Fálase

As restricións ante a COVID reláxanse en Santiago de Compostela, Ames, Teo, Ourense, Barbadás, O Pereiro de Aguiar, A Estrada e Ares. Nestes oito concellos estarán permitidas dende este xoves as reunións de persoas non conviventes e desaparecen os peches perimetrais. En cambio, a Xunta endurece as medidas na Guarda e As Pontes, ante o empeoramento da súa situación epidemiolóxica. Estas dúas localidades pasan a estar no nivel 3 de restricións, con peches perimetrais e prohibición de reunións sociais. Este mércores a Xunta detalla as mudanzas para o eido da hostalería.

• MAPA INTERACTIVO | Podes consultar aquí o nivel de restricións no que se atopa cada concello
• GUÍA | Consulta aquí o detalle das medidas que se aplican en cada nivel de restricións

A patronal galega celebrará o 15 de xaneiro as súas cuartas eleccións en ano e medio logo da dimisión do presidente Díaz Barreiros aos dous días de ser proclamado a semana pasada. A CEG continúa no seu caos interno e entre duras acusacións entre varios dos asociados. 

O PP simula que as súas contas en redes sociais foron "censuradas" e difunde nelas imaxes da bandeira venezolana e do presidente dese país, Nicolás Maduro, atribuíndoas ao que denomina "Ministerio de la Verdad". O pasado novembro, Alberto Núñez Feijóo acusara o Goberno de España de pretender "amordazar á prensa" e o colectivo Defende a Galega, formado por persoal da CRTVG, retrucara que o presidente da Xunta "de amordazar os medios sabe moito".

• HEMEROTECA | Das agresións a fotoxornalistas á manipulación na TVG: luz europea sobre as ameazas á liberdade de información en Galicia

Portugal prevé trens directos Valença-Lisboa a comezos de 2021, cando remate as obras de electrificación da liña entre o Miño e Viana do Castelo, a onde xa chega o servizo Intercidades desde a capital.

• (23-10-2020) Unha década despois de aparcar o AVE, Portugal volve considerar "prioritario" un tren que una Porto e Vigo nunha hora

O colexio de Castrelo do Val chámase desde este martes CEIP Plurilingüe Raúl Fernández en lembranza do falecido deputado e alcalde do PSdeG, mestre de profesión. O DOG publica o cambio de denominación do anterior CEIP Plurilingüe Castrelo do Val. [Imaxe: PSdeG]

Forte desprendemento de rochas nun arco dun dos cantís da praia de Augas Santas (As Catedrais) de Ribadeo sen causar danos persoais. O alcalde da vila, Fernando Suárez, subliña que fenómenos coma este son "inherentes á costa cantábrica, derivados da propia acción da natureza". “Ás administracións soamente nos queda tomar medidas preventivas ao respecto á veciñanza e aos visitantes da nosa costa, tomar conciencia das mesmas", subliña. Diversos estudos advirten dende hai anos destes riscos de desprendementos na zona e un deles provocou a morte dunha muller en 2018. (Imaxe: Concello de Ribadeo)

O TSXG rexeita o recurso de Alcoa contra o auto que lle prohíbe parar as cubas da factoría de San Cibrao. O tribunal considera “imprescindible” que as cubas permanezan en funcionamento para garantir a readmisión dos traballadores se os seus despedimentos fosen nulos

• HEMEROTECA | O TSXG dá folgos á loita contra o ERE de Alcoa ao impedir a parada das cubas

A negativa dunha futbolista galega a homenaxear a Maradona ecoa xa nos medios arxentinos e de todo o mundo, que destacan o rexeitamento de Paula Dapena ao minuto de silencio nun partido do Viaxes Interrías fronte ao Deportivo, unha acción reivindicativa da que deu conta Pontevedra Viva nunha reportaxe. Foto: © Tania Esperón

A Xunta só deixa fóra Baleares e Canarias da obriga de rexistro de viaxeiros que cheguen a Galicia. O DOG renova este luns a anterior listaxe de territorios, publicada o 11 de novembro e que debía ser actualizada aos 15 días naturais, na que está incluída a maioría de Europa, incluído Portugal.

Verín volverá mobilizarse este luns, un ano despois da gran marcha contra o peche do paridoiro, para pedir a retirada do expediente ao xinecólogo do hospital comarcal. 

• ENTREVISTA | Javier Castrillo: "Foi unha vinganza; xa me advertiran de que gardase ben as costas"