Fálase

Vítimas de Angrois reúnense este xoves coa ministra de Transportes para pedirlle a investigación técnica independente que España aínda non fixo oito anos despois do accidente. Cinco meses despois de tomar posesión, e cinco días antes da inauguración do AVE Galicia-Madrid, Raquel Sánchez recibe á plataforma de afectados, que ten aberta unha causa contra o Estado para que cumpra coa esixencia europea de investigar o sinistro de Angrois á marxe da causa penal xa só pendente de xuízo contra o maquinista e un cargo de Adif. Na imaxe, protesta das vítimas ante a ministra na viaxe de probas do AVE Galicia-Madrid realizada hai unhas semanas. 

Os catorce restaurantes galegos que tiñan Estrelas Michelin consérvanas en 2022 e a eles súmase o Auga e Sal compostelán. O único con dúas estrelas segue sendo o Culler de Pau do Grove. O seu impulsor e chef, Javier Olleros (na imaxe), participou no último episodio do podcast Retrocorenta, producido por Praza.gal e VINTE, compartindo os seus inicios na cociña e a evolución do seu proxecto gastronómico e empresarial, moi ligado á sostibilidade da contorna natural. A listaxe íntegra de restaurantes distinguidos na gala das Estrelas Michelin pódese consultar aquí. O Culler de Pau mantén, ademais, a Estrela Verde á sostibilidade, coa que tamén conta O Balado (Boqueixón).

• 🔊PODCAST | Retrocorenta 9: Facer de comer
• EN VINTE | Javier Olleros: “Galicia pode ser un exemplo de sostibilidade alimentaria, ambiental e turística se facemos as cousas ben”

Inditex gaña 2.500 millóns nos nove primeiros meses do ano e logra un máximo histórico de vendas e beneficios nun terceiro trimestre. O beneficio neto subiu un 273% respecto a un ano antes. 

• Marta Ortega será presidenta de Inditex dende o 1 de abril tras a marcha "de mutuo acordo" de Pablo Isla

O PSdeG reúne por primeira vez a súa nova Executiva Nacional, con Valentín González Formoso á fronte. O novo secretario xeral socialista sinala que se propón "rearmar o proxecto" do partido para "conectar coa cidadanía" e sinala que será a comezos do ano, na seguinte xuntanza da dirección, cando será designada a persoa que remudará a Gonzalo Caballero na portavocía do Parlamento. [Imaxe: CC-BY-NC-SA PSdeG]

• CRÓNICA | Anatomía do terceiro 'reset' do PSdeG tras a perda da Xunta

O PP recupera a alcaldía da Baña logo de prosperar unha moción de censura dos populares e Compromiso por Galicia. Andrés García Cardeso recupera o posto de rexedor que ocupara durante 24 anos. O portavoz parlamentario do PSdeG, Gonzalo Caballero, apoiou o xa ex-alcalde socialista, José Antonio Pereira, tras unha manobra "contra natura". 

O comité acepta "negociar" con Alcoa a súa última proposta para deter a produción dous anos na Mariña, pero sempre que non se paren as cubas e que se garanta emprego para as empresas auxiliares. 

• Alcoa propón permisos retribuídos, deixar de fabricar aluminio ata 2024 e ningún despido colectivo en catro anos

Vía Galega presenta o himno 'Galiza, un Pobo, unha selección' para reivindicar o dereito á oficialidade das seleccións deportivas galegas. A peza contou coa colaboración de 28 persoas que puxeron a  voz e música, de maneira desinteresada

Coada, gromo, resiliencia, tanxugueiras e vacinódromo, candidatas a ser a palabra do ano 2021 no certame que organiza o Portal das Palabras da Real Academia Galega e a Fundación Barrié. A votación está aberta ata o 25 de decembro. O pasado ano, a elixida fora "nós".

Comezan en Lugo os traballos para eliminar unha pasarela a escasos metros da Muralla que fora instalada como provisional en 1992. A urbanización desta contorna implica "recuperar un espazo para a cidadanía saldando unha débeda histórica que resolverá as conexión viarias nunha contorna de alto valor patrimonial", sinala a alcaldesa lucense, Lara Méndez. O acondicionamento da zona peonil, que durará 6 meses, é previo á posterior construción na parcela anexa.

• HEMEROTECA | Adeus á pasarela fronte á Muralla de Lugo que ía ser provisional e durou tres décadas

Triunfo internacional da selección galega de ciclocrós coa ciclista júnior Laura Mira, a mellor da súa categoría na proba de clase UCI C2 disputada no circuíto da canle do río Turia, en València. Os detalles da proba, no sitio web da Federación Galega de Ciclismo.

• HEMEROTECA | Unha ducia de exitosas deportistas galegas