Fálase

A escritora palestina Shahd Wadi será a Escritora galega universal en 2025 para a Asociación de escritoras e escritores en lingua galega. O consello directivo da AELG xustifica a escolla "desde o profundo respecto e afecto á súa persoa e a valoración da alta calidade da súa obra, así como por defender a dignidade nacional de Palestina e os dereitos individuais e colectivos da súa poboación, nomeadamente desde perspectivas feministas". 

Shahd Wadi [na imaxe, ©TBA] é autora do libro Corpos na trouxa: histórias-artísticas-de-vida de mulheres palestinianas no exílio (2017), onde investiga as narrativas artísticas no contexto da ocupación israelita da Palestina e considera as artes un testemuño de vidas, tamén da súa. 

A portavoz nacional do BNG, Ana Pontón, e a eurodeputada Ana Miranda asisten ao acto de investidura da nova presidenta de México, Claudia Sheinbaum. "Un momento emocionante poder compartir con miles e miles de mexicanas este día histórico no que, por primeira vez, teñen a unha muller presidenta que no seu discurso demostrou ademais que ten un proxecto para seguir transformando México, onde a igualdade é unha peza fundamental", sinalou Pontón. Na súa visita estreitaron lazos coa comunidade galega en México, con distintas reunións con empresarios e galegos e galegas residentes na capital, e intensificaron os contactos políticos da formación nacionalista a nivel internacional, con diferentes encontros como os que mantiveron co presidente do Senado, Gerardo Fernández Noroña, ou a nova ministra da Muller, Citalli Hernández.

Persoal das fundacións públicas de investigación biomédica (INIBIC, FIDIS e Fundación Biomédica Galicia Sur) e da Fundación pública de medicina xenómica concéntrase en Vigo [na imaxe CC-BY-SA CIG], na Coruña e Santiago para reclamar o inicio das negociacións para un novo convenio único que regule as súas condicións laborais, agora que dependen do Sergas. 

As e os profesionais responsables de toda a investigación que se realiza no eido da sanidade pública galega manteñen "unha diferenza importante" nas retribucións a respecto do resto do persoal do Sergas: "Non teñen dereito á carreira profesional e se lles nega o dereito ao cobro de trienios, como ao resto do persoal público", apunta dende a CIG Miguel Tizón.

• HEMEROTECA | O gasto en investigación aumenta en Galicia por debaixo da media española e afástase da converxencia cos datos estatais
• HEMEROTECA | Ángel Carracedo: "Cando empecei, a carreira universitaria estaba moi ligada á investigación e había máis posibilidades, agora está moi limitado"

O Goberno Vasco declara no municipio de Errenteria a súa primeira zona tensionada no mercado de alugueiro, o que permite empregar os mecanismos da lei estatal de vivenda para limitar prezos dos arrendamentos e prorrogar contratos. Tras Catalunya, Euskadi é a segunda autonomía en activar esta figura, á que a Xunta se opón en Galicia, e avanza que "ten en marcha" esta mesma declaración para outras tres localidades. O anuncio foi realizado polo conselleiro de Vivenda do Goberno Vasco, Denis Itxaso (PSE) e a alcaldesa de Errenteria, Aizpea Otaegi (EH Bildu), na imaxe, do Goberno Vasco.

• DATOS | País de propietarios, rendismo popular e alugueiro disparado á espera dos gobernos
• HEMEROTECA | Fronte da Xunta coas inmobiliarias contra os concellos que buscan limitar os alugueiros ao abeiro da lei estatal
• HEMEROTECA | A dirección central do PP sentencia que a Xunta non aplique os límites ao alugueiro que piden A Coruña e Santiago

O Estado de Israel declara persona non grata e prohíbelle á entrada ao secretario xeral da ONU, António Guterres, a quen dá en acusar de "apoiar a terroristas". Xustifican a decisión polas primeiras consideracións de Guterres tras o lanzamento de mísiles de Irán a territorio israelí, paralelas á invasión do Líbano por parte do Estado hebreo. Nese comunicado, o secretario xeral da ONU condenou a "escalada" do "conflito de Oriente Medio" e chamou por un alto o fogo". A finais de 2023 Israel xa acusara a Guterres de ser "un perigo para a paz mundial" por reclamar un alto o fogo en Gaza. [Imaxe: ©UN]

• HEMEROTECA | Israel acusa o secretario xeral da ONU de ser "un perigo para a paz mundial" por pedir un alto o fogo

Irán responde con lanzamentos de mísiles sobre Tel Aviv e Xerusalén tras matar Israel os líderes de Hamás e Hezbolá mentres, ao tempo, o exército israelí invade o Líbano. A escalada bélica prodúcese mentres Israel reitera os seus ataques contra territorios palestinos; segundo un estudo de Oxfam, xa matou en Gaza máis mulleres e crianzas que calquera outra guerra nos últimos vinte anos.

O Parlamento admite a trámite a iniciativa lexislativa popular Liberemos a Galega!, por unha CRTVG ao servizo do pobo. A plataforma en defensa dos medios públicos de comunicación, promotora da proposición de lei, que agrupa 40 colectivos e organizacións do ámbito audiovisual, social, cultural, político e sindical galego, despregará unha campaña para recoller, nun prazo de catro meses, as dez mil sinaturas que precisa para defender a ILP e que se vote na Cámara. [📸Representantes das promotoras da ILP no Parlamento CC-BY-NC-SA CIG]

• HEMEROTECA | Concurso público para dirixir a CRTVG: en marcha a lei popular por uns medios públicos "ao servizo do pobo"
• HEMEROTECA | 321 'venres negros', nove directivos investigados e unha lei popular para "liberar" a CRTVG

Unha empresa de alarmas condecora á Xunta. O director xeral de Emerxencias do Goberno galego, Santiago Villanueva recibiu este martes a "placa de ouro de seguridade de Securitas Direct" que, di, "acredita a Galicia como unha das comunidades máis seguras de España" segundo un estudo da compañía baseados, entre outras variables, nas súas propias alarmas. A filial española desta compañía sueca, representada no acto polo seu director territorial, Javier Iglesias, vén centrando gran parte da súa expansión nos últimos anos en alertar dun suposto risco de ocupacións ilegais de vivenda.

• HEMEROTECA | Alarmas no fogar e dubidosos seguros contra as ocupacións: un xigantesco negocio coas taxas de delito á baixa
• HEMEROTECA | Once desafiuzamentos por cada novo caso de ocupación en Galicia durante 2023

MeteoGalicia advirte dun "río atmosférico apuntando cara a Galicia" que xa este mércores deixará "ceos cubertos e chuvias persistentes" e que na xornada do mércores "intensificará a chegada de humidade", con chuvias que xa serán "localmente fortes" e "poden deixar acumulacións importantes". Máis info nesta ligazón. [Imaxe: MeteoGalicia]

A débeda da Xunta ascende ao 16,3% do PIB e supera por primeira vez os 13.000 millóns de euros, segundo os datos que vén de divulgar o Banco de España. O máximo en termos absolutos non se corresponde cun máximo en peso sobre o total da economía, o cal sucedeu a principios de 2021, ao equivaler a máis do 20% do produto interior bruto.

• HEMEROTECA | A negativa de Rueda a que o Estado asuma débeda galega marca a previa da xuntanza con Pedro Sánchez
• HEMEROTECA | Rueda sae da reunión con Sánchez sen quita da débeda galega e coa transferencia "inmediata" do litoral ditada polo Constitucional