Fálase

A primavera comeza este luns ás 22:24 horas. Na contorna do equinoccio, a duración do día e da noite son teoricamente iguais. "O Sol sae exactamente polo leste e o solpor prodúcese exactamente ao oeste. Porén, debido á luz crepuscular, antes da saída do Sol e logo do solpor, a claridade supera á escuridade", explica o director do Observatorio Astronómico Ramón María Aller, José Ángel Docobo. 

Nos vindeiros meses haberá dúas oportunidades para observar a simple vista o planeta Mercurio desde Galicia: en torno ao 11 de abril tras o solpor e sobre o 29 de maio antes da saída do Sol. 

O presidente da Xunta será recibido pola presidenta da Comisión Europea, Ursula von der Leyen, o vindeiro luns 27 en Bruxelas. Entre os asuntos que Alfonso Rueda abordará na xuntanza, segundo destacan desde o Goberno galego, figuran "nun lugar preferente" o futuro da pesca galega e a xestión dos fondos europeos. [Na imaxe, Rueda no encontro bilateral desta semana en Asturias CC-BY-SA David Cabezón/Xunta]

Tres días de loito no Concello de Vilaboa polo falecemento de dous homes atropelados mentres estaban na terraza dun establecemento da parroquia de Santa Cristina de Cobres. O sinistro, que tivo lugar este venres pola tarde, tamén deixou dous feridos leves. A investigación sobre o incidente por parte das autoridades segue aberta. 

María Vázquez gaña a Biznaga de prata á mellor interpretación feminina por 'Matria' no Festival de Málaga. A actriz interpreta a Ramona, unha personaxe baseada na historia real de Francisca Iglesias Bouzón que o director Álvaro Gago contou na curtametraxe homónima e que recupera para a ficción nesta película que se presentou na sección Panorama da Berlinale e que chegará ás salas de cine o día 24. 

• O cine galego acada un fito histórico coa estrea de 'Matria' e 'Sica' no Festival de Berlín
• A Berlinale fala galego con 'Matria' e 'Sica', seleccionadas para o festival
• 'Matria', a curta que lles dá voz "ás mulleres silenciadas que soportan e calan"

O Tribunal Penal Internacional ordena a detención de Vladimir Putin por crimes de guerra. Acusa o presidente ruso da "deportación ilegal" de menores de "áreas ocupadas na Ucraína á Federación Rusa". A mesma orde inclúe á responsable dos dereitos da infancia asociada á presidencia rusa, Maria Alekseyevna Lvova-Belova. [© Imaxe de arquivo divulgada polo Kremlin]

O accidente dun camión na N-6 no treito cortado da A-6 dificulta aínda máis a comunicación coa Meseta. Coa autovía cortada desde xuño pola caída do viaduto, a primeira hora deste venres un camión quedou colgando na N-6 e reduciu a circulación nela a un só carril para a entrada en Galicia, mentres a circulación cara á Meseta foi desviada a través dunha estrada aínda máis antiga que atravesa a poboación leonesa do Castro. Na imaxe de Google, a estrada pola que foi desviado o tráfico cara á Meseta e, na parte superior, a A-6 da que quedou colgando o camión.

Os presidentes de Galicia e Asturias reclaman a Madrid e Bruxelas maior financiamento da dispersión poboacional e o impulso do Corredor Atlántico ferroviario. Alfonso Rueda e Adrián Barbón reúnense en Taramundi e emiten unha declaración institucional na que apostan por colaborar en cuestións de interese común. Pola contra, manteñen a discrepancia a respecto da denominación da Ría de Ribadeo, que Asturias quere chamar tamén Ría do Eo.

• Xunta e Principado retoman os cumios galaico-astures evocando a Fraga e ignorando a Touriño
• Euskadi suma a Galicia, Asturias e Cantabria a un novo 'lobby atlántico' ante Madrid e Bruxelas en defensa do tren e o hidróxeno

A xustiza expide unha orde de detención nacional e internacional para o salesiano condenado a 32 anos e medio de cárcere por abusar de seis menores no Colexio María Auxiliadora Salesianos de Vigo. A Audiencia Provincial de Pontevedra solicita a súa detención e ingreso en prisión tras constatar no informe da Garda Civil de Cambados que "fuxiu coa única intención de subtraerse á acción da xustiza e evitar o cumprimento das penas privativas de liberdade ás que foi condenado". Segundo C.V., sacerdote e profesor de relixión, non se presentou voluntario no centro penitenciario o 23 de febreiro e non foi localizado pola Garda Civil. 

O tribunal requiriu á Comunidade Colexio María Auxiliadora Salesianos, que prestou o día 30 de abril de 2020 unha fianza de 12.000 euros para garantir a liberdade provisional do sacerdote, que, na súa condición de entidade fiadora, presente no prazo de dez días ao condenado ante a xustiza. 

• HEMEROTECA | Condenado a 32 anos e medio de prisión o salesiano dun colexio de Vigo que abusou de seis menores en 2019 

O CIS mantén o PSOE como primeira forza en estimación de voto en eleccións xerais co 32,7% dos sufraxios, 4,7 puntos por diante do PP. Na terceira posición sitúa en empate técnico a VOX e Unidas Podemos, con arredor do 10% nun inquérito no que o BNG obtén o 0,7% dos votos sobre o total estatal, dúas décimas máis que en 2019.

Adif adxudica a obra para soterrar peóns e vehículos en lugar do tren a Marín ao seu paso pola praza dos Praceres, en Pontevedra. O BOE publica a adxudicación, por 7,6 millóns de euros e ano e medio de duración.

• HEMEROTECA | Adif encarga a obra para legalizar o tren a Marín 20 anos despois do primeiro convoi que partiu en dous a praza dos Praceres
• HEMEROTECA | O tren a Marín gañou á veciñanza dos Praceres: tras 20 anos de riscos e sentenzas comezan as expropiacións para dous pasos inferiores