Fálase

Dimite o director do Museo do Pobo Galego, Lois Ladra, tras trece meses no cargo. Dende a institución confirman a Praza.gal que foi o antropólogo e arqueólogo quen solicitou o seu cese "alegando a imposibilidade de implementar o programa de actuación presentado para o seu desenvolvemento, en canto non podía ser dotado dos recursos suficientes para levalo adiante". O Padroado do Museo do Pobo xa aceptou a súa saída, e ata a asemblea que celebren no mes de decembro a dirección queda temporalmente a cargo da Comisión Permanente do Consello de Goberno. [📸 Lois Ladra na inauguración dunha exposición no Museo do Pobo Galego este ano CC-BY-SA MPG]

• HEMEROTECA | Concha Losada, primeira presidenta do Museo do Pobo: "Estamos nun momento doce para o achegamento da xente nova á tradición"

Preacordo para descentralizar a carreira de Medicina. Reitores das universidades de Santiago, A Coruña e Vigo e mais a Xunta anuncian o bosquexo dun pacto que deixaría en suspenso os plans das institucións coruñesa e viguesa de implantar títulos de seu. Máis información, hoxe en Praza.gal. Na imaxe, a Facultade de Medicina da USC.

• AMPLIAMOS 👉 Preacordo para descentralizar Medicina: UDC e UVigo terán unidades docentes
• A UDC ofrece frear a demanda da carreira de Medicina se a Xunta a descentraliza en dous anos
• HEMEROTECA | "A novena titulación de Enfermaría na privada non causa o balbordo de ter a segunda de Medicina na pública"
• HEMEROTECA | A Xunta adscribe todos os hospitais do Sergas á USC en plena guerra por Medicina

Varios xornalistas, entre eles o galego José Precedo, adxunto á dirección de elDiario.es -na imaxe-, declaran no xuízo no Supremo contra o fiscal xeral do Estado que coñecían o correo coa confesión da presunta fraude do mozo de Ayuso antes que o propio Álvaro García Ortiz, acusado de filtralo. Imaxe do sinal institucional do Tribunal.

• HEMEROTECA | As raíces galegas no aborrecemento ao fiscal xeral polo PP

Feijóo defende que "debería estar tipificado" que "un político incremente un 40% a débeda pública" tras aumentar a galega un 176% nos seus anos na presidencia (de 4.282 a 11.823 millóns) en importe e un 133% (do 7,5% ao 17,5%) no seu peso sobre o PIB de Galicia, segundo os datos oficiais do Banco de España. "Marcha do Goberno e o que chega ten que pagar o que o outro non pagou", sostén o actual líder estatal do PP.

En 2026 os Orzamentos Xerais do Goberno galego prevén destinar 1.858,59 millóns a atender a débeda. É un 5,39% máis que o ano anterior.

• HEMEROTECA | Rueda alega que Galicia "non necesita" que o Estado lle pague 1 de cada 3 euros da débeda
• HEMEROTECA | Anatomía dos 18.000 millóns que a Xunta ten comprometidos goberne quen goberne

As dúas proposicións aprobadas polo pleno do Parlamento desta semana son, coma o 80% no que vai de ano, peticións ao Goberno de España. Ambas formuladas polo PP, reclaman o desbloqueo do traspaso da AP-9 e reformar a lexislación estatal en materia de refugallos. As presentadas por BNG (que reclamaban á Xunta máis prazas para o mestrado universitario de profesorado e unha "estratexia galega de adquisición pública de vivenda) e PSdeG (a prol de "políticas de xestión forestal adaptadas ao cambio climático" e sobre accións para "favorecer a remuda xeracional" nas explotacións agrogandeiras) foron rexeitadas.

• O 80% das proposicións aprobadas no pleno do Parlamento en 2025 son esixencias a Pedro Sánchez

CIG, UGT e CC.OO. proporán folga de autobuses na provincia da Coruña en decembro "en resposta á parálise na negociación do convenio colectivo" durante "cinco anos". As tres centrais sindicais dispóñense a trasladar a proposta ás asembleas de persoal e convocan unha primeira manifestación para o 10 de novembro dende a estación de autobuses coruñesa. Os sindicatos instan a Xunta a que, "como titular dos contratos de transporte, interveña e inste a patronal a unha negociación real" para "evitar a folga nun servizo público que cada día usan milleiros de persoas".

• HEMEROTECA | As concesións de bus reciben outros 17 millóns de axudas da Xunta pola "excepcional situación económica"
• HEMEROTECA | A Xunta atasca cos novos buses do Barbanza máis dun ano despois de anunciar a rescisión a Monbus

Zohran Mamdani gaña a alcaldía de Nova York con arredor do 50% dos votos definíndose como "socialista democrático" e cun programa baseado na accesibilidade da vivenda e a mellora dos servizos públicos. Imaxe divulgada pola súa campaña nas redes sociais.

BNG e PSdeG denuncian que o PP alíase coa extrema dereita para impedir o debate na UE sobre Altri ou a "manipulación informativa na TVG". Os eurodeputados Ana Miranda e Nicolás G. Casares denuncian que os populares "boicotean" estes debates na Comisión de Peticións. 

Tres empresarios residentes en Galicia, entre as cinco persoas máis ricas de España, segundo a última Lista Forbes. Amancio Ortega e a súa filla Sandra son as dúas máis ricas do Estado, mentres que Juan Carlos Escotet, presidente de Abanca, sitúase no quinto posto logo de que a súa fortuna se revalorizase en máis de 2.000 millóns de euros. 

O paro rexistrado sobe en Galicia en 300 persoas en outubro, mes no que se destruíron máis dun milleiro de empregos. O número de desempregados é de 113.386 segundo os datos publicados este martes polo Ministerio de Traballo e Economía Social.