O Parlamento aproba definitivamente os Orzamentos da Xunta para 2020 cos votos a prol do PP, que non aceptou ningunha das emendas da oposición que chegaron ao final do trámite parlamentario. Neste espazo repasamos as principais cifras das contas públicas para o derradeiro exercicio da lexislatura galega
Centos de transportistas e veciños das Pontes chegan á Coruña logo de varios días de camiño desde As Pontes reclamando unha "transición xusta" na vila, pendente do anunciado peche da central térmica de Endesa.
Pedro Sánchez comprométese con Feijóo a facer unha "xestión persoal" coa dirección internacional de Alcoa para trasladarlle o interese da empresa en España de seguir a operar en Galicia. Os presidentes dos gobernos galego e central falan por teléfono 15 minutos dentro da rolda de contactos para a investidura do socialista. Feijóo di non ter confianza en que Sánchez cumpra nin con Alcoa, nin co AVE e reclama os pagamentos estatais pendentes, cuestións que di que impiden avanzar na “distensión territorial” pola que aposta o socialista na nova lexislatura.
O asasino de Diana Quer, condenado a prisión permanente revisable e dez anos de liberdade vixiada. A sección sexta da Audiencia da Coruña, atendendo ao veredicto do xurado, impón estas condenas por "asasinato con aleivosía, cometido para ocultar outro delito e subseguinte a un delito contra a liberdade sexual da vítima" con atenuante de confesión, segundo confirman fontes do TSXG.
A Unión Astronómica Internacional dálle o nome de 'Rosalíadecastro' á estrela HD 149143 e 'Riosar' ao planeta que xira ao seu redor. A designación foi o resultado dunha convocatoria internacional na que cada Estado debía nomear unha estrela e un exoplaneta asociado. A Agrupación Astronómica Ío e a Fundación Rosalía de Castro levaron a cabo a campaña pública #EstrelaRosalía, que finalmente acadou o seu obxectivo. Consulta aquí toda a información
A Xunta asegura que "garante" a celebración de "10 actividades ao día" ligadas ao Xacobeo durante 2020 e 2021. Afirmouno Feijóo na presentación do primeiro "avance" da programación do Ano Santo, que podes descargar (.pdf) nesta ligazón. Segundo o presidente da Xunta, os vindeiros dous anos supoñen só "os primeiros 700 días dos 5.000 que temos por diante da década xacobea".
A asociación Xornalistas Galegas e Montse Dopico recollen o primeiro e o terceiro premio ‘Comunicar en Igualdade’ por senllas reportaxes publicadas en Praza.gal. O segundo premio foi para Sara Vila por unha reportaxe publicada no Diario de Pontevedra. Na categoría dedicada ao alumnado universitario as galardoadas foron Uxía Castro Martínez, Lucía Parrilla del Río e Silvia López López, por reportaxes publicadas en Sermos Galiza, Luzes e Lugo Xornal.
Ecocidio, feminicidio, narcosubmarino, negociación, quecemento global e sentidiño optan a ser Palabra do Ano 2019 no certame que organiza o Portal das Palabras da Real Academia Galega. A votación está aberta ata o 25 de decembro. En 2018 a gañadora fora deseucaliptización.
Mobilización contra o peche do paridoiro de Verín no Complexo Hospitalario Universitario de Ourense (CHUO). A Marcha Mundial das Mulleres convocou unha concentración na porta do hospital da capital provincial. Consulta aquí toda a información
Galegas 8M fixa a manifestacion nacional de 2020 en Galicia o 1 de marzo en Verín. "A loita en Verín polo peche do paridoiro representa a loita pola dignificación dos coidados, dos dereitos sexuais e reprodutivos, dos servizos públicos", di o colectivo.
