Fálase

O BNG anuncia que vén de pactar co PSOE "desbloquear a tramitación da lei para a transferencia da AP-9" no Congreso. A norma comezou a ser tramitada por terceira vez en 2024 e acumula máis de medio cento de prórrogas de prazo de emendas. Agora, avanza o deputado do Bloque, Néstor Rego, "conseguimos que o PSOE se movese e que a Mesa do Congreso feche o prazo", agrega, no marco das negociacións para o proxecto de Lei de Mobilidade Sostible, que recollerá varias achegas da formación nacionalista. "O noso obxectivo é que sexa unha realidade antes de que remate este ano", sostén Rego.

• HEMEROTECA (2024) | O Congreso inicia por terceira vez o trámite do traspaso da AP-9
• CRÓNICA POLÍTICA | AP-9: non penses en Aznar

O PSdeG acusa o PP de bloquear o Parlamento para que Rueda marche de vacacións. Lara Méndez denuncia "o enésimo desprezo institucional" do Partido Popular e cualifica de "tomadura de pelo" a excusa de que o presidente da Xunta vai recuperar as vacacións canceladas pola vaga de lumes para o atraso do pleno da Cámara. A socialista sinala que "xa no mes de xullo se sabía que o Pleno se ía atrasar por cuestións de axenda". "De verdade sabían en xullo que iamos ter a peor vaga de lumes do ano? Non insulten a intelixencia da xente", asevera Méndez.

As Plataformas Ulloa Viva e En Defensa da Ría de Arousa (PDRA) convocan unha manifestación nacional contra Altri o 14 de decembro en Santiago. Advirten de que "estamos nun punto de inflexión" e que "é máis necesario ca nunca continuar coa presión mobilizadora para soterrar definitivamente este proxecto" que "ataca directamente o modo de vida da comarca da Ulloa, a calidade das augas do río Ulla, e a supervivencia da pesca e o marisqueo na ría de Arousa". A mobilización coincide co aniversario da marcha que o ano pasado ateigou a Praza do Obradoiro ao berro de "Altri Non".

👉🏻 Máis información: 

• Altri afronta unha batalla xudicial mentres Besteiro insta a Xunta a parar de vez o proxecto
• Altri albisca negro o seu futuro en Galicia aos catro anos de aterrar da man da Xunta
• Besteiro anticipa que Altri queda sen conexión eléctrica: "Non ten futuro en Galicia"
• BNG e PSdeG ven na disolución de Impulsa Galicia outro intento de ocultar xestións como a chegada de Altri

"É unha manifestación numerosa e non temos máis que dicir", sinala a Xunta sobre a marcha en apoio de Gaza deste domingo en Santiago. O conselleiro de Presidencia, Diego Calvo, en funcións de presidente ante as vacacións de Alfonso Rueda, di que "non iamos ningún do PPdeG nesa flotilla pero pouco máis podiamos facer", reiterando o seu rexeitamento a "os ataques que está a facer Israel".

• A solidariedade galega desborda as rúas de Compostela contra o xenocidio en Gaza
• HEMEROTECA | Rueda evita chamar xenocidio ao que pasa en Gaza: "Unha auténtica salvaxada que ten que parar canto antes"

Diego Calvo asume as funcións ordinarias da presidencia da Xunta dende este luns e "ata o regreso" de Alfonso Rueda. O DOG publica este 6 de outubro decreto que encarga "o despacho dos asuntos" da súa competencia ao conselleiro da Presidencia mentres Rueda está de vacacións tras cancelalas durante a vaga de incendios de agosto. Na imaxe, Rueda e Calvo o pasado setembro no Parlamento [CC BY-SA David Cabezón / Xunta]

‘San Simón’, mellor película do Panorama Galicia do OUFF. A ópera prima de Miguel Ángel Delgado faise coa Calpurnia á Mellor Película na Sección Oficial Panorama Galicia do Festival de Cine Internacional de Ourense. Esta foi a primeira vez que o filme se puido ver en Galicia nun festival de cine logo da súa estrea no Festival de San Sebastián. San Simón chegará ás salas de cinema o próximo 24 de outubro.

[Foto: Katalauta - OUFF]

• ENTREVISTA | "Poder rodar ‘San Simón’ no mesmo lugar onde ocorreron os feitos foi un privilexio e un reto"
• EN VINTE | Horror no paraíso. Cine contra o esquecemento en ‘San Simón’

“Sionistas fóra do Grove”: denuncian a “provocadora presenza” do ex-primeiro ministro de Israel Ehud Olmert no ‘Foro La Toja’ . Unha marcha convocada pola Coordenadora Galega de Solidariedade con Palestina percorre A Toxa para protestar polo “lavado de cara ao réxime terrorista de Israel”.

[Foto: Martín González]

• Mobilizacións masivas por Palestina á espera da manifestación do domingo e as folgas do día 15
• O Foro La Toja antes que a Medalla Pardo Bazán: a Xunta segue devaluando o seu galardón pola igualdade

Na recolleita dos nomes do mar, “un tesouro inmaterial” que corre o risco de desaparecer. A X Xornada de Onomástica Galega da Real Academia Galega, reúne este sábado no Museo de Pontevedra estudosos da talasonimia e traballadores do mar que custodian na súa memoria nomes de cons, cantís, abras, concheiros ou fondos mariños creados para as funcións que hoxe prestan tecnoloxías coma o GPS

As máis de 400 persoas da Flotilla Global Sumud detidas por Gaza atópanse nun cárcere israelí á espera da súa deportación ou encarceramento, segundo informa o Movemento Global para Gaza- Galiza, que lembra que "a presión diplomática internacional estase a demostrar esencial para garantir a liberación segura e rápida dos secuestrados". 

A plataforma SOS Sanidade Pública de Vigo e profesionais sanitarias do centro de saúde Nicolás Peña concéntranse para denunciar que a apertura do centro integrado de saúde Olimpia Valencia supón "unha fraude para a sanidade pública" porque "o que se fai é pechar recursos para abrir outro co que non sumamos estrutura para a atención primaria". Con este novo centro sanitario, o Sergas pechará outros dous na cidade, o de López Mora e mais o Nicolás Peña, e non contratará a máis facultativos para pasar consulta: "As usuarias saben os problemas que hai de lista de agarda para acceder a calquera profesional", incidiu o voceiro de SOS en Vigo, Manuel Moreira, quen tamén incidiu en que a Pediatría vai traballar en "precariedade" no Olimpia Valencia.