BNG e PSdeG piden o cesamento do director xeral de loita contra a Violencia Machista, Roberto Barba, por dicir que "un dos detonantes" dos asasinatos é a decisión da muller de deixar o home. Nacionalistas e socialistas din que o PP non cre na loita contra a violencia de xénero e asume posturas negacionistas.
Alfredo García dimite como alcalde do Barco tras 26 anos no cargo. Con 72 anos de idade explica que "chegou o momento" de dar a remuda no cargo no Concello valdeorrés, que asumirá o tamén socialista Aurentino Alonso, ata agora primeiro tenente da alcaldía. Na imaxe, García anunciando a súa decisión este 1 de agosto, canda o resto do equipo de goberno. O PSdeG goberna no Barco con maioría absoluta [Imaxe: Concello do Barco]
Os Orzamentos da Xunta para 2026 terán un teito de gasto non financeiro de 14.177 millóns, un 1,6% máis que os deste ano e un novo récord polo aumento dos ingresos estatais e de impostos. O Goberno galego prevé pechar este ano cunha taxa de paro do 8,3% e baixala a 7,8% o vindeiro ano.
Audasa gaña 44,6 millóns de euros na primeira metade do ano, 5 millóns máis (12,9%) que no mesmo período do ano pasado. Dos 105,6 millóns que ingresou por peaxes en 6 meses, 41,6 millóns pagounos a administración por diversas bonificacións.
O PP gaña a alcaldía de Forcarei tras saír adiante a moción de censura cun tránsfuga ex-edil do PSdeG. A dirección galega dos conservadores cualifícao como "acto de xustiza", en verbas da súa secretaria xeral, Paula Prado, que acudiu ao pleno no que foi elixida Belén Cachafeiro -quen xa fora rexedora ata 2019- como remuda da socialista Verónica Pichel. [Imaxe: PPdeG]
O papa valora visitar Santiago no Ano Santo 2027, segundo avanza o Correio da Manhã citando fontes diplomáticas da Santa Sé, españolas e portuguesas. O xornal portugués sinala que a Secretaría de Estado do Vaticano traballa na posibilidade dunha visita pastoral na que León XIV acuda á capital galega polo ano xacobeo e a Fátima para conmemorar os 110 anos das que a Igrexa católica considera como probadas aparicións da Virxe. A anterior visita papal ao noso país remóntase a 2010, cando acudiu Bieito XVI. O pasado maio, no inicio do pontificado, o arcebispo de Santiago, Francisco Prieto, reiterou a súa intención de convidalo a Compostela.
A Xunta levanta o confinamento da veciñanza afectada polo incendio da Cañiza, no que emprega por primeira vez o sistema Es-Alert de mensaxes a móbiles. Na tardiña deste mércores o lume pasou en pouco tempo de 20 a 200 hectáreas, poñendo en perigo vivendas, e mobilizou a Unidade Militar de Emerxencias (UME).
A Xunta emprega o sistema Es-Alert de mensaxes de emerxencia a móbiles por primeira vez en situación real por un incendio na Cañiza. En pouco máis de dúas horas o Goberno galego pasou de informar de que o lume superaba as 20 hectáreas a situalo en máis de 200, con petición de intervención da Unidade Militar de Emerxencias (UME) e desaloxo de vivendas.
Varios incendios activos en Galicia queimaron xa polo menos un cento de hectáreas en Carballeda de Avia, Meaño, Arbo, Bueu ou A Cañiza. Neste último tivo que ser declarada a situación 2 de emerxencia pola proximidade do lume ás casas na parroquia do Couto. Portugal segue loitando contra grandes incendios, no máis achegado á fronteira con Galicia, en Ponte da Barca, a Câmara Municipal pediu ao Goberno luso a activación do Mecanismo Europeo de Protección Civil. Foto: ATBRIF.
O Supremo deixa o fiscal xeral do Estado a un paso de ser xulgado por revelación de segredos no caso da presunta fraude fiscal do mozo da presidenta de Madrid. Un dos tres maxistrados da Sala que vén de desestimar o recurso de Álvaro García Ortiz desmárcase e considera formalmente que "non existe un fundamento indiciario suficiente que posibilite racionalmente unha condena" e por iso rexeita xulgalo. A dirección do PP, que manifesta hostilidade contra García Ortiz dende que exercía como fiscal de medio ambiente en Galicia, reitera a súa esixencia de dimisión, que Pedro Sánchez e a Unión Progresista de Fiscais -que dirixiu- rexeitan. Na imaxe, García Ortiz o pasado xuño no Pazo de Mariñán [© Fiscalía Xeral do Estado]
