Fálase

A Organización Mundial da Saúde decreta a fin da emerxencia sanitaria internacional pola COVID-19 que declarara en xaneiro de 2020, dous meses antes de abordar o SARS-CoV-2 como unha pandemia. A OMS destaca que a decisión se basea en aspectos como a diminución de hospitalizacións e falecementos ligados á doenza e "os altos niveis de inmunización da poboación". Sinalan que fican "incertezas", pero que xa é o momento de abordar a pandemia do coronavirus con estratexias "a longo prazo". Na imaxe [© OMS], o director xeral da OMS, o doutor Tedros Adhanom.

• HEMEROTECA | Tres anos da chegada da COVID e da precariedade no seu seguimento
• HEMEROTECA | O impacto psicolóxico persiste aos tres anos da pandemia, que fixo medrar a concienciación sobre a saúde mental
• HEMEROTECA | As camas hospitalarias ocupadas en Galicia por pacientes ingresados a causa da COVID xa son menos do 1%

Os sindicatos CC.OO. e UGT pactan coas patronais CEOE e CEPYME unha suba dos salarios do 4% este ano e do 3% en 2024 e 2025. A ministra de Traballo, Yolanda Díaz, agradece "un acordo tan importante" que ve "destinado a protexer os salarios das persoas traballadoras". O acordo, adiantado pola Cadena SER, ten que ser agora ratificado polos órganos directivos das partes. Na imaxe, representantes das devanditas organizacións sindicais e empresariais, nunha imaxe de arquivo con Díaz.

• 1M | Subir soldos ante a perda adquisitiva da clase traballadora: Primeiro de Maio contra a inflación 
• 1M | | CC.OO. e UGT reclaman á patronal maiores subas de salarios para "un reparto xusto" ou "haberá conflito"
• 1M | A CIG chama a "intensificar" a mobilización ante "unha realidade económica e social extrema"

Falece Arsenio Iglesias, mito do Deportivo e do fútbol galego. O ex-futbolista e ex-adestrador arteixán morreu na Coruña aos 92 anos.

• OBITUARIO | Adeus a Arsenio, mito do deportivismo e do fútbol galego
• ‘SuperDépor, te quiero igual’: a fazaña deportivista xa ten o seu filme

Así soa Aire, o novo sinxelo das Tanxugueiras. O tema, producido por Lowlight, "fala de liberdade, de ser e de reinventarse. Unha viaxe a toda velocidade sen pensar moi ben nas consecuencias", explican. Cadrando co lanzamento da canción en todas as plataformas e mais do vídeo, realizado por Trece Amarillo, o grupo detalla as vindeiras datas da súa axenda de concertos en Guitiriz (4 de xuño), A Estrada (24 de xuño), Vimianzo (Asalto ao Castelo, 1 de xullo) ou Monforte (15 de agosto), ademais de múltiplas citas fóra de Galicia.

Persoal da CRTVG e representantes de colectivos sociais, sindicais e culturais volven mobilizarse ante a sede da Xunta en Compostela para reclamar "uns medios públicos ao servizo de todas as galegas". O comité intercentros ten convocadas dúas novas xornadas de folga en maio logo do éxito da último o pasado 25 de abril. 

• A CRTVG volve minimizar a folga e dá por "confirmado" o seu "carácter político"

A enxeñeira informática Verónica Bolón (Carballo, 1984) recibe o Premio Ada Byron polos seus traballos de investigación en intelixencia artificial sostible e a súa aposta polo fomento da vocación científico-tecnolóxica entre as nenas. O galardón que entrega o Colexio Profesional de Enxeñaría en Informática de Galicia (CPEIG) busca dar visibilidade ao traballo das mulleres na tecnoloxía

PARO REXISTRADO | As inscricións nas oficinas de emprego diminuíron en 2.504 en Galicia durante o mes de abril (-1,77% fronte ao -2,58% da media estatal) e quedaron en 139.343, o que supón 11.259 menos que un ano antes, unha caída do -7,48% lixeiramente inferior á media, do -7,75%. No mesmo mes, a afiliación media á Seguridade Social aumentou en 6.784 persoas (+0,65% e na media, +1,17%) e chega aos 1,05 millóns de cotizantes. Son 16.318 máis que en abril de 2022 (+1,58% e na media estatal, +2,98%). 

• AMPLIAMOS 👉 Galicia gaña estabilidade laboral: 6.300 contratos menos para case 7.000 empregos máis en abril

O Consello de Ministros autoriza a construción da nova estación intermodal de Lugo e aproba 21,6 millóns de euros para as obras, que terán un prazo de 16 meses. Trátase da última operación urbanística para xuntar bus e tren nas cidades galegas, desbloqueada de vez o pasado marzo. Segundo o convenio que rexe o proxecto, o Estado achega o 63% do custo total do proxecto a través do Adif (30,9 millóns), o 27,9% corresponde á Xunta (13,7 millóns) e o 9,5% restante son 4,7 millóns de euros que achega o Concello lucense.  Na imaxe [© Adif], recreación da nova estación.

• GALERÍA DE IMAXES | Recreación da nova estación intermodal de Lugo
• Desbloqueada en Lugo a última operación urbanística para xuntar bus e tren nas cidades galegas
• HEMEROTECA | Medio ano sen tren a cambio de que o tren si sexa unha alternativa entre Lugo e Ourense en 2024

Os boletíns provinciais publican este martes a relación definitiva de candidaturas para as eleccións locais do vindeiro 28 de maio. Nas cidades galegas a única novidade é a non proclamación da lista da Falange Española, formación que polo tanto non concorrerá ás eleccións en Galicia o vindeiro 28M.

• As opcións do 28M: o PP presenta listas en todos os concellos, o PSdeG faltará en 8 e o BNG, en 48

Feijóo promete a fiscais conservadores derrogar e reformular dun golpe diversas leis impulsadas polo Goberno do PSOE e UP se chega a gobernar en España. Segundo revela El País, esa promesa produciuse nunha cea celebrada o pasado 18 de abril con medio cento de representantes do Ministerio Público, algúns deles con relevantes cargos no Tribunal Supremo, que animaron o líder do PP a acometer esa contrarreforma se chega a ter maioría dabondo para facelo. Na imaxe, Feijóo e Rueda o pasado sábado, nun mitin do PP no Pino.

• HEMEROTECA | Todo é gravísimo (agás algunha cousa)
• HEMEROTECA | Feijóo executa contra PSOE e Podemos o manual de asedio que estreou fronte á coalición de esquerda na Xunta