Fálase

O Supremo confirma que o Pazo de Meirás é público e ratifica a expulsión dos Franco avalada pola Audiencia da Coruña, pero tamén a indemnización para os herdeiros do ditador. 

• AMPLIAMOS 👉 O Supremo ratifica que o Pazo de Meirás é público pero tamén que o Estado debe indemnizar os Franco
• HEMEROTECA | A Xustiza ratifica que Meirás é do Estado pero ordena indemnizar os Franco por permitirlles retelo durante décadas
• HEMEROTECA | O desleixo do Estado con Meirás en democracia permite que os Franco saian do Pazo cunha indemnización
• HEMEROTECA | O Estado dá marcha atrás e recorre para evitar pagar aos Franco polo Pazo de Meirás

Detidos dous homes por ameazar de morte e acosar en redes a Ione Belarra, secretaria xeral de Podemos. Un dos investigados envioulle máis de 300 mensaxes á deputada con contido aldraxante. Foto: © Congreso dos Deputados. 

As Tanxugueiras avisan da apertura da venda de entradas nos tendidos superiores do Coliseum da Coruña mentres se venden as "últimas nos tendidos medio e baixo" para o seu concerto do 17 de outubro, o único en Galicia este ano e no que presentarán o seu novo disco, O Cuarto. Mañá, xoves, o grupo publica o primeiro sinxelo do traballo, Chorar, chorei

• O plan das Tanxugueiras para o seu novo disco: volver facer historia no Coliseum da Coruña

A participación na segunta volta das eleccións ao Reitorado da Universidade de Santiago ás 12 do mediodía móvese entre o 49% no profesorado doutor con vinculación permanente e o 13% do estudantado. Votou tamén o 50% do persoal técnico, de xestión e de administración e servizos e o 28% do restante persoal docente e investigador. Os datos son oito puntos inferiores aos da primeira volta entre o profesorado doutor pero aumentan lixeiramente entre o estudantado.

A comunidade universitaria da USC escolle este mércores a súa nova reitora entre Rosa Crujeiras e Maite Flores. Na primeira volta, celebrada hai un mes, Crujeiras fíxose co 41% dos votos ponderados, fronte ao 21% de Flores. As votacións pecharanse ás seis da tarde, momento no que se coñecerá a gañadora. Os resultados finais da votación poderán consultarse nesta ligazón.

Francisco Jorquera non recuncará como candidato do BNG á alcaldía da Coruña. O veterano dirixente defende a necesidade de saber "pechar etapas" e aposta por "persoas novas e preparadas" que, di, o Bloque ten para "dar impulso" á cidade. "A política obviamente non a vou deixar, é moito máis que o labor institucional", resalta quen encabezou o cartel coruñés da formación nacionalista en 2019 e 2023. Previamente, Jorquera fora candidato á presidencia da Xunta en 2012, deputado no Congreso e senador, así como membro de organización históricas do nacionalismo coma ERGA. Na imaxe, o actual grupo municipal do BNG no Concello da Coruña.

Inditex gañou 6.220 millóns en 2025, un 6% máis que o ano anterior, superando por primeira vez a barreira dos 6.000 millóns de euros de beneficio neto. O grupo téxtil galego ingresou case 40.000 millóns, cun negocio online que lle supón máis do 26% do total. 

A Coruña medita renunciar a ser sede do Mundial de fútbol. A alcaldesa, Inés Rey, e o presidente do Deportivo, Juan Carlos Escotet, reuníronse este luns para tratar as opcións da cidade de acoller partidos mundialistas en 2030, unha posibilidade cada vez máis afastada, segundo conta DxT. O presidente da Federación Española de Fútbol, Rafael Louzán, non desbota a Vigo pero acusa a Abel Caballero de avivar o conflito para "intentar sacar algún rédito político". [Imaxe: © Concello da Coruña]

• AMPLIAMOS 👉 O Mundial afástase da Coruña, que medita renunciar a ser sede
• HEMEROTECA | A exclusión de Balaídos a última hora engade polémica á elección de sedes do Mundial

O TSXG rexeita autorizar á Xunta a realizar batidas de control de lobos en tres municipios ao non haber "probas técnicas suficientes" do incremento de ataques que argumentara a Consellería de Medio Ambiente. O tribunal prohíbeas en Cerdedo-Cotobade, Curtis e Ferrol porque "non se demostrou un cambio de circunstancias que xustifique a modificación das medidas cautelares xa adoptadas". 

• Medio Ambiente volve esaxerar o censo de lobos para xustificar que se poidan cazar
• O TSXG paraliza cautelarmente a posibilidade de cazar lobos para controlar a especie aberta pola Xunta
• A conselleira de Medio Ambiente relaciona lobos e incendios

O Goberno de España recupera as bolsas para que o alumnado universitario estude un curso noutra universidade do Estado, canceladas polo Executivo do PP de Rajoy en 2013. As desaparecidas bolsas Séneca serán dende o curso 26/27 as bolsas Medrano, estarán dotadas con 8.100 euros anuais (900 euros/mes durante o curso) e na súa primeira convocatoria prevén chegar a 2.300 estudantes. Pedro Sánchez destaca que o orzamento das novas bolsas é "un 80% maior" que o das antigas Séneca e, nun encontro con estudantes, afirma que "hai países que malgastan os cartos en guerras e nós preferimos investir en bolsas".

• HEMEROTECA (2013) | "Os estudantes non precisan caridade, precisan xustiza e igualdade de oportunidades"

O Concello de Santiago remite por segunda a petición de ser declarado zona tensionada polos prezos do alugueiro á Xunta, que a rexeitou o pasado ano. O goberno compostelán sinala que a documentación está "adaptada" ás "esixencias específicas" do Goberno galego aínda que "a primeira documentación xa estaba correcta", resalta o edil de Urbanismo, Iago Lestegás. Neste sentido, subliña, "a memoria xustificativa só utiliza datos oficiais que non se complementan con datos procedentes doutras fontes e describe un incremento do prezo medio do alugueiro en Santiago de Compostela do 40,26% entre 2019 e 2024, de acordo cos datos do Observatorio de Vivenda de Galicia". [Imaxe: © Concello de Santiago]

• HEMEROTECA | A Xunta rexeita a solicitude de Santiago para ser zona tensionada
• HEMEROTECA | A Coruña, primeiro municipio de Galicia en ser declarado zona residencial tensionada 
• HEMEROTECA | Así poden afectar as zonas tensionadas ao prezo dos alugueiros da Coruña e Santiago
• HEMEROTECA | A renda dos propietarios de pisos alugados xa duplica a dos inquilinos en Galicia