Fálase

A plataforma SOS Sanidade Pública de Vigo e profesionais sanitarias do centro de saúde Nicolás Peña concéntranse para denunciar que a apertura do centro integrado de saúde Olimpia Valencia supón "unha fraude para a sanidade pública" porque "o que se fai é pechar recursos para abrir outro co que non sumamos estrutura para a atención primaria". Con este novo centro sanitario, o Sergas pechará outros dous na cidade, o de López Mora e mais o Nicolás Peña, e non contratará a máis facultativos para pasar consulta: "As usuarias saben os problemas que hai de lista de agarda para acceder a calquera profesional", incidiu o voceiro de SOS en Vigo, Manuel Moreira, quen tamén incidiu en que a Pediatría vai traballar en "precariedade" no Olimpia Valencia.

Janet Novás, Premio Nacional de Danza 2025 na modalidade de interpretación. A artista porriñesa foi recoñecida co galardón do Ministerio de Cultura, dotado con 30.000 euros, xunto co onubense Guillermo Weickert. O xurado destacou "a excelencia técnica e o gran magnetismo dos seus traballos". Ademais de bailarina, Novás e actriz e o pasado ano fíxose co Goya á mellor actriz revelación por O corno.

• ENTREVISTA | Janet Novás: "Foi súper bonito ver como a miña forza non só está na explosión, senón tamén na contención"

Nacen os Premios do Castro para recoñecer os profesionais da xestión cultural do país. A Asociación Galega de Profesionais da Xestión Cultural crea os galardóns como homenaxe ao proxecto cultural e empresarial de Isaac Díaz Pardo e Carmen Arias Mimina. Madó Santos Maneiro, na imaxe, técnica de Cultura do Concello de Muros, obtén o premio na súa primeira edición polo seu traballo a prol da participación da cidadanía nas propostas culturais da vila. Recollerao o 16 de outubro nunha xornada profesional no Pazo de Mariñán.

Confirmadas unha quincena de mobilizacións en Galicia en solidariedade coa Global Sumud Flotilla tras ser interceptada polo Exército israelí cando se dirixía a Gaza e moitos dos seus compoñentes, feitos prisioneiros. A sección galega do Movemento Global para Gaza subliña a esixencia de "protección desta misión humanitaria e a apertura dun corredor que permita romper co cruel bloqueo que está a sufrir Gaza", así como "a inmediata liberación das activistas humanitarias secuestradas" e garantías para a súa seguridade. Pódese seguir aquí a retransmisión ao vivo das embarcacións da Flotilla non bloqueadas polo Estado de Israel.

• A presión contra o xenocidio en Gaza move mesmo o PPdeG
• As masivas protestas contra o equipo Israel obrigan a recortar o final de etapa da Vuelta
• Mobilizacións en mar e terra apoian en Galicia a saída da 'Flotilla Sumud Global' cara a Gaza

Israel comeza a interceptar os barcos da flotilla que se dirixía a Gaza. A abordaxe das primeiras embarcacións por parte do exército israelí produciuse fóra das augas legalmente controladas por Israel polo que se tería producido "unha violación da legalidade internacional", segundo denuncia Francesca Albanese, relatora especial da ONU para Palestina. Pódese seguir aquí a retransmisión en directo dos barcos aínda non interceptados.

Carmen V. Valiña gaña o Premio Narrativa Breve Repsol coa obra A illa que supuraba sangue, que será publicada pola Editorial Galaxia. O xurado salienta que "está escrita cunha prosa de fino burilado e tinturas líricas, esta narración ábrese tamén á intriga coa desesperación dunha das protagonistas, misterio que nos levará ata un final que, de seguro, lle resultará a quen lea tan sorprendente coma desacougante". O ditame deuse a coñecer este mércores en Vigo [📸 CC-BY-SA Secretaría Xeral da Lingua]

• ENTREVISTA | Carmen V. Valiña: "Elas teñen a vontade de seguir resistindo, aínda que sexa dentro dos muros dun manicomio"

O histórico Evencio Ferrero dá a remuda na alcaldía de Carballo tras 22 anos e será substituído por Daniel Pérez, actualmente concelleiro de Deportes e tamén deputado no Parlamento, que será o cabeza de cartel do BNG nas eleccións de 2027. A asemblea carballesa do Bloque tomou a decisión por unanimidade nun dos emblemas municipais da formación soberanista, que goberna con maioría absolutal. Ferrero, de 70 anos, xa manifestara a súa intención de preparar a súa retirada tras unha dilatadísima vida municipal. Máis información, hoxe en Praza.gal. Na imaxe, Ferrero e Pérez con Ana Pontón nun acto electoral en 2024.

• AMPLIAMOS 👉 O alcalde da transformación de Carballo dá a remuda

A CIG convoca unha xornada de paro xeral en Galicia para o vindeiro 15 de outubro para reclamar "a fin do xenocidio e da ocupación ilegal de Palestina". O sindicato chama a un paro de catro horas por quenda laboral: das 10 ás 14 horas na quenda de mañá, das 18 ás 22 horas na quenda de tarde e das 22 horas do día 14 ás 2 horas do día 15 na quenda de noite. Así mesmo, anima a concentrarse ese mesmo día pola mañá diante dos centros de traballo e a mobilizarse nas vilas e cidades a partir das 19.30 horas.

• A presión contra o xenocidio en Gaza move mesmo o PPdeG
• As masivas protestas contra o equipo Israel obrigan a recortar o final de etapa da Vuelta

O Tribunal Superior denega suspender cautelarmente a taxa turística de Santiago, como pedía a Asociación Unión Hotelera. O TSXG conclúe que os intereses desta patronal hoteleira non teñen rango superior ao interese público "inherente aos investimentos e gastos aos que afecta o importe recadado" por este novo tributo, que entra en vigor este 1 de outubro na capital galega.

• AMPLIAMOS👉 Os hoteleiros non logran suspender na Xustiza o inicio da taxa turística de Santiago
• "Si" definitivo á taxa turística en Santiago e na Coruña
• Vigo súmase á taxa turística
• Santiago aproba a ordenanza que permitirá cobrar a taxa turística

O Estado concede 150.000 euros á Deputación da Coruña para exhumacións de fosas de vítimas da ditadura. O Consello de Ministros vén de aprobar por Real Decreto distribución de 2,4 millóns á Federación Española de Municipios e Provincias, cinco deputacións e catro concellos para uns labores que, no caso galego, se suman aos financiados cos fondos que Memoria Democrática vén enviando á Xunta, que á súa vez os transfire ao grupo Histagra da USC para que asuma todos os traballos -este ano, intervencións en 8 fosas- sen que o Goberno galego figure neles. Na imaxe, traballos de Histagra no cemiterio naronés do Val.

• Os fondos estatais de Memoria Democrática permiten intervir en oito fosas galegas dos golpistas en 2025
• HEMEROTECA | O censo estatal de vítimas do franquismo basearase no proxecto pioneiro que a Xunta abandonou
• HEMEROTECA | Corpos ocultos "para tapar a magnitude dos crimes": a tese gaña forza nas fosas galegas dos golpistas