Fálase

Dimite o máximo responsable da FP na Consellería de Educación, o veterano José Luis Mira, menos de cinco meses despois de que o Goberno de Alfonso Rueda crease o departamento como dirección xeral. Así o vén de confirmar o propio presidente ao termo do Consello da Xunta, que nomeou como substituta a Eugenia Pérez, ata agora subdirectora xeral de Innovación na Vicepresidencia Primeira. Xunto con José Luis Mira tamén deixa as súas responsabilidades o seu fillo, Iván Mira, que exercía como subdirector xeral de Inspección e Avaliación, segundo informa La Voz de Galicia. Máis información, hoxe en Praza.gal.

• AMPLIAMOS 👉 Dimite catro meses despois de ser degradado un dos máis veteranos responsables de Educación da Xunta
• HEMEROTECA | Rueda reformula a cúpula de Educación ano e medio despois de facelo Feijóo

A Comisión Europea reduce a case a metade as áreas afectadas polo veto á pesca de fondo dentro das 87 sinaladas como ecosistemas vulnerables. Así o vén de confirmar o ministro de Agricultura e Pesca, Luis Planas, na TVG. "En 41 das 87 zonas non será efectivo o veto comunitario á pesca de fondo", explicou. 

• A Xunta pide unha moratoria de dous meses ao veto á pesca de fondo e cifra nuns 800 millóns o impacto en Galicia

Aprobada definitivamente a Lei de Memoria Democrática. O pleno do Senado [na imaxe] ratificou este mércores o texto que xa fora aprobado polo Congreso. PP, Vox e Cs volveron votar en contra desta lei, que afonda na Lei de Memoria Histórica de 2007. A nova lexislación entrará en vigor coa publicación no BOE. 

• + INFO | A Lei de Memoria Democrática suprime o título de conde de Fenosa 67 anos despois
• HEMEROTECA | Da anulación do xuízo a Bóveda á reparación do espolio económico franquista: os retos da Lei da Memoria Democrática

Comeza na Coruña o cumio hispano-alemán que reúne o presidente Pedro Sánchez e o chanceler Olaf Scholz, ademais de quince ministros dos gobernos español e xermano. Foto: Embaixada de Alemaña en España. 

• CRÓNICA 👉 Da gabanza dos recortes ás demandas de "cooperación": Galicia acolle un cumio hispano-aleman oito anos despois

O Goberno de España recorrerá ante o Tribunal de Xustiza da UE o veto á pesca de fondo. Así o vén de anunciar o ministro de Agricultura e Pesca, Luis Planas, durante a sesión de control no Congreso. "Asumimos a representación do conxunto do sector e defende os seus intereses", di Planas, que considera que "a información científica" sobre a que se basea o regulamento "é insuficiente e anticuada" e porque "non se tiveron en conta os efectos económicos e sociais". 

• Unanimidade en Galicia contra o veto á pesca de fondo imposto pola Comisión Europea en 87 zonas do Atlántico

Principia o xuízo polo accidente de Angrois na Cidade da Cultura, en Santiago. Nesta primeira xornada abordaranse diversas cuestións previas do procedemento. 

• CRÓNICA DA PRIMEIRA XORNADA 👉 O Estado tenta baleirar de contido o xuízo de Angrois e xuíza e fiscal rexéitano
• Xuízo á alta velocidade española: comeza tras 9 anos a vista que dirá se en Angrois fallou o maquinista ou un cargo de Adif
• Nove anos de información técnica, xudicial e política do accidente, en Praza.gal

Marica Campo (Letras), María Victoria Carballo-Calero (Artes visuais), Melania Cruz (Artes escénicas), os cursos internacionais Música en Compostela (Música), Xosé Ramón Gayoso (Audiovisual), Manuel González (Lingua), Xacarandaina (Patrimonio Cultural) e o programa ConCiencia (Proxección exterior), distinguidos cos Premios da Cultura Galega 2022. Os galardóns están promovidos pola Xunta e no xurado están presentes representantes do Goberno galego e diversas entidades culturais.

O PP evita que o Parlamento tome en consideración a proposición de lei do xogo formulada polo PSdeG, que incluía medidas como prohibir que as casas de apostas estean a menos de 850 metros dos centros educativos. O PP di que a proposta é "incongruente" e instan os socialistas a "realizar achegas" á proposta de lei do xogo da Xunta, aprobada polo Consello a pasada semana con catro anos de demora e que se dispón a iniciar trámite parlamentario para substituír á de 1985. Na imaxe, Valentín González Formoso xunto ao deputado socialista Julio Torrado, que defendeu a iniciativa, acompañados por representantes de asociacións contra a ludomanía e o profesor da USC Antonio Rial, experto en condutas aditivas co xogo.

• A Xunta manterá as máquinas de apostas nos bares como lle pediu a patronal malia rexeitalas o resto de representantes sociais
• O PSdeG propón unha lei do xogo para substituír á de hai case 40 anos e afastar as casas de apostas dos colexios

O Parlamento Europeo aproba definitivamente a lexislación que obriga a implantar un único cargador para todos os dispositivos electrónicos. Antes da fin de 2024, todos os móbiles, tabletas e cámaras á venda terán que contar cun porto de carga USB-C e dende mediados de 2026, a obriga estenderase aos ordenadores portátiles. A reforma saíu adiante por 602 votos a prol, 13 en contra e 8 abstencións e chega, destaca a Eurocámara, despois de que "as medidas voluntarias" reclamadas pola Comisión Europea á industria "non achegasen resultados concretos para os consumidores da UE". [Imaxe: Marcus Urbenz/ Unsplash]

Todo listo na Cidade da Cultura para que este mércores comece o xuízo polo accidente de Angrois, co maquinista e un ex-cargo de Adif acusados pero coa alta velocidade española no punto de mira.

• Xuízo á alta velocidade española: comeza tras 9 anos a vista que dirá se en Angrois fallou o maquinista ou un cargo de Adif