Fálase

A alcaldesa de Cambre dimite apenas un ano despois de chegar ao cargo. Nunha carta dirixida á veciñanza, María Pan sinala que PP, PSdeG e BNG lle botan "todo abaixo, pleno tras pleno, aferrándose a informes técnicos en contra". Marcha, agrega a ata agora rexedora en minoría para que "os once concelleiros de PP, PSdeG e BNG, que están boicoteando sistematicamente todas as solucións que o goberno de Unión por Cambre están poñendo enriba da mesa, teñan que situarse á fronte e traballar dende o goberno". Pan substituíu en marzo de 2024 a Óscar García Patiño, que dimtiu alegando o "bloqueo" da institución por decisións da secretaría e da intervención municipais. [Imaxe: © Concello de Cambre]

• OPINIÓN | Cambre, concello fallido? Por Carlos Amoedo

A Xunta pide a outras 209 persoas a través do DOG que acrediten ser "parte interesada" para alegar contra Altri. Anteriormente, o Goberno galego xa realizara a mesma petición a case un milleiro de persoas en dous chamamentos os pasados días 18 e 3 de marzo. Como nas publicacións previas, indica que se trata de persoas que asinaron alegacións contra o proxecto e "non indicaron adecuadamente o lugar de notificación ou non foi posible efectuala".

• A Xunta pide a outro cento de persoas no DOG que acrediten ser "parte interesada" para alegar contra Altri

As deputadas Raquel Arias (PP), Olalla Rodil (BNG) e Paloma Castro (PSdeG) abren o "melón" sobre o feminismo na política este martes en Pontevedra. Os Faladoiros Feministas que organiza o Concello de Pontevedra abordan a consecución do principio de igualdade no mundo do Deporte, a Política e a Cultura e o impulso e cambios que o feminismo conseguiu nestes eidos. A quenda do tándem feminismo e política é esta tarde, ás 19h, no Teatro Principal, moderado pola xornalista María Varela.

PuntoGal alerta de que a Liga de fútbol está a bloquear sitios web co dominio .gal "que non están realizando actividades ilegais" amparándose "na sentenza xudicial que lle permite impedir a emisión de eventos deportivos sen permiso". A entidade xestora do dominio galego na rede amosa "preocupación" por que a patronal do fútbol español estea a "invalidar dominios de xeito indebido, arredor dun cento en Galicia". "Estes feitos son un perigoso precedente para os dereitos dixitais", advirten.

• HEMEROTECA | Recolleita masiva de webs .gal para preservar a memoria da identidade galega en internet 
• HEMEROTECA | O .gal fai dez anos: un dominio galego non só "bonito", tamén "útil" e que busca medrar no eido empresarial

Marine Le Pen, inhabilitada 5 anos ao ser condenada por desvío de fondos públicos do Parlamento Europeo. O tribunal considera probado que doce persoas contratadas como asistentes do grupo parlamentario desta formación da extrema dereita na Eurocámara en realidade traballaban para o partido. En total, a sentenza eleva a 2,9 millóns o montante desviado, 474.000 euros impulsables a Le Pen, que con esta inhabilitación fica fóra da carreira das presidenciais francesas de 2027. Na imaxe, Marine Le Pen durante un debate no Parlamento Europeo en 2015. [CC BY-NC-ND Parlamento Europeo]

34 localidades galegas acollen este luns ás 20 horas concentracións de apoio a Palestina, convocadas pola Coordinadora Galega de Solidariedade coa Palestina. A xornada coincide coa conmemoración do Día da Terra palestina, que se celebra cada 30 de marzo e que lembra a histórica folga xeral de 1976 contra o roubo de territorios por parte de Israel.

• ENTREVISTA | Fayez Badawi: "Se realmente a UE e España queren defender os dereitos humanos, por que non rompen relacións con Israel?"

Puntos de Galicia superarán este luns os 25 graos de temperatura, segundo prevé MeteoGalicia, tras un domingo no que localidades da provincia de Ourense rexistraron os valores máis altos do Estado, con ata 28,5 graos durante a tarde. [Mapa: MeteoGalicia]

• HEMEROTECA | O cambio climático pon en risco o castiñeiro galego, que 'migra' a zonas máis altas e frescas
• HEMEROTECA | Galicia vive o terceiro xaneiro máis cálido en 60 anos en plena campaña para vendela como "refuxio climático"

Decenas de persoas maniféstanse en Santiago con motivo do Día Internacional da Visibilidade Trans, convocadas pola asociación de familias de menores e mocidade trans de Galicia, Arelas, xunto a outros colectivos LGTBIQA+ do país. Unha mobilización contra a transfobia social co lema "Sempre estivemos aquí, seguiremos hoxe, mañá e sempre!" que rematou na Praza do Obradoiro e contou co apoio dos principais partidos da oposición, BNG e PSdeG. [📸 Goretti Sanmartín, Marcha Mundial das Mulleres, Podemos Galicia e Galiza Nova]

• HEMEROTECA | A "avalancha" de fraudes coa lei trans que non chegou

Derrúbase parte do teito do hospital materno infantil de Ourense. Sucedeu na madrugada deste sábado e só causou danos materiais, a pesar de que o persoal estaba traballando nesa zona no momento da caída. Sanidade asegura que se trata dun “pequeno derrubamento” e dende o BNG solicitan a comparecencia do conselleiro para dar explicacións no Parlamento ante un incidente que consideran “gravísimo” e que “puido ocasionar danos persoais irreparables”. [📸 O hospital de Ourense CHUO, nunha imaxe de arquivo CC-BY-SA Xunta]

• HEMEROTECA | O hospital de Ourense acumula a maior lista de espera de Galicia para consultas e cirurxías
• HEMEROTECA | Axitación na sanidade ourensá: "Traballamos ao 200%"

A Fundación Florencio Delgado Gurriarán presenta unha plataforma colaborativa para recoller o léxico propio de Valdeorras. Unha ferramenta en liña que facilita as aportacións da veciñanza. Neste momento, no dicionario hai dez termos, todos eles recollidos na poesía de Florencio Delgado Gurriarán –honrado nas Letras Galegas de 2022– e con comentarios da comisión de lingua da Fundación, que se encarga de comprobar que sexan realmente palabras propias do valdeorrés.

• HEMEROTECA | A "Galicia infinda" homenaxea as letras e o "compromiso democrático e galeguista" de Florencio Delgado Gurriarán
• HEMEROTECA | Ricardo Gurriarán: "Florencio Delgado chegaba cargado de literatura galega feita en México, publicacións moi importantes para os resistentes"