Fálase

O pleno do Congreso aproba os Orzamentos Xerais do Estado para 2021. As primeiras contas do Executivo do PSOE e UP avanzan con 188 e 187 votos a prol -a cifra variou nalgunhas votacións-, unha maioría máis ampla que a lograda o pasado xaneiro na investidura de Pedro Sánchez (167), e 153 en contra. O proxecto orzamentario continúa agora trámite no Senado. Entre os grupos con representación polas circuscricións galegas, PSOE (10) e Galicia en Común (2) votaron a prol; o PP (10) e o BNG (1) fixérono en contra. (Imaxe © PSOE)

• AMPLIAMOS | PSOE e UP sacan adiante o seu primeiro Orzamento do Estado por ampla maioría para pór fin á 'era Montoro'
• O Orzamento do Estado prevé investir en Galicia un 10% máis que as contas de 2019 malia á liña descendente pola fin do AVE
• As contas do Estado para 2021 destinan 55 millóns a rebaixar as peaxes da AP-9

As comunidades autónomas e o Ministerio de Sanidade aproban o documento de normas e recomendacións para a prevención da Covid-19 durante as celebracións de Nadal. Establécese un límite máximo de 10 persoas (nenos e nenas incluídos) nos encontros familiares dos días 24, 25 e 31, recomendándose que pertenzan a unha única unidade de convivencia "ou a dúas, como máximo". O toque de queda en Noiteboa e Noitevella amplíase á unha e media da madrugada. Establecerase un peche perimetral de ámbito autonómico entre o 23 de decembro e o 6 de xaneiro, pero permitiranse os movementos para visitar a familiares. Nunha primeira reacción, a Xunta amósase conforme co plan e destaca que inclúe algunhas das súas propostas.

• ENTREVISTA | "O ideal sería evitar as ceas de Nadal con quen non viva connosco, pero podemos tomar medidas para que sexan máis seguras"

Un home asasina á súa parella en Gondomar. Segundo recollen a CRTVG e Faro de Vigo, o agresor tentouse suicidar tras o crime e na zona está a intervir a Garda Civil. (Imaxe: CC-BY-NC-SA Gz Contrainfo)

• A crise da COVID incrementa a dependencia económica das mulleres vítimas de violencia machista cos agresores

Os Franco, dispostos a que os bens queden no Pazo de Meirás por un "prezo razoable". A familia do ditador advírteo na vista sobre as medidas cautelares de inventariado dos bens e a prohibición de trasladalos ata que o decida a xuíza.

A Xunta restrinxe a mobilidade con Portugal do 4 ao 9 de decembro por mor da incidencia da COVID-19 no país veciño. Así o vén de avanzar o presidente da Xunta, no marco da explicación das medidas de "desescalada", incluíndo a hostalería. As mudanzas entran en vigor ás cero horas do venres, día 4. 

• AMPLIAMOS | O novo plan COVID da Xunta permite encontros de non conviventes e abrir a hostalería con catro niveis de restricións
• MAPA INTERACTIVO | Podes consultar aquí o nivel de restricións no que se atopa cada concello

O Reino Unido aproba o uso da vacina de Pfizer contra a COVID-19 e prevé comezar a administrala a vindeira semana. A Axencia Europea do Medicamento vaina avaliar o día 29 e o 12 de xaneiro estudará a autorización da de Moderna. (Na imaxe, vacinación da gripe na Coruña)

• HEMEROTECA | As vacinas de Pfizer e Moderna contra a COVID, entre a esperanza e a cautela: "falta moita información"

O paro rexistrado aumentou en 6.165 persoas en Galicia durante o mes de novembro e chega ás 187.472, o que supón 21.813 máis que un ano antes. En termos porcentuais, a suba galega quintuplica a media estatal.  No mesmo mes, a afiliación á Seguridade Social diminuíu en 2.134 persoas e queda en 1.009.884 afiliacións, 13.706 menos que un ano antes. Máis información, hoxe en Praza.gal.

As restricións ante a COVID reláxanse en Santiago de Compostela, Ames, Teo, Ourense, Barbadás, O Pereiro de Aguiar, A Estrada e Ares. Nestes oito concellos estarán permitidas dende este xoves as reunións de persoas non conviventes e desaparecen os peches perimetrais. En cambio, a Xunta endurece as medidas na Guarda e As Pontes, ante o empeoramento da súa situación epidemiolóxica. Estas dúas localidades pasan a estar no nivel 3 de restricións, con peches perimetrais e prohibición de reunións sociais. Este mércores a Xunta detalla as mudanzas para o eido da hostalería.

• MAPA INTERACTIVO | Podes consultar aquí o nivel de restricións no que se atopa cada concello
• GUÍA | Consulta aquí o detalle das medidas que se aplican en cada nivel de restricións

A patronal galega celebrará o 15 de xaneiro as súas cuartas eleccións en ano e medio logo da dimisión do presidente Díaz Barreiros aos dous días de ser proclamado a semana pasada. A CEG continúa no seu caos interno e entre duras acusacións entre varios dos asociados. 

O PP simula que as súas contas en redes sociais foron "censuradas" e difunde nelas imaxes da bandeira venezolana e do presidente dese país, Nicolás Maduro, atribuíndoas ao que denomina "Ministerio de la Verdad". O pasado novembro, Alberto Núñez Feijóo acusara o Goberno de España de pretender "amordazar á prensa" e o colectivo Defende a Galega, formado por persoal da CRTVG, retrucara que o presidente da Xunta "de amordazar os medios sabe moito".

• HEMEROTECA | Das agresións a fotoxornalistas á manipulación na TVG: luz europea sobre as ameazas á liberdade de información en Galicia