Fálase

Un fallo global en Microsoft provocado pola plataforma de ciberseguridade Crowdstrike causa caídas en sistemas informáticos de institucións e empresas de todo o mundo ao impedir funcionar con normalidade ordenadores co sistema operativo Windows. Entre os afectados están centros de saúde do Sergas, cando menos no acceso ás historias clínicas electrónicas e Abanca tamén confirma fallos nos seus servizos tanto vía web como a través de aplicación. Tamén Aena, a xestora dos aeroportos españois, que informa de que está "desenvolvendo as operacións con sistemas manuais", o que pode provocar demoras. [Imaxe: CC BY-SA Clint Patterson/Unsplash]

Falece o actor Xabier Deive aos 54 anos. O pasamento vén de ser confirmado a través das redes sociais polo seu representante, Alejandro Albaiceta. "É inxusto, inesperado e moi doloroso polo inmenso vacío que deixa", resalta tras sinalar que marchou "como a estrela do rock and roll que era: discretamente". "Este -engade- era o seu estilo: non facer mais ruído do estritamente necesario. Deixar que o seu traballo e as súas personaxes falasen por el". Deive desenvolveu unha ampla traxectoria tanto no cinema como no teatro e na televisión. En 2014 conversamos con el nesta entrevista xunto a Luís Iglesia sobre o seu traballo e a situación da cultura galega. [Imaxe: © AAAG]

• OBITUARIO | Falece o actor Xabier Deive, "compañeiro querido e respectado"

O Parlamento Europeo reelixe a Ursula Von der Leyen como presidenta da Comisión Europea. A popular alemá obtivo unha cómoda maioría absoluta con 401 votos a prol fronte a 284 en contra, 15 abstencións e 7 nulos. Aínda que a votación é secreta, as grandes familias políticas da Eurocámara, populares e socialdemócratas, evidenciaron o seu apoio a Von der Leyen xunto aos liberais e parte do grupo dos Verdes. Entre os referentes galegos das forzas políticas, os populares Millán Mon e Vázquez Lázara votaron a prol, así como o socialista Nicolás González Casares, mentres que Ana Miranda, eurodeputada do BNG, votou "non". No seu discurso, a presidenta da Comisión avanzou medidas como un "plan europeo de vivenda" a prezos asumibles pola poboación ou un membro da nova Comisión dedicado especificamente á Pesca. [Imaxe: © Parlamento Europeo]

• HEMEROTECA | As tres grandes familias políticas da UE acordan o reparto de altos cargos sen os ultras 
• HEMEROTECA | Un Europarlamento con maioría da dereita e mais a extrema dereita no que a esquerda aguanta
• HEMEROTECA | O PP gaña pero Feijóo non esmaga, o PSOE resiste, o BNG sorrí

O Parlamento recibe ás nenas e nenos saharauís que pasan o verán en Galicia no marco do proxecto Vacacións en Paz da man da Asociación Solidariedade Galega co Pobo Saharauí (SOGAPS). O presidente da Cámara, Miguel Santalices, e membros de todos os grupos parlamentarios deron a benvida ás crianzas e ás familias que as acollen. O proxecto leva en marcha máis de tres décadas nas que chegaron a Galicia máis de 7.000 nenas e nenos.

• HEMEROTECA | 'Vacacións en paz' en Galicia para máis dun cento de nenas e nenos saharauís malia á convulsión política
• HEMEROTECA | O conflito recrúa no Sáhara: de gozar os veráns en Galicia a adestrarse para a guerra
• HEMEROTECA | "O pobo saharahuí non pode vivir da solidariedade, quere vivir dos recursos da súa propia terra"

O WOS Festival anuncia que non organizará a súa edición 2024. O evento compostelán, que comezou a celebrarse en 2014, toma "unha pausa" para "repensar" o formato e volver en 2025. Os responsables da cita explican que "nos últimos tempos o contexto no que se desenvolve o festival cambiou drasticamente. Os custos aumentaron considerablemente e os prazos de planificación reducíronse. Nestes condicións, resúltanos moito máis difícil que o proxecto teña a calidade que desexamos e que o noso público merece"

Abel Caballero convoca un pleno extraordinario en Vigo para pedir "a doazón" do antigo cine Fraga. O anuncio chega apenas dúas semanas despois de que Xunta e Deputación de Pontevedra acordasen a compra do histórico edificio a Abanca por 9,3 millóns de euros. A Xunta achegaría o 51% e o restante, a institución provincial. 

• HEMEROTECA | REPORTAXE -  A "vergoña" de Abanca: o cine Fraga esmorece, rehabilitado, no centro de Vigo

Constituído en Estrasburgo o Parlamento Europeo elixido nos comicios do pasado xuño. A primeira sesión reelixiu a popular Roberta Metsola como presidenta da Eurocámara para os primeiros dous anos e medio da lexislatura por unha ampla maioría absoluta (562 votos dos 623 emitidos). Neste pleno comezaron a exercer tamén os referentes galegos das diferentes formacións políticas. Os populares Millán Mon e Vázquez Lázara aseguran ter o propósito de "impoñer o sentidiño" na institución; o socialista Nicolás González Casares salienta o "compromiso de defender os asuntos que teñen que ver con Galicia" e Ana Miranda (BNG) prometeu "moito traballo" acompañada por Ana Pontón, que a sinala como "a embaixadora de Galiza en Europa para defender os intereses do país".

• Casares, Miranda e Mon xa son eurodeputados galegos da nova lexislatura
• O PP gaña pero Feijóo non esmaga, o PSOE resiste, o BNG sorrí
• ENTREVISTA | Casares: "O PP faille as beiras á ultradereita, en paralos vainos a vida do proxecto europeo e dos dereitos e liberdades"
• ENTREVISTA | Miranda: "Se Galiza tivo relevancia en Europa nestes anos foi por levar o BNG os temas galegos"

Yolanda Díaz anuncia un acordo entre PSOE e Sumar "para a derrogación da Lei Mordaza", atinxindo a "todos os delitos vencellados ás liberdades públicas" ou "ás inxurias ao rei", exemplifica. A última tentativa para modificar esta lei decaeu no Congreso en marzo de 2023. Tamén, avanza a vicepresidenta segunda e ministra de Traballo, ambas forzas pactaron unha reforma da Lei de Publicidade Institucional para que quen "practicando pseudo xornalismo vulneren os códigos deontolóxicos" sexan "privados de financiamento público". Na imaxe, antidisturbios deteñen unha persoa ante o Parlamento en 2014 [CC BY-SA Praza.gal]

• Día da Liberdade de Prensa en Galicia: das eternas materias pendentes á lei europea que vén
• HEMEROTECA (2023) | O Colexio de Xornalistas critica que continúe en vigor a "perniciosa" Lei Mordaza, un "retroceso á liberdade de prensa"
• HEMEROTECA (2022) | Un policía multa un home coa 'lei mordaza' na Coruña porque os seus fillos de 2 e 4 anos xogaban na oficina do DNI
• HEMEROTECA (2015) | "O máis grave da nova lei de seguridade xa está conseguido: o medo"

O actor Luís Zahera pon rostro á recollida de sinaturas organizada por Greenpeace para rexeitar a implantación de Altri na Ulloa. A organización ecoloxista tenta chegar aos 250.000 apoios [Imaxe: © Greenpeace]

• 📺📸 Berro masivo contra Altri ás portas da Xunta
• HEMEROTECA | Os argumentos de Altri: Galicia é a "única rexión de Europa" na que se produce eucalipto "en exceso"

Confirmados cinco asasinatos machistas no Estado. A Delegación do Goberno de España contra a violencia machista manifesta que nos catro casos investigados esta fin de semana, máis nun crime que tivo lugar antes, as mulleres foron asasinadas polo feito de seren mulleres e deixan tres crianzas orfas de nai. Os feminicidios sucederon nas pronvincias de Zaragoza, Valencia, Madrid, Tarragona e Alicante. O Ministerio de Igualdade está a investigar un sexto asasinato en Barcelona. Segundo as cifras oficiais, son 26 as mulleres asasinadas este ano por violencia machista, 1.270 desde 2003. O número de menores de idade orfos a causa destes crimes ascente a 17 no que vai de 2024 e a 450 desde 2013. [Fotografía de arquivo CC-BY-NC-SA Gz Contrainfo]

• O Ministerio de Igualdade admite problemas de coordinación tras os últimos seis crimes machistas
• Vinte mulleres vítimas das violencias machistas ao día en Galicia e aínda sen xulgados específicos en todas as cidades