O Sergas cifra no 5% o seguimento da segunda xornada de folga na atención primaria mentres profesionais médicos e sindicatos insisten en que a Consellería de Sanidade "manipula" os datos e elevan o apoio aos paros. O conselleiro, Antonio Gómez Caamaño, non aclara como cuantifica o seu departamento as cifras. "Os datos son os que achegan as áreas sanitarias a través dos departamentos de recursos humanos; a cifra é a que é, non entendo a discrepancia", asegurou.
O dono de Sargadelos volve ordenar o peche da fábrica de Cervo logo dunha inspección. Segismundo García pide á Xunta que a expropie. O Goberno galego di que "cumpriu o seu compromiso" coa empresa e insta a dirección a "reiniciar a actividade canto antes en defensa dos dereitos dos traballadores".
Falece aos 72 anos o pintor José Freixanes, considerado un dos autores máis destacados da vangarda plástica galega. A súa obra é parte de coleccións de institucións tan destacadas coma o Centro Galego de Arte Contemporánea o Museo Reina Sofía, o Museo de Arte Contemporánea de Madrid ou o Museo de Arte Contemporánea do País Vasco, entre outras. A súa derradeira exposición desenvolveuse na galería compostelá Trinta en 2023. [Imaxe: © José Luiz Oubiña, facilitada pola familia por cortesía do Diario de Pontevedra]
Jácome limita o acceso de fotoxornalistas aos 5 primeiros minutos de cada pleno do Concello de Ourense. O alcalde ourensán e líder de DO esgrime que "a gota que colmou o vaso" foi que un fotógrafo de La Región o "enfocou durante 30 minutos" e agrega que "saberse enfocado permanentemente afecta ao subsconsciente" e "produce estrés". O rexedor realiza este anuncio tras cargar contra o fotoxornalista no transcurso do propio pleno, o que lle valeu reproches de PSdeG e BNG, así como do Colexio Profesional de Xornalistas de Galicia e da Asociación Profesional de Fotoxornalistas de Galicia, entre outros.
🟣25N Milleiros de persoas rexeitan a violencia machista nas mobilizacións convocadas polo movemento feminista nas principais vilas e cidades do país. Na imaxe, a manifestación de Vigo [CC BY-NC-SA BNG].
SIMEGA desconvoca a folga na Atención Primaria horas antes do seu inicio, como tamén fixeron este luns CCOO, UGT e CSIF. En cambio, O'Mega mantén a convocatoria tras a reunión mantida co Sergas, como tamén fai a CIG e varias asembleas de profesionais.
O Tribunal de Xustiza da UE sentencia que todos os Estados membros están obrigados a recoñecer o matrimonio entre persoas do mesmo sexo contraído legalmente en calquera punto da Unión. Nun ditame sobre o caso dunha parella polaca que reclamaba que o seu país recoñecese o seu matrimonio, contraído en Alemaña, o TXUE dá a razón aos demandantes e matiza que "esta obriga non implica que deba introducirse o matrimonio entre persoas do mesmo sexo no Dereito interno" dos países que aínda non o fan. Pedro Sánchez aplaude a sentenza como un "si, quero, que cruza o continente". "Fronte ao odio, amor e liberdade", agrega o presidente do Goberno de España. [Imaxe: CC-BY-SA Rob Maxwell / Unsplash]
O Goberno de España propón que a nova fiscal xeral do Estado sexa Teresa Peramato, especializada na loita contra a violencia machista e con 35 anos de carreira. Este martes o Consello de Ministros inicia o proceso para nomeala como substituta de Álvaro García Ortiz, que renunciou ao cargo xusto despois de que o Supremo o condenase a inhabilitación por revelación de segredos no caso do mozo de Ayuso. Na imaxe, Peramato tomando posesión como fiscal de Sala Xefa da Sección Penal da Fiscalía do Tribunal Supremo, o pasado febreiro [© Fiscalía Xeral do Estado]
CC.OO., CSIF e UGT desconvocan a folga en Atención Primaria, que mantén a CIG-Saúde dende mañá, 26, ata o venres 28. Tras unha prolongada xuntanza con Sanidade, os devanditos tres sindicatos consideran que o Sergas "acepta a totalidade" das súas demandas en materia "económica, organizativa e laboral". Previsiblemente, ao longo deste martes pronunciaranse os colectivos médicos que tamén veñen apoiando o paro.
Cecilia F. Santomé (Vilalba, 1984) gaña o Premio de Novela Blanco-Amor coa obra Boundaries Road SW12 8HD, que narra a historia de Cilla, unha tradutora galega de 30 anos emigrada en Londres que aluga unha habitación na casa dunha parella acomodada. O galardón da 44ª edición do certame será entregado o vindeiro 5 de decembro nunha gala literaria no Centro Cultural Marcos Valcárcel de Ourense.
