Fálase

O Goberno de España recoñece a ilegalidade do proceso xudicial simulado polos golpistas para asasinar a Alexandre Bóveda. O líder galeguista, protagonista nun novo acto de reparación ás persoas represaliadas polo franquismo no que tamén foi recoñecido Xosé Fortes, membro da Unión Militar Democrática (UMD) que se opuxo á ditadura. Na imaxe, Amalia Bóveda, filla do economista e dirixente político represaliado, recolle o recoñecemento de mans de Pedro Sánchez. 

• AMPLIAMOS 👉 O Goberno de España anula a sentenza simulada polos golpistas para asasinar a Alexandre Bóveda
• HEMEROTECA | O Día da Galiza Mártir gaña peso institucional con Bóveda como símbolo da democracia asasinada polos golpistas
• HEMEROTECA | "Non esquecer a barbarie para non repetir os erros": o Parlamento homenaxea á fin a Bóveda e as vítimas do franquismo

O mozo que atacou a Rajoy en 2015, condenado a cinco anos de prisión por "acceder á redacción de La Voz de Galicia" en Pontevedra e "tentar matar un xornalista" en xullo de 2023. A Audiencia Provincial pontevedresa considérao autor dun delito de asasinato en grao de tentativa, doutro de datos e dun máis de resistencia á autoridade. O tribunal aplica unha "eximente incompleta de alteración psíquica e atenuante de reparación do dano" e imponlle un "psiquiátrico adecuado aos seus padecementos en réxime pechado por un período que non poderá baixar de dous anos nin exceder de cinco e que deberá cumprirse antes que a pena de prisión imposta".

A Fundación Xistral lanza a campaña M8 por ler!  de promoción da literatura galega destacando que "somos unha terra de grandes historias". No vídeo, que lembra que só o 8% dos libros vendidos en Galicia están escritos en galego, participan Manuel Rivas, Borja Iglesias, Ledicia Costas, Xosé A. Touriñán, Elena Ferro, Fillas de Cassandra ou Andrea Maceiras

Persoal da CRTVG en folga volve impedir a emisión do programa O Termómetro na Televisión de Galicia e anuncia unha concentración na Praza do Toural para o venres 13 ás 12h, coincidindo co paro de 24 horas co que pretenden afectar á programación de todo o día da Radio Galega, da TVG e das canles dixitais do ente público. Ese mesmo venres debera emitirse o último dos 65 programas d'O Termómetro contratados pola dirección da Corporación ás produtoras Papaventos TV e Setemedia, símbolo da folga que xa vai pola décima semana. 

• Unha marcha en defensa da pluralidade dos medios públicos chama a cidadanía a "liberar a CRTVG"
• Os berros por unha CRTVG "pública e plural" escóitanse na UE

Opositores sirios declaran a súa vitoria sobre o réxime tras tomar o control da capital, tras trece anos de guerra. O presidente Bashar Al Asad abandona Damasco. Máis información en eldiario.es [📸 Unha nena carga leña para a súa familia en Ghouta oriental, en Siria © UNICEF / Al Shami]

Tres terremotos sentíronse en Lugo entre o serán do venres e a mañá deste sábado. O Instituto Xeográfico Nacional detectou un sismo arredor das sete e media da tarde do venres en Taboadela, outro preto da unha da madrugada en Triacastela e un terceiro sobre as nove e media da mañá deste sábado en Pedrafita do Cebreiro, que foi o de máis intensidade. 

O PSdeG reclámalle á Xunta que constitúa o Consello da Memoria Democrática de Galicia. O grupo parlamentario dos socialistas rexistra no Parlamento unha serie de iniciativas "para que o Goberno galego cumpra a Lei de Memoria Democrática e poña en marcha un órgano que facilitará a participación cidadá na defensa dos dereitos humanos e a recuperación da memoria". O secretario xeral do PSdeG, José Ramón Gómez Besteiro, visitou o Arquivo Militar Noroeste e reuniuse en Ferrol con representantes de entidades do eido da memoria histórica para analizar o impulso dese órgano. [📸 CC-BY-SA PSdeG]

• HEMEROTECA | Da anulación do xuízo a Bóveda á reparación do espolio económico franquista: os retos da Lei da Memoria Democrática 

O BNG celebra un a fundación do Partido Galeguista, o 6 de decembro de 1931, cun acto no Panteón de Galegos e Galegas Ilustres no que reivindicou o legado de Castelao, "do que nos sentimos herdeiros e herdeiras", salientou a portavoz nacional. "As nosas ideas teñen un obxectivo: construír a Galiza xusta e igualitaria, con futuro, que defendemos. Ese é o noso gran reto e, para iso, precisamos trasladar a nosa mensaxe con claridade como facía Castelao coa vaca alimentada por nós e muxida polos de sempre. Para cambiar as tornas e que sexamos nós as donas do que é noso", salientou Ana Pontón. [📸 CC-BY-SA BNG]

• HEMEROTECA (2021) | "Autonomía integral para rexer os intereses de Galicia": 90 anos da fundación do Partido Galeguista
• Pontón revalida liderado e albo estratéxico no BNG: "Non hai nada máis revolucionario que gobernar"

Activado o aviso laranxa por temporal costeiro nas provincias da Coruña e Lugo para este sábado. A Dirección Xeral de Emerxencias e Interior da Consellería de Presidencia informa de que permanecerá activa a alerta desde o mediodía do sábado por mar combinada do noroeste con ondas de ata seis metros, chegando ata os sete metros entre Ortegal e Bares, así como en torno a Bares e mar adentro. Actívase tamén unha alerta amarela no suroeste da Coruña e en todo o litoral pontevedrés polo temporal no mar. A Xunta lembra a importancia de manterse afastado da liña de costa e que se extremen as medidas de seguridade á hora de realizar calquera actividade no mar.

Nove semanas de folga indefinida nos medios de comunicación públicos do país. O persoal mobilizado da CRTVG volve parar este venres por vixésimo novena xornada na quenda da mañá para interromper a emisión do programa da TVG O Termómetro, símbolo da folga contra a externalización da produción de contidos informativos. No día no que se celebra a aprobación da Constitución española, o comité de folga fai un chamamento para que se respecten na Corporación os dereitos fundamentais que recoñece a Carta Magna. Lembran o xuízo gañado polo xornalista Carlos Jiménez, que viu vulnerado o seu dereito á liberdade de expresión e información, segundo foi ratificado polo TSXG, os expedientes disciplinarios que están en marcha por esta folga e mais unha presunta nova vulneración do dereito á folga por parte do ente público que está nos xulgados. [📸 Comité de folga CRTVG]

• O PP poderá remudar o director da CRTVG só cos seus votos na primeira metade de 2025
• Unha marcha en defensa da pluralidade dos medios públicos chama a cidadanía a "liberar a CRTVG"
• A xustiza volve ver indicios de que a CRTVG vulnera o dereito á folga do persoal na vixésima xornada de paros