Fálase

O PP volve cambiar de cabeza de cartel en Ourense e designa a concelleira Ana Méndez como candidata á alcaldía. Tras gobernar en 2015 co ex-conselleiro Jesús Vázquez, a quen sacrificaran como líder local en 2019 para pactar con Democracia Ourensana a cambio do apoio a Baltar na Deputación, en 2023 recuperaran o antigo rexedor Manuel Cabezas, que renunciou como edil pouco despois do segundo acordo dos populares con Gonzalo Pérez Jácome, de quen agora a secretaria xeral do PPdeG, Paula Prado, afirma que "só pensa no seu propio beneficio e no show". O PP presenta as súas candidaturas ás alcaldías de capitais provinciais de todo o Estado este sábado cun acto en Santiago encabezado por Feijóo. [Imaxe: PPdeG]

• HEMEROTECA | O acordo PP-PSdeG e a promesa de Rueda que romperon os populares para volver pactar con Jácome
• 🔊 HEMEROTECA | PODCAST - FÁLASE | Anatomía do de Ourense

O Ministerio de Traballo dá luz verde ao novo convenio estatal do téxtil logo de ser corrixido. O texto fora emendado por facilitar os contratos temporais e de substitución, entre outras eivas. O novo marco laboral, rexeitado masivamente en Galicia, onde non conta co apoio de CIG nin UGT, afecta unhas 35.000 persoas no país. Foto: CC-BY-NC-SA CIG. 

Un incendio en Boborás arrasa o castro de Xurenzás tras queimar unhas 20 hectáreas. O fogo, controlado desde esta mañá, iniciouse no mediodía do pasado xoves provocado, segundo parece, polos traballos de roza dun tractor. Imaxe: Brif Laza. 

Os concellos de Ribadavia e Carballeda de Avia inician negociacións para unha fusión municipal. Os alcaldes das dúas localidades confirman as conversas para conformar un único concello duns 6.000 habitantes, segundo conta La Región. Sería a terceira fusión en Galicia tras as de Oza Cesuras e Cerdedo Cotobade. Foto: CC-BY-SA Luis Miguel Bugallo Sánchez

• A Xunta poderá impoñer a anexión dun concello en crise por outro saneado que acepte
• Sete fusións de concellos: o informe que manexa a Xunta para reformular o mapa municipal

O Tribunal da UE avala a lei de Amnistía. Considera que a normativa non bate cos intereses financeiras da UE nin é contraria á directiva en materia de terrorismo. A sentenza non concede directamente a amnistía ás persoas afectadas pero si fixa unha interpretación do dereito europeo obrigatoria para os tribunais españois. O Tribunal de Cuentas e a Audiencia Nacional deberán reiniciar os procesos suspendidos e ditar as súas resolucións respectado o criterio de Luxemburgo.  Foto: Junts per Catalunya. 

• AMPLIAMOS 👉 O Tribunal da UE avala a amnistía

Extinguido o incendio que ardía dende o sábado en Ribas de Sil e que atinxiu a 190 hectáreas. Segundo Medio Rural, a extinción finalizou pasadas as 11 da pasada noite nun foco que, segundo transcendeu, tivo a súa orixe nun raio. Dende ese día a Xunta deu conta unicamente deste incendio e máis do que afectou a Vimianzo e Laxe, sen ofrecer datos dos demais que aconteceron en aplicación das restricións informativas que vén aplicando dende o verán de 2009. Na imaxe, traballos de extinción en Ribas de Sil [Brif Tabuyo]

• Incendios (cando menos) en Ribas de Sil, Laxe e Vimianzo

A Liga ACB ratifica en asemblea a admisión do Obradoiro e do Básquet Coruña tras cadanseus ascensos. Fica así certificado que na temporada 26-27 Galicia volverá vivir tres décadas despois o fito de contar con tres equipos na máxima categoría do baloncesto masculino, onde os conxuntos compostelán e coruñés acompañarán o Breogán. Tamén na Liga Feminina serán tres as representacións galegas ao unirse o Celta ao Ensino e o Uni Ferrol. [Imaxe: © ACB]

• HEMEROTECA | Baloncesto, capital: Galicia

O Congreso aproba a lei que obriga o Estado a achegar o 50% do gasto en atención á dependencia e convalida o Real Decreto que duplica as achegas á Xunta para atender as persoas atinxidas por esta norma. Ambas normas saíron adiante cos únicos votos en contra de Vox, se ben na reforma das leis de dependencia e discapacidade -que agora continúa trámite no Senado- o PP abstívose. Na imaxe, o ministro de Dereitos Sociais, Pablo Bustinduy, defendendo as reformas durante o pleno. [© Congreso]

• O pagamento do 50% da dependencia polo Estado, ás portas de pasar dun lema a unha obriga
• A reforma estatal da dependencia duplica os fondos para a Xunta

A Xunta presenta este mércores a proposta de novo Plan Xeral de Normalización da Lingua Galega. O coordinador dos grupos de traballo que o elaboraron, Manuel González, entregou este martes o documento ao conselleiro de Cultura, José López Campos, e ao secretario xeral da Lingua, Valentín García. Cultura pon o foco en que é resultado do traballo de "máis de 130 profesionais de recoñecido prestixio" e "máis de 1.400 achegas de entidades, institucións, asociacións e particulares". O máis destacado, hoxe en Praza.gal. [Imaxe: CC BY-SA Xunta]

• HEMEROTECA | O novo plan para o galego, ás portas e co ensino atado á ruptura de Feijóo
• HEMEROTECA | A lingua entre os datos e o pacto
• HEMEROTECA | Os nomes da Xunta para renovar o plan lingüístico apenas cumprido tras vinte anos

Extinguido o incendio que afectaba dende o pasado sábado a Laxe e Vimianzo cun balance final de 228,58 hectáreas ardidas, segundo Medio Rural. En Ribas de Sil o monte segue a arder, co incendio "estabilizado" nunhas 180 hectáreas. Na imaxe, o incendio da Costa da Morte agora extinguido, na noite do pasado sábado [© @LumesGal]

• Incendios (cando menos) en Ribas de Sil, Laxe e Vimianzo