Fálase

O BNG celebra un a fundación do Partido Galeguista, o 6 de decembro de 1931, cun acto no Panteón de Galegos e Galegas Ilustres no que reivindicou o legado de Castelao, "do que nos sentimos herdeiros e herdeiras", salientou a portavoz nacional. "As nosas ideas teñen un obxectivo: construír a Galiza xusta e igualitaria, con futuro, que defendemos. Ese é o noso gran reto e, para iso, precisamos trasladar a nosa mensaxe con claridade como facía Castelao coa vaca alimentada por nós e muxida polos de sempre. Para cambiar as tornas e que sexamos nós as donas do que é noso", salientou Ana Pontón. [📸 CC-BY-SA BNG]

• HEMEROTECA (2021) | "Autonomía integral para rexer os intereses de Galicia": 90 anos da fundación do Partido Galeguista
• Pontón revalida liderado e albo estratéxico no BNG: "Non hai nada máis revolucionario que gobernar"

Activado o aviso laranxa por temporal costeiro nas provincias da Coruña e Lugo para este sábado. A Dirección Xeral de Emerxencias e Interior da Consellería de Presidencia informa de que permanecerá activa a alerta desde o mediodía do sábado por mar combinada do noroeste con ondas de ata seis metros, chegando ata os sete metros entre Ortegal e Bares, así como en torno a Bares e mar adentro. Actívase tamén unha alerta amarela no suroeste da Coruña e en todo o litoral pontevedrés polo temporal no mar. A Xunta lembra a importancia de manterse afastado da liña de costa e que se extremen as medidas de seguridade á hora de realizar calquera actividade no mar.

Nove semanas de folga indefinida nos medios de comunicación públicos do país. O persoal mobilizado da CRTVG volve parar este venres por vixésimo novena xornada na quenda da mañá para interromper a emisión do programa da TVG O Termómetro, símbolo da folga contra a externalización da produción de contidos informativos. No día no que se celebra a aprobación da Constitución española, o comité de folga fai un chamamento para que se respecten na Corporación os dereitos fundamentais que recoñece a Carta Magna. Lembran o xuízo gañado polo xornalista Carlos Jiménez, que viu vulnerado o seu dereito á liberdade de expresión e información, segundo foi ratificado polo TSXG, os expedientes disciplinarios que están en marcha por esta folga e mais unha presunta nova vulneración do dereito á folga por parte do ente público que está nos xulgados. [📸 Comité de folga CRTVG]

• O PP poderá remudar o director da CRTVG só cos seus votos na primeira metade de 2025
• Unha marcha en defensa da pluralidade dos medios públicos chama a cidadanía a "liberar a CRTVG"
• A xustiza volve ver indicios de que a CRTVG vulnera o dereito á folga do persoal na vixésima xornada de paros

O persoal de Vitrasa acepta a proposta da empresa para renovar o convenio ata 2027.  O cadro de persoal do transporte urbano de Vigo celebrou este xoves unha asemblea onde votaron 175 persoas a favor da renovación (o 67%), 80 en contra, cinco foron votos nulos e tres en branco. O acordo contempla unha suba do 3,1% para 2024 e do 4% nos tres anos seguintes, entre outros aspectos. O visto e prace foi ratificado por CC.OO., UXT e USO, que suman 8 delegados, e rexeitado pola CIG, que ten 5 representantes. 

• HEMEROTECA |   A encrucillada de Vitrasa: entre a empatía e o fastío tras 100 días de folga no bus urbano de Vigo
• HEMEROTECA |  Cronoloxía do conflito de Vitrasa: dous anos de protestas no transporte urbano de Vigo

A Universidade de Santiago de Compostela abandona a red social X (antes Twitter) pola "deriva experimentada pola plataforma nos últimos meses" que, afirman, converteuna "nun espazo onde elementos democráticos esenciais coma os dereitos humanos son atacados de maneira constante e impune". A USC vén de anunciar esta decisión por acordo do Claustro "con 65 votos a favor, 15 en contra e 10 brancos", para deixar inactivos os seus perfís institucionais en X a causa da "xeración de contido tóxico conducente á desinformación que está a ser viralizado por algoritmos que deciden a que usuarios dan voz, así como a proliferación de bots que alimentan estas tendencias". [📸 © Santi Alvite / USC]

• REPORTAXE | Marchar ou ficar no que foi Twitter? "X non está libre de ideoloxía, ten unha propiedade e uns intereses" 

O Burela FS deixa de ser Pescados Rubén dúas décadas despois. "A situación actual do sector de transformación pesqueira levan a dirección da empresa a ceder o lugar privilexiado como patrocinador principal", explica o club burelao, que subliña non ter "palabras suficientes para agradecer á empresa a aposta polo club". O Burela, cuxos primeiros equipos feminino e masculino militan nas máximas categorías do fútbol sala, "envórcase na procura dun novo patrocinador principal que aposte polos valores do deporte e da igualdade". Nos últimos anos o Burela vén destacando polo seu amplo palmarés, especialmente do equipo feminino, pioneiro en ámbitos coma os dereitos laborais das súas xogadoras.

• O Burela fai cotián o extraordinario: hexacampioas
• A Mariña e Burela seguen presumindo de equipo feminino: once títulos consecutivos
• O Burela Fútbol Sala ultima o convenio colectivo das xogadoras con axudas á conciliación e á crianza

O conselleiro de Sanidade asegura que para incorporar ao Sergas os mutualistas de Muface precisaría "arredor de 40 médicos de familia máis para atender o incremento da demanda, tendo en conta que a ratio máxima recomendada é de 1.500 pacientes por médico". Antonio Gómez Caamaño advertiu no Parlamento que os mutualistas terán dificultades se pasan ao Sergas porque "o sistema sanitario privado non conta cunha historia clínica electrónica equiparable" á da sanidade pública. “É preciso coñecer os tratamentos que vén seguindo cada paciente, as intervencións ou probas ás que foi sometido, os tratamentos que ten pendentes, as alerxias a medicamentos ou as patoloxías previas", asegurou o conselleiro.

• Unha aposta e dous modelos sanitarios: a incerta continuidade de Muface afecta a máis de cen mil persoas en Galicia
• HEMEROTECA | O Sergas axiliza operacións e probas antes da campaña e penaliza os pacientes en lista de espera que escollen a pública

Xunta, Rexión Norte de Portugal e Concello do Porto reclaman "un calendario de investimentos e obras" para a liña ferroviaria de alta velocidade entre Vigo e a cidade portuense. Nun acto organizado polo Goberno galego, Rueda sinala que non é "aceptable" que "a conexión prioritaria sexa con Madrid mentres a Eurorrexión segue esperando". Este pasado luns o secretario de Estado de Transportes do Goberno de España, José Antonio Santano, asegurou ao alcalde de Vigo, Abel Caballero, que "o compromiso" do Executivo español é "ter lista" esta liña "no ano 2030". Na última cimeira ibérica Pedro Sánchez estimara a conexión galego-portuguesa para dous anos despois, en 2032, como esixira Rueda. [Imaxe: CC BY-SA Xunta]

• HEMEROTECA | Portugal prioriza o AVE Vigo-Porto e España sitúao dous anos despois do Madrid-Lisboa
• HEMEROTECA | Rueda dá por feito que o novo goberno conservador portugués terá o AVE ata o Miño en 2032 e esixe o mesmo a Madrid
• HEMEROTECA | Tren Porto-Vigo nunha hora en 2030: o novo plan de Portugal aínda "dependente de articulação com Espanha"

A folga na CRTVG interrompe a emisión d'O Termómetro na Televisión de Galicia en 28 dos 65 programas contratados. Unha nova xornada de paros impide a programación normal na TVG e concentra as traballadoras e traballadores ás portas da sede do ente público. No calendario desta folga indefinida teñen previsto parar as 24 horas o venres 13 de decembro, coincidindo co último programa d'O Termómetro contratado. [📸 CC-BY-SA Comité de folga da CRTVG]

• O PP poderá remudar o director da CRTVG só cos seus votos na primeira metade de 2025
• Unha marcha en defensa da pluralidade dos medios públicos chama a cidadanía a "liberar a CRTVG"
• Os berros por unha CRTVG "pública e plural" escóitanse na UE

Águeda Gómez, profesora de Socioloxía da Universidade de Vigo, no grupo científico que incorpora o Goberno de España para "reforzar o deseño das políticas públicas". Gómez dirixe a Cátedra Feminismos 4.0 da Uvigo e asesorará ao Ministerio de Igualdade, departamento ao que achegará o seu coñecemento en materias coma os nesgos de xénero na tecnoloxía, que abordou recentemente no volume colectivo Hackeamos o patriarcado. As súas investigacións abordan tamén "o sistema prostitucional e as fendas de xénero na academia". Este martes Pedro Sánchez recibiu na Moncloa as 22 persoas que compoñen este grupo de asesoría científica, cuxa composición íntegra se pode consultar nesta ligazón. [Imaxe: © Pool Moncloa/Fernando Calvo]

• 'Hackeamos o patriarcado': a proba de que os nesgos de xénero poden desaparecer da rede
• HEMEROTECA | Águeda Gómez: "O consumo masivo de prostitución en España é un síntoma de que algo está fallando"