Morre Francisco García, que foi alcalde de Allariz polo BNG de 2000 a 2018. Nado en 1957, era concelleiro desde 1990 ata que en 2000 sucedeu a Anxo Quintana na alcaldía. Recuperamos a entrevista que lle fixemos cando cedeu o cargo en 2018 á súa compañeira Cristina Cid.
Fillas de Cassandra empezan a desvelar o que estiveron preparando para o seu novo álbum, Tertúlia, e presentan Saír á fresca, unha canción de celebración do camiño percorrido ata agora polo dúo vigués. Neste exercicio de Tertúlia que propoñen Sara Faro e María SOA as voces e o diálogo confúndense, apúranse, crúzanse, compártense. As voces berradas e cantadas toman a palabra e forman comunidade coa música e coas harmonías corais.
Saír á fresca vén acompañada dun videoclip dirixido polas propias Fillas de Cassandra, Santiago Iglesias e Sergio ‘Steel’, e rodado en Bouzas (Vigo) o pasado decembro coa participación das intérpretes Mireia Oriol, Cris Iglesias e Antonio Durán ‘Morris’, aos que vemos nunha parada de Vitrasa.
Unha tractorada corta de novo a A-52 á altura de Xinzo de Limia en contra do acordo entre a UE e o Mercosur. Gandeiros e agricultores exixen unha reunión co Ministerio de Agricultura, Pesca e Alimentación.
"Rueda reivindica a relación directa que existe entre os medios de comunicación e o Goberno galego", di a Xunta. "Na nosa comunidade todo é máis tranquilo e menos crispado", transmite o Goberno galego nun comunicado sobre a participación do presidente na entrega do premio Diego Bernal da Asociación de Periodistas de Galicia ao director de Atlántico Diario, Julio Rodríguez.
Feijóo promove unha comisión de investigación política no Senado sobre o accidente ferroviario de Adamuz tras negarse á mesma pescuda sobre o sinistro de Angrois. O daquela presidente da Xunta e do PPdeG impulsara o veto a esa investigación no Parlamento de Galicia e apoiou tamén as sucesivas negativas do seu partido no Congreso dos Deputados, onde os populares chegaran a descualificar como "miserable" e "absurda" unha petición que acabou sendo desbloqueada en 2017, tras mudar o PSOE a súa posición inicial ao respecto. A comisión celebrou todas as comparecencias previstas, pero tras concluír por mor das eleccións xerais de 2019, nunca chegou a retomar os traballos de redacción das conclusións. Na imaxe, Feijóo e Rajoy, coa daquela ministra Ana Pastor e outros cargos, visitando a contorna do accidente de Angrois en xullo de 2013 [© Pool Moncloa]
"Hoxé é un día normal de inverno". MeteoGalicia subliña que a borrasca Kristin "non afecta a Galicia", senón que atinxe ao "centro peninsular" e está a desprazarse cara ao leste cun temporal de vento, chuvia e neve. No noso país a xornada estará marcada polos chuvascos, "cota de neve en ascenso" -pero aínda con aviso amarelo na montaña de Lugo e gran parte da provincia de Ourense- e "ondas por riba dos 6 metros" no mar.
Os votos de PP, Vox e Junts derrogan o Real-Decreto que prorrogaba o 'escudo social' con medidas como a moratoria dos desafiuzamentos para persoas vulnerables e aplicaba a revalorización das pensións. Os populares e a formación catalá reclaman ao Goberno de Pedro Sánchez que volva someter a votación a suba das pensións, separándoa do resto de medidas. O pleno si convalidou o outro Real Decreto a debate, o relativo aos descontos no transporte. Na imaxe, o ministro Félix Bolaños defendendo as medidas durante o debate. [© Congreso]
A USC abriu este martes a campaña electoral para as eleccións á Reitoría do xoves 12 de febreiro. Por primeira vez na historia a institución terá unha muller á súa fronte, xa que as candidatas son as catedráticas de Estatística e Investigación Operativa, Rosa Crujeiras; de Óptica, Maite Flores; de Filoloxía Inglesa, María José López Couso; e de Dereito Administrativo, Alba Nogueira. Nos comicios tamén se elixirán os representantes no claustro universitario e nas xuntas de centro e nos consellos de departamento.
Dous deputados do PP resultan feridos nun accidente múltiple que ten cortada a AP-9 en sentido sur á altura de Ordes, co tráfico desviado pola estrada N-550. O presidente do Parlamento identifica a Gonzalo Trenor e Roberto Rodríguez como os feridos e sinala que outros deputados e deputadas doutras forzas tamén se ven afectados polas retencións, polo que muda a orde do día do Pleno. A colisión en cadea produciuse no quilómetro 52 da AP-9, ao seu paso por Oroso, implicou a 23 vehículos cun balance total de 4 persoas feridas, segundo o 112.
Pacto entre o Goberno de España e Podemos para a regularización extraordinaria de migrantes en situación administrativa irregular. Estímase que en torno a medio millón de persoas poden beneficiarse dunha medida que vai na liña da Iniciativa Lexislativa Popular (ILP) que o Congreso comezou a tramitar en 2024 por ampla maioría absoluta, pero que dende aquela permanece bloqueada. A ILP foi impulsada por entidades moi diversas, dende as que traballan con migrantes a organizacións feministas ou a Igrexa. Entre 1985 e 2005 os sucesivos gobernos de España aprobaron seis regularizacións extraordinariasi baixo os mandatos de González, Aznar e Zapatero. Na imaxe, entidades e forzas políticas que apoian a regularización, en 2024 ante o Congreso.
