Fálase

Xunta e Deputación de Pontevedra asinan a compra do antigo Cine Fraga de Vigo a Abanca por 9,3 millóns de euros, dos que o 51% é achegado polo Goberno galego e o restante, pola institución provincial. O histórico edificio chegara a ser rehabilitado case por completo por Caixa Galicia un proxecto que ascendía a 16 millóns de euros, iniciado apenas dous anos antes da fusión con Caixanova. Este mesmo venres o Concello de Vigo aprobou en pleno pedir a Abanca a "cesión ou doazón gratuíta á cidade" e lamentou a "opacidade" da operación pechada pola Xunta.

• HEMEROTECA | A "vergoña" de Abanca: o cine Fraga esmorece, rehabilitado, no centro de Vigo

Riazor será un dos 11 estadios propostos pola Federación Española de Fútbol para acoller o Mundial 2030, segundo vén de confirmar a RFEF. Na lista finalmente non se atopa Balaídos, a pesar dos intentos realizados nas últimas semanas polo Goberno español para incluír a sede olívica. A Coruña será unha das cidades mundialistas, xunto con Madrid, Barcelona, Bilbao, Donostia, Zaragoza, Sevilla, Málaga e As Palmas de Gran Canaria. A proposta da RFEF inclúe tamén unha serie de subsedes, entre as que aparecen a Cidade Deportiva Afouteza e a Cidade Deportiva A Madroa (en Vigo).

A alcaldesa da Coruña anuncia a contratación "excepcional" dunha nova empresa de recollida do lixo mediante a declaración da emerxencia sanitaria se en 72 horas a cidade non está en "condicións óptimas de salubridade". "É imprescindible actuar con firmeza ante unha chantaxe", afirma Inés Rey, quen subliña que a folga impulsada polo STL non está centrada "nos dereitos dos traballadores". "O máis cómodo sería ceder, como se fixo os últimos 18 anos, retirar as sancións e volta a empezar", mantén a rexedora, quen reprocha "prácticas de carácter violento que poñen en risco á cidade" e manifesta "todo o apoio" ao persoal que "vive nun réxime de medo" por non secundar o STL.

• AMPLIAMOS 👉 A Coruña dá un prazo de 72 horas para a solución do conflito do lixo ou contratará de urxencia outra empresa de recollida
• HEMEROTECA | Subornos, conflito, chantaxe e medo: a "rede criminal" ligada ao sindicato maioritario na limpeza da Coruña

Un fallo global en Microsoft provocado pola plataforma de ciberseguridade Crowdstrike causa caídas en sistemas informáticos de institucións e empresas de todo o mundo ao impedir funcionar con normalidade ordenadores co sistema operativo Windows. Entre os afectados están centros de saúde do Sergas, cando menos no acceso ás historias clínicas electrónicas e Abanca tamén confirma fallos nos seus servizos tanto vía web como a través de aplicación. Tamén Aena, a xestora dos aeroportos españois, que informa de que está "desenvolvendo as operacións con sistemas manuais", o que pode provocar demoras. [Imaxe: CC BY-SA Clint Patterson/Unsplash]

Falece o actor Xabier Deive aos 54 anos. O pasamento vén de ser confirmado a través das redes sociais polo seu representante, Alejandro Albaiceta. "É inxusto, inesperado e moi doloroso polo inmenso vacío que deixa", resalta tras sinalar que marchou "como a estrela do rock and roll que era: discretamente". "Este -engade- era o seu estilo: non facer mais ruído do estritamente necesario. Deixar que o seu traballo e as súas personaxes falasen por el". Deive desenvolveu unha ampla traxectoria tanto no cinema como no teatro e na televisión. En 2014 conversamos con el nesta entrevista xunto a Luís Iglesia sobre o seu traballo e a situación da cultura galega. [Imaxe: © AAAG]

• OBITUARIO | Falece o actor Xabier Deive, "compañeiro querido e respectado"

O Parlamento Europeo reelixe a Ursula Von der Leyen como presidenta da Comisión Europea. A popular alemá obtivo unha cómoda maioría absoluta con 401 votos a prol fronte a 284 en contra, 15 abstencións e 7 nulos. Aínda que a votación é secreta, as grandes familias políticas da Eurocámara, populares e socialdemócratas, evidenciaron o seu apoio a Von der Leyen xunto aos liberais e parte do grupo dos Verdes. Entre os referentes galegos das forzas políticas, os populares Millán Mon e Vázquez Lázara votaron a prol, así como o socialista Nicolás González Casares, mentres que Ana Miranda, eurodeputada do BNG, votou "non". No seu discurso, a presidenta da Comisión avanzou medidas como un "plan europeo de vivenda" a prezos asumibles pola poboación ou un membro da nova Comisión dedicado especificamente á Pesca. [Imaxe: © Parlamento Europeo]

• HEMEROTECA | As tres grandes familias políticas da UE acordan o reparto de altos cargos sen os ultras 
• HEMEROTECA | Un Europarlamento con maioría da dereita e mais a extrema dereita no que a esquerda aguanta
• HEMEROTECA | O PP gaña pero Feijóo non esmaga, o PSOE resiste, o BNG sorrí

O Parlamento recibe ás nenas e nenos saharauís que pasan o verán en Galicia no marco do proxecto Vacacións en Paz da man da Asociación Solidariedade Galega co Pobo Saharauí (SOGAPS). O presidente da Cámara, Miguel Santalices, e membros de todos os grupos parlamentarios deron a benvida ás crianzas e ás familias que as acollen. O proxecto leva en marcha máis de tres décadas nas que chegaron a Galicia máis de 7.000 nenas e nenos.

• HEMEROTECA | 'Vacacións en paz' en Galicia para máis dun cento de nenas e nenos saharauís malia á convulsión política
• HEMEROTECA | O conflito recrúa no Sáhara: de gozar os veráns en Galicia a adestrarse para a guerra
• HEMEROTECA | "O pobo saharahuí non pode vivir da solidariedade, quere vivir dos recursos da súa propia terra"

O WOS Festival anuncia que non organizará a súa edición 2024. O evento compostelán, que comezou a celebrarse en 2014, toma "unha pausa" para "repensar" o formato e volver en 2025. Os responsables da cita explican que "nos últimos tempos o contexto no que se desenvolve o festival cambiou drasticamente. Os custos aumentaron considerablemente e os prazos de planificación reducíronse. Nestes condicións, resúltanos moito máis difícil que o proxecto teña a calidade que desexamos e que o noso público merece"

Abel Caballero convoca un pleno extraordinario en Vigo para pedir "a doazón" do antigo cine Fraga. O anuncio chega apenas dúas semanas despois de que Xunta e Deputación de Pontevedra acordasen a compra do histórico edificio a Abanca por 9,3 millóns de euros. A Xunta achegaría o 51% e o restante, a institución provincial. 

• HEMEROTECA | REPORTAXE -  A "vergoña" de Abanca: o cine Fraga esmorece, rehabilitado, no centro de Vigo

Constituído en Estrasburgo o Parlamento Europeo elixido nos comicios do pasado xuño. A primeira sesión reelixiu a popular Roberta Metsola como presidenta da Eurocámara para os primeiros dous anos e medio da lexislatura por unha ampla maioría absoluta (562 votos dos 623 emitidos). Neste pleno comezaron a exercer tamén os referentes galegos das diferentes formacións políticas. Os populares Millán Mon e Vázquez Lázara aseguran ter o propósito de "impoñer o sentidiño" na institución; o socialista Nicolás González Casares salienta o "compromiso de defender os asuntos que teñen que ver con Galicia" e Ana Miranda (BNG) prometeu "moito traballo" acompañada por Ana Pontón, que a sinala como "a embaixadora de Galiza en Europa para defender os intereses do país".

• Casares, Miranda e Mon xa son eurodeputados galegos da nova lexislatura
• O PP gaña pero Feijóo non esmaga, o PSOE resiste, o BNG sorrí
• ENTREVISTA | Casares: "O PP faille as beiras á ultradereita, en paralos vainos a vida do proxecto europeo e dos dereitos e liberdades"
• ENTREVISTA | Miranda: "Se Galiza tivo relevancia en Europa nestes anos foi por levar o BNG os temas galegos"