os galardóns entregaranse o venres 18 de xullo nun acto na Fundación Luis Seoane e os tectos gañadores poderán lerse nunha edición especial en liña que se publicará nas páxinas web das entidades convocantes e en relatos.gal.

Feijóo obtén o apoio dunha décima parte dos militantes que di ter o PPdeG. Segundo as cifras do partido, dos cen mil afiliados inscribíronse 11.600 persoas para participar nas primarias do PP estatal nas que Feijóo é o único candidato. Participou finalmente o 90,43% e o líder popular recibiu 10.342 votos, o 98,58% dos emitidos.

• HEMEROTECA (2018) | Apenas o 4% da militancia que di ter o PP galego votará a sucesión de Rajoy
• HEMEROTECA (2018) | No PPdeG participou o 87% da militancia inscrita e o 3,9% da afiliación que o partido di ter

Patricia García Sánchez cesa "a petición propia" como directora xeral de Pesca, Acuicultura e Innovación Tecnolóxica, cargo no que levaba dende xaneiro deste ano e ao que accedeu sendo Alfonso Villares conselleiro do Mar. O Consello da Xunta aprobou este luns o decreto co seu cese e outro co nomeamento de Cándido Rial Rodríguez para o posto. Ademais, o Goberno galego aprobou a remuda de Marta Villaverde, nova conselleira do Mar, na direccion xeral de Desenvolvemento Pesqueiro, que estará dirixida por María de los Ángeles Vázquez Suárez. [Na imaxe de arquivo, Patricia García Sánchez na súa toma de posesión CC-BY-SA Xoán Crespo/Xunta]

• Rueda refúxiase do aluvión de preguntas sobre o caso Villares con ataques a BNG e PSdeG

As Medallas Castelao deste ano serán para Luar na Lubre, Víctor Freixanes, o empresario Emilio Pérez Nieto, a médica Rosa Rodríguez Álvarez e a Asociación Galega de Esclerose Lateral Amiotrófica. O presidente xustifica os galardóns polo 40 aniversario do grupo musical, a traxectoria de quen foi tamén presidente da RAG, a relevancia do grupo empresarial Pérez Rumbao que preside Pérez Nieto ou o traballo de todos os profesionais de atención primaria que simboliza a agora xubilada doutora Rodríguez. As Medallas Castelao entréganse cada 28 de xuño cadrando co aniversario do regreso a Galicia dos restos de Castelao en 1984 e tamén do plebiscito do primeiro Estatuto galego, en 1936 Na imaxe, actual formación de Luar na Lubre [© Luar na Lubre]

26 anos de prisión para o asasino de Cristina Cabo. A Audiencia de Lugo condena o home que matou unha veciña da capital lucense en 2022 horas despois de coñecela nun caso o que o xurado popular "estimou que concorría a agravante de aleivosía e asañamento, o que transforma a morte da vítima de homicidio a asasinato".

• HEMEROTECA | A Policía considera o único detido polo asasinato de Cristina Cabo en Lugo seguro autor do crime e pecha o caso

Un home asasina unha muller na Coruña, no barrio da Sagrada Familia. Os feitos tiveron lugar ao redor das 6.30 da mañá. A Policía, que detivo o agresor, está xa a investigalo como un crime de violencia de xénero, pois fontes apuntan a que se trataría da súa parella ou ex-parella. De confirmarse, trataríase do terceiro asasinato dunha muller a mans da súa parella ou ex-parella en Galicia no que levamos de ano, despois dos que tiveron lugar en Campo Lameiro a finais de maio e no Bolo en abril. Ademais, nas últimas semanas O Barco e Tomiño foron tamén escenario de intentos de asasinato.

• Un home asasina unha muller na Coruña nun novo crime machista
• Moraña decreta o mesmo loito para a muller falecida en Campo Lameiro e para o home que a maltrataba
• Alertan da "repunta" da violencia machista ante a sucesión de intentos de asasinato e agresións sexuais

Os ataques israelís a Irán provocaron xa 78 mortes, 60 delas este sábado nun ataque a un edificio residencial no que morreron 20 menores, segundo informan as autoridades iranianas. En Gaza, os ataques israelís mataron este sábado a 35 persoas, segundo as autoridades sanitarias do territorio palestino. Imaxe: Tasnim News Agency (CC BY 4.0)

BNG e ERC exixen a comparecencia de Pedro Sánchez ante o pleno do Congreso para "dar todas as explicacións a respecto das informacións publicadas sobre os presuntos casos de corrupción".

• Sánchez pide perdón polos "indicios moi graves" de corrupción e "eleccións non vai haber ata 2027"

O Concello de Marín abre expediente á concesionaria da piscina despois do ingreso en prisión provisional dun monitor investigado por seis delitos de agresión sexual a seis vítimas menores de 16 anos. Solicítalle información sobre como se realizou a contratación do monitor denunciado, que estaba en prácticas.

Berta Dávila gaña o Premio Ostana 2025 na categoría Giovani, un recoñecemento que distingue autoras e autores novos que escriben en linguas minorizadas de todo o mundo e amosan un compromiso estético e vital coa súa lingua. A organización destaca "o seu percorrido excepcional como escritora e poeta, a súa capacidade de renovar a linguaxe literaria cunha voz auténtica e orixinal, e o labor constante de difusión da literatura galega máis alá das súas fronteiras naturais". [📸 © Adela Dávila]

• ENTREVISTA | Berta Dávila: "A arquitectura da novela pretende explicar conceptos de como se configuran as soidades contemporáneas que vivimos"