O PSdeG pregunta á Comisión Europea polos "reiterados desleixos da Xunta no coidado de espazos naturais protexidos" ao fío do incendio na Zona de Especial Conservación do Courel, o maior na historia de Galicia dende que hai datos comparables, cunhas 11.000 hectáreas ardidas. O eurodeputado socialista galego Nicolás González Casares, quen lembra que o Executivo comunitario xa"abriu un expediente pola mala xestión da Rede Natura en Galicia".
A Xunta confirma que o custo de celebrar o xuízo polo accidente de Angrois no Gaiás suporá "case 1 millón de euros". O pasado xuño, o Goberno galego transferiu algo máis de 400.000 euros da partida de imprevistos á Fundación Cidade da Cultura para comezar a sufragar a encomenda de xestión para organizar o proceso. O xuízo, que comeza o 5 de outubro e está previsto que se prolongue arredor dun ano, desenvolverase nos dous andares do denominado Edificio CINC do complexo compostelán, segundo detallou este venres o vicepresidente Calvo.
Atopan na biblioteca do Centro Recreativo, Artístico e Cultural de Coruxo un exemplar do Romancero Gitano asinado polo propio Federico García Lorca cunha dedicatoria ao alumnado do Instituto de Vigo. A “xoia bibliográfica", como foi cualificada polo alcalde Abel Caballero, foi entregada ao Concello, que pasa a custodiala mentres se confirma a veracidade da sinatura. “A todas luces é a sinatura de Lorca”, destacou Caballero, que lembrou que o poeta visitou a cidade en 1933.
A cuarta dose da vacinación contra a COVID comezará a ser administrada o vindeiro 26 de setembro a persoas maiores de 80 anos e, por baixo desa franxa de idade, a quen vivan en residencias. Así o confirmou a ministra de Sanidade, Carolina Darias, que especifica que se trata de vacinas "adaptadas á variante ómicron". Este xoves o presidente da Xunta, Alfonso Rueda, ratificou que a Xunta está en disposición de iniciar esta nova campaña de vacinación na data acordada polo Estado. En anteriores campañas destinadas a maiores de 80, Galicia recibiu maior proporción de doses que outros territorios do Estado por contar con máis poboación nese rango de idade.
O Banco Central Europeo aumenta os tipos de xuro un 0,75%, ata o 1,25%, a maior suba da historia, nun intento de conter a elevada inflación. Espérase que antes de que remate o ano o BCE suban outras dúas veces, un movemento que pode incrementar o risco de levar a economía a unha recesión e prexudicar as persoas que teñan unha hipoteca variable, entre outros efectos.
O Festival do Teatro Galego (FETEGA) do Carballiño entrega este venres o Premio de Honra 'Dorotea Bárcena 2022' ao titiriteiro e actor Eduardo Rodríguez Cunha 'Tatán', que nos seus 39 anos de carreira "se converteu nun referente do teatro de obxectos en Galiza", fundador, entre outras de Tanxarina Teatro en 1983. Tatán recibiu o premio de Honra da última edición da Mostra Internacional de Teatro de Ribadavia
Naturgy vai facer descender o nivel das augas no encoro dos Peares dende o 9 de outubro "para realizar o mantemento do selo inferior das comportas da presa". Vén de facelo público a Deputación de Lugo, xa que o baleirado parcial do encoro a obriga a suspender as rutas en catamarán polo Miño dende esa data. A institución lucense agrega que contactará coas persoas que xa tivesen reservas "dende o 10 de outubro ata finais de ano", para "informalas da situación" e ofrecer "alternativas como adiantar a data da viaxe ou realizar a ruta polo Sil". Na imaxe, a vila dos Peares.
José Luis Baños de Cos gaña o V Premio Vidal Bolaño 2022 de textos teatrais con Lume. A obra aborda o tema das
diversas violencias sociais, como a homofobia ou a violencia de xénero.
O pleno da Deputación de Pontevedra aprobará este venres a restitución definitiva dos cadros (un díptico Mater Dolorosa e Ecce Homo) espoliados polos nazis en Polonia e que se atopan no Museo de Pontevedra. O proceso, iniciado no momento en que se tivo coñecemento da orixe dos cadros, demorouse máis do previsto ante a reclamación da obra non só por parte do Goberno polaco senón tamén pola familia que se considera propietaria lexítima.
A Coruña será a sede da cimeira hispano-alemá na que se reunirán Pedro Sánchez e o chanceler Olaf Scholz os vindeiros 5 e 6 de outubro. Así o confirmou o delegado do Goberno de España en Galicia, José Miñones, quen asegura que o Executivo leva "meses traballando no evento e ratificou a súa celebración" xunto na recente xuntanza de ambos mandatarios en Alemaña (na imaxe). En 2014 Galicia xa acollera outra cimeira hispano-alemá, daquela en Santiago e con Rajoy e Merkel como presidente e chanceler. [Foto: © Pool Moncloa/Borja Puig de la Bellacasa]
