Fálase

O Parlamento aproba definitivamente os Orzamentos da Xunta para 2026 cos votos do PP. As contas públicas do ano vindeiro manexan ata 15.967 millóns de euros, contando a débeda e outros gastos financeiros, o que supón un incremento medio próximo ao 4% en relación coas de 2025. Durante o debate final, o BNG lamentou o "non absoluto" ás súas 575 emendas parciais e a deputada Noa Presas pregunta ao PP "quen son os do non". O PSdeG, pola súa banda, subliña a través de José Ramón Gómez Besteiro que formulou "435 emendas, 3.606 nos últimos tres orzamentos" e "só aceptaron oito, catro por correccións de redacción". O PP salienta que os Orzamentos "quedan aprobados por 17º ano consecutivo en tempo e forma", aínda que en realidade é o trixésimo quinto exercicio seguido no que saen aprobados en prazo.

• INTERACTIVO | Vivenda e incendios, principais subas duns Orzamentos estancados en educación
• HEMEROTECA | Non só Rueda e Feijóo: 35 orzamentos galegos "en tempo e forma"

Retiran do mar e despezan unha balea de 21 metros e 30 toneladas que apareceu morta na costa da Coruña. Un importante dispositivo despregouse no peirao coruñés de Oza para erguer o cetáceo que aparecera morto fronte ao Portiño este pasado sábado. Imaxe da TVG. 

A débeda da Xunta pechou o terceiro trimestre do ano en 12.051 millóns de euros, o equivalente ao 14,2% do PIB galego. É un descenso superior a un punto e 800 millóns a respecto do trimestre previo e oito décimas e cen millóns menos que hai un ano, segundo os datos que vén de divulgar o Banco de España.

• HEMEROTECA | O Goberno de España ofrece asumir un terzo da débeda galega e Rueda retruca que "non soluciona nada"

A folga docente no ensino público comeza co peche en Verín de profesorado que impulsa a "creación dun movemento asembleario na provincia de Ourense", seguindo o exemplo do que se está a dar en Vigo, Costa da Morte ou Santiago. 26 docentes duns dez centros ourensáns reclaman melloras nas súas condicións, buscan implicar as familias nas protestas e non descartan unha "folga indefinida". Máis información, hoxe en Praza.gal. 

• Marchas fúnebres en 15 localidades na primeira das dúas xornadas de folga do profesorado

O Ministerio de Traballo pecha un acordo con CCOO e UGT para ampliar a dez días laborables os permisos por falecemento dun familiar. O pacto inclúe a posta en marcha de dous novos permisos para acompañamento de familiares en coidados paliativos e para acompañamento na eutanasia. 

Os sindicatos desconvocan a folga prevista para xaneiro polo estatuto marco tras chegar a un preacordo co Ministerio de Sanidade. CCOO, UGT, CIG, CSIF e SATSE suspenden o paro indefinido, protesta á marxe das folgas convocadas por CESM e O'Mega, que piden un estatuto marco propio para o persoal médico e provocaron a suspensión de case 1.100 cirurxías en catro días en Galicia. 

Rueda amosa o seu respecto polos "manifestantes que foron de boa fe" á protesta contra Altri pero di que "todo parece indicar que o apoio foi menor". "Nunca tomaremos ningunha decisión que non veña avalada polos técnicos", insiste o presidente.

• O rexeitamento a Altri segue alerta na rúa
• Altri aposta por Galicia como "fonte de madeira" coa fábrica de Palas estancada

Pedro Sánchez anuncia un "abono único de transportes" para todo o Estado por 60 euros ao mes para o conxunto da poboación adulta e 30 euros para menores de 26 anos. O novo abono, avanza o presidente do Goberno de España no seu balance de fin de ano, estará en marcha "na segunda quincena de xaneiro" e servirá, exemplifica, para trens de media distancia e de proximidade -destes últimos Galicia carece, pero o Ministersio de Transportes ten en marcha un estudo ao respecto- e mais autobuses estatais. A súa creación, concreta, chegará pola vía do Real Decreto-Lei, polo que para seguir vixente precisará do visto e prace do Congreso dos Deputados.

• HEMEROTECA | A Xunta nega ter competencia ferroviaria ante a posible implantación do tren de proximidade
• HEMEROTECA | Así entramos cada día nas cidades galegas: máis de 800 mil coches á espera da mellora do transporte metropolitano
• HEMEROTECA | Unha Galicia metropolitana e de proximidade: o 60% dos desprazamentos son de menos de 20 quilómetros

O Ministerio de Consumo sanciona con 64 millóns de euros a Airbnb por publicar anuncios de pisos turísticos sen licenza. A multa, explica o departamento que dirixe Pablo Bustinduy, "equivale a seis veces o beneficio ilícito obtido" pola empresa, que segundo a resolución tamén incorreu en condutas como publicidade enganosa. [Imaxe: Oberon Copeland]

• AMPLIAMOS 👉 Un de cada dez pisos turísticos polos que Consumo multou a Airbnb está en Galicia
• HEMEROTECA | Guía para denunciar pisos turísticos ilegais: acción directa no activismo galego pola vivenda
• HEMEROTECA | Máis da metade dos pisos turísticos galegos aínda non legalizaron a súa situación no Ministerio
• HEMEROTECA | Entra en vigor o rexistro obrigatorio de pisos turísticos, que en Galicia se duplicaron en tres anos
• HEMEROTECA | O rexistro de pisos turísticos da Xunta mantén máis de 600 en Santiago sen licenza municipal

O ultradereitista José Antonio Kast gaña as eleccións presidenciais en Chile con case o 60% dos votos fronte á candidata da coalición das esquerdas, Jeannette Jara. Kast, aberto defensor da ditadura de Pinochet, recibe os parabéns de líderes ultras internacionais e tamén do ex-presidente da Xunta e actual líder do PP, Alberto Núñez Feijóo, que o felicita pola "abrumadora vitoria" e agrega: "Os chilenos elixiron liberdade". Na imaxe, divulgada pola súa campaña, Kast nun mitin.

• HEMEROTECA (2021) | A esquerda de Boric gobernará Chile tras vencer ao aspirante da extrema dereita co 55% dos votos