Fálase

O Goberno alega “indefensión” ante a UE por cuestionar a prórroga da AP-9. O Goberno de España alegou "indefensión" ante o expediente infractor aberto pola Comisión Europea pola presunta infracción normativa na ampliación da concesión da AP-9, aprobada en 2000 polo goberno de José María Aznar, e sinalou que se vulnerou o principio de seguridade xurídica ao cuestionar unha decisión "máis de 20 anos despois" con base a unha xurisprudencia que non se pode aplicar neste caso. Así consta no informe remitido á Comisión, en resposta á segunda carta de emprazamento enviada a España, segundo informa Europa Press.

• Esta fin de semana remataría a peaxe da AP-9 se Aznar non a prorrogase ata 2048
• HEMEROTECA:  Os beneficios da AP-9 disparáronse un 70% no primeiro semestre, con 18 millóns en subvencións ás peaxes
• HEMEROTECA: A ilegalidade que a UE detecta na prórroga de Aznar a Audasa ata 2048 fai revivir a súa controvertida privatización

Convocada folga nas ITV galegas para o 6 de setembro. O persoal das ITV galegas acordou, en asemblea, convocar unha xornada de folga, tanto nas estacións fixas como nas móbiles, para o venres día, 6 de setembro. Nun comunicado, lamenta que non houbo contacto algún nin coa Xunta, nin coa concesionaria, SyCApplus, desde que iniciaron as protestas, o 10 de agosto. 

• Unha folga e un monopolio outorgado pola Xunta dificultan as ITV de vehículos en toda Galicia

O Goberno de España retira as medallas ao Mérito no Traballo ao expresidente de Novacaixagalicia Julio Fernández Gayoso e ao expresidente da Confederación Española de Organizacións Empresariais (CEOE) Gerardo Díaz Ferrán. Ambos foron condenados pola xustiza, con penas de cárcere. A medida foi impulsada polo Ministerio de Traballo e aprobada no Consello de Ministros deste martes. 

• HEMEROTECA (2022) | Feijóo recupera á conselleira da fusión das caixas para a cúpula económica do PP
• HEMEROTECA (2022) | Novacaixagalicia, caso pechado
• HEMEROTECA (2020) | Dez anos da fin de Caixanova e Caixa Galicia que precipitou o seu rescate con 9.000 millóns públicos
• HEMEROTECA (2013) | Vigo retíralle a Gayoso a medalla da cidade

Leonor de Borbón, herdeira da xefatura do Estado, ingresa este xoves na Escola Naval de Marín. Na imaxe, da Casa Real, durante a súa visita a Marín o pasado 16 de xullo na entrega de despachos.

• HEMEROTECA | Xohana Torres 'cóase' na xura da Constitución da princesa Leonor á que non asistiron seis grupos políticos
• HEMEROTECA | Máximo equilibrio en Galicia entre a poboación a prol dun referendo sobre a monarquía e a que non o ve preciso

Un sismo de intensidade 5,3 na escala de Richter séntese en todo Portugal. O tremor comezou pasadas as cinco da mañá (hora portuguesa) preto de  Sines pero chegou, con menor intensidade, ata o norte do país. Segundo o Instituto Português do Mar e da Atmosfera xa se contabilizaron tres réplicas. En Galicia, o sismo sentiuse en diferentes lugares das provincias de Pontevedra, Ourense e A Coruña. [Mapa de EMSC]

Na tarde deste domingo quedou extinguido na Gudiña un incendio de 75,73 hectáreas, o máis grande do que vai de verán en Galicia. No que vai de ano os incendios comunicados pola Xunta suman algo máis de 800 hectáreas.

• HEMEROTECA | As restricións informativas da Xunta fan imposible coñecer canto, cando e onde está a arder o monte

As fins de semana de agosto Praza.gal non se actualiza por descanso do persoal. Pero deixámosvos moito para lerdes e o luns estamos de volta.

O ministro de Transportes, Óscar Puente, di no Senado que o 80% dos trens Avril rexistraron atrasos no que vai de mes fronte ao 25% do resto de trens. Puente pide desculpas aos usuarios e defende que "nunca houbo en España un mellor servizo ferroviario". 

• HEMEROTECA | Atrasos na estrea do Avril: cando as demoras no Alvia acabaron reducindo a seguridade e ocorreu o accidente de Angrois
• HEMEROTECA | A estrea dos trens Avril inicia unha xeira de melloras ferroviarias que continuarán "xa" os Avlo de baixo custe

Nova incidencia dun tren Avril, o AVE Vigo-Madrid deste xoves, no cambiador de ancho de Taboadela, ás portas de Ourense, que bloquea á súa vez a circulación doutros trens. Renfe informa dun plan alternativo de transporte e confirma que se trata dun tren Talgo S106, por cuxos fallos a empresa pública pedirá compensacións a Talgo. 

• HEMEROTECA | Atrasos na estrea do Avril: cando as demoras no Alvia acabaron reducindo a seguridade e ocorreu o accidente de Angrois

Atopados os corpos dos dous guerrilleiros buscados en Visantoña, segundo vén de comunicar a Asociación para a Recuperación da Memoria Histórica. A busca de José Galán Núñez e Manuel Ramiro Souto, enterrados nunha foxa común en 1952, comezou este martes.

• Comeza en Visantoña, Mesía, a exhumación de dous guerrilleiros caídos en 1952