Paulo Carlos López será o primeiro secretario xeral de Sumar Galicia. A formación celebra a vindeira fin de semana a súa asemblea xeral cunha única candidatura que inclúe como número dous a Verónica Martínez Barbero, deputada por Pontevedra e nova voceira de Sumar no Congreso, e no terceiro a Manuel Lago, deputado pola Coruña.
Falece Celeste Caeiro, a muller que virou os caraveis en símbolo da revolución portuguesa [Imaxe: Almada TV]
O comité de folga da CRTVG denuncia que "a dirección aumenta as coaccións ao cadro de persoal para que a ausencia do seu posto de traballo non interfira na emisión do programa O Termómetro". Coa deste venres son xa dezaoito as xornadas nas que o programa non saíu ao aire na TVG, non chegando a emitirse na súa integridade dende este luns. O comité, que vén manifestando a negativa da directiva dos medios de comunicación públicos galegos a dialogar coa representación do persoal, critica a "actitude coercitiva" cara ás traballadoras e traballadores que están secundando esta folga indefinida.
Gonzalo Hermo gaña o XXII Premio Miguel González Garcés de poesía da Deputación coa obra Un xesto de ternura porque "ofrece unha experiencia poética completa, cunha estrutura ben meditada, que conxuga a beleza da palabra coa profundidade do pensamento", segundo salienta o xurado, formado polas poetas Yolanda Castaño, Pablo Otero Rodríguez, Míriam Ferradáns, Samuel Merino e Oriana Méndez. O poemario gañador "propón unha poesía introspectiva e depurada, onde a linguaxe rica e evocadora se achega á súa forma máis pura, eliminando excesos e retóricas para lograr unha obra de precisión sensorial". O poeta de Taragoña (Rianxo) foi distinguido co Premio Nacional de Literatura na modalidade de Poesía Nova en 2015 polo poemario Celebración (Apiario), entre outros galardóns.
O Supremo confirma a condena do PP por reforma a súa sede central con cartos da súa caixa b. O tribunal ratifica o fundamental da sentenza da Audiencia Nacional pero reduce lixeiramente as penas aos tres condenados, entre os que está o ex-tesoureiro Luis Bárcenas, por dilacións indebidas. Na imaxe, unha celebración dunha noite electoral na sede da rúa Génova de Madrid.
A revista Luzes organiza este sábado ás 12 no Liceo de Ourense a súa III Xornada Tecendo Xornalismo, cunha mesa redonda arredor das fake news. Participarán Jesús Maraña, director editorial de infoLibre, Víctor Sampedro, autor do libro Voces del 11M, e David Reinero, xornalista de Praza.gal.
O xuíz decreta o ingreso en prisión do detido pola morte de Estela Blach en Baiona, investigado por un delito de homicidio ou asasinato, a determinar durante a instrución, e por outro de quebrantamento de medida cautelar. O home, detido seis días despois do crime, acolleuse ao seu dereito a non declarar.
Confirmado o achado da foxa común de vítimas dos golpistas no cemiterio naronés do Val. O equipo liderado por Histagra localiza "inequivocamente, como mínimo" restos de "catro individuos en posición non funeraria, indicando con claridade que se trata dun enterramento clandestino" e outros sete "en posicións aparentemente funerarias, e todos, salvo un deles, no que parecen observarse sinais de violencia no cranio". "Non é posible avanzar mais sen exhumar o que queda debaixo dos nichos, considerando que se traballou ata onde se puido", explican. [Imaxe: Histagra]
O Instituto de Estudos Miñoranos (IEM) acolle este venres, na súa sede de Gondomar ás 20 horas, un debate sobre Os medios e o poder no que intervirán Luís Álvarez Pousa, director de Tempos Novos, Inma López Silva, escritora, e David Reinero, xornalista de Praza.gal.
Publicados no DOG os festivos locais de todos os concellos galegos para 2025. Engádense aos festivos de ámbito galego (o Día das Letras -17 de maio- e o Día Nacional -25 de xullo-) e aos de ámbito estatal -na imaxe-.
