Fálase

O Parlamento aproba por unanimidade incluír a violencia dixital na Lei galega para a prevención e o tratamento integral da violencia de xénero. Unha proposta do PP, apoiada por BNG e PSdeG, que agora terá que verse reflexada nunha modificación do Código Penal do Estado co fin de perseguir esta clase de delitos, e que supón a segunda modificación da lei de 2007 neste ano, despois de incluír a violencia vicaria dentro das violencias machistas. Por unha emenda do BNG aprobada no pleno [na imaxe © Parlamento de Galicia], o texto lexislativo incluirá unha mención específica ao caso das gravacións de mulleres na Maruxaina difundidas en webs pornográficas. 

• HEMEROTECA | O Parlamento actualizará a lei contra a violencia machista engadindo a "violencia de xénero dixital"

O Goberno de España garante o apoio de ERC aos Orzamentos ao pactar un mínimo de produción en galego, catalán e vasco na lei audiovisual e a súa presenza en plataformas de streaming. 

• AMPLIAMOS 👉 O Goberno de España asegúrase a aprobación dos Orzamentos de 2022 e o BNG absterase tras "unha negociación decepcionante"
• Apoio unánime no Parlamento para que a nova Lei do audiovisual estatal garanta a presenza do galego

O BNG absterase na votación definitiva dos Orzamentos Xerais do Estado para 2022. O deputado do Bloque no Congreso, Néstor Rego, cualifica de "decepcionante" o resultado das negociacións co Goberno do PSOE e UP a respecto das súas emendas. "Faltou vontade", sinala o nacionalista, quen resalta que a intervención estatal da factoría de Alcoa na Mariña sería dabondo para decantar o seu voto cara ao "si".

• AMPLIAMOS 👉 O Goberno de España asegúrase a aprobación dos Orzamentos de 2022 e o BNG absterase tras "unha negociación decepcionante"
• HEMEROTECA | Os Orzamentos do Estado prevén un 29% máis de investimento en Galicia para 2022 malia á fin do AVE

Os votos do PP frean as emendas á totalidade de BNG e PSdeG aos Orzamentos Xerais da Xunta para 2022 e mais á a lei de acompañamento das contas, que inclúe a mudanza dun golpe de ata 27 leis, tres aprobadas este mesmo ano. 

• O PP rebaixa aínda máis impostos ás rendas altas nas súas emendas aos orzamentos da Xunta
• Vivenda e enerxía encabezan as subas no orzamento da Xunta para 2022 polo impulso dos fondos estatais e da UE

Renfe porá mañá, 23 de novembro, á venda os billetes do AVE á Meseta, que entrará en servizo o 21 de decembro. Así o vén de confirmar a ministra de Transportes, Raquel Sánchez, na viaxe de probas que realiza este luns no último treito da liña. [Imaxe: Praza.gal]

• AMPLIAMOS 👉 O 21 de decembro comeza a funcionar o AVE coa Meseta tras dúas décadas de obras 

O Parlamento debate hoxe as emendas á totalidade dos Orzamentos da Xunta para 2022 formuladas por BNG e PSdeG. Nesta ligazón pódese seguir a sesión ao vivo e nestoutra, recuperar todas as informacións de Praza.gal a respecto das contas públicas galegas para o ano vindeiro.

• INTERACTIVO | Vivenda e enerxía encabezan as subas no orzamento da Xunta para 2022 polo impulso dos fondos estatais e da UE

O programa Salvados (La Sexta) abordou este domingo a situación de Ence na ría de Pontevedra tras as sentenzas da Audiencia Nacional que anularon a prórroga outorgada á pasteira polo Goberno de Rajoy ata 2073, así como as posturas enfrontadas sobre a súa permanencia na ría e a historia política e económica que acompaña á compañía. O espazo que conduce o xornalista galego Fernando González Gonzo contou con intervencións como as da activista Leonor González Nené (APDR), o alcalde de Pontevedra, o presidente da Xunta ou o director de Praza.gal, David Lombao

• HEMEROTECA | Ence, cun pé fóra da ría de Pontevedra vinte anos despois da súa privatización
• HEMEROTECA | Todo o publicado sobre Ence en Praza.gal, neste espazo

A ministra de Industria, Reyes Maroto, descarta a intervención do Goberno do Estado na factoría de Alcoa en San Cibrao. Maroto afirma que a multinacional é "o problema" e pídelle unha resposta antes de que remate o ano. Despois da folga xeral convocada na comarca da Mariña esta semana [na imaxe CC-BY-NC-SA CIG], este domingo unha nova concentración con preto de 500 moteiros volveu reclamar que non se desmantele a fábrica de aluminio da Mariña.

• A Mariña responde en masa á folga xeral e as loitas laborais viran en berro transversal contra o abandono

A delegada da Xunta en Vigo, Marta Fernández-Tapias, confirma a súa candidatura para presidir o PP vigués no congreso local do partido que se celebrará o 18 de decembro. Fernández-Tapias [na imaxe CC-BY-SA Xunta de Galicia], que conta co apoio do vicepresidente Alfonso Rueda, competirá coa candidatura dos ex-conselleiros Javier Guerra e Elena Muñoz.

• Dous ex-conselleiros aspiran a dirixir o PP de Vigo fronte á delegada da Xunta, aposta da dirección de Alfonso Rueda

Vigo prende o alumeado de Nadal desde a árbore metálica situada na rúa Policarpo Sanz, frente ao teatro García Barbón. Este ano son 11 millóns de leds os que o alcalde, Abel Caballero, acenderá á vez co centro da cidade ateigado de xente. Segundo o Concello de Vigo, que emite en directo o acendido das luces, as previsións da ocupación hoteleira na cidade para esta fin de semana achéganse ao 80%.