Morre con 88 anos Francisco Puy, membro da Comisión dos 16 que en 1979 elaborou un Estatuto de Autonomía despois recortado pero que serviu de base para o finalmente aprobado. Puy, doutor en Dereito e catedrático da USC, era pai de Pedro Puy Fraga, agora deputado do PP no Congreso e durante a última década portavoz no Parlamento de Galicia, e estaba casado cunha irmá de Manuel Fraga. [Imaxes: Parlamento de Galicia e Real Academia Galega de Xurisprudencia].
Ence e Xunta anuncian un novo reparto de 3 millóns de euros en subvencións da empresa a entidades de Pontevedra. As axudas forman parte do acordo que Ence asinou co Goberno galego cando Rajoy ampliou a súa concesión na ría, pero a Xunta vén evitando fiscalizar o seu cumprimento. [Imaxe: Ence]
Luis Yang gaña o I Premio Autobán ao Mellor Fanzine Galego 2023-2024 coa súa obra ‘Sunny 16’. O xurado decidiu outorgarlle un accésit con diploma a Gemma Pérez pola súa obra ‘Mi nick era #humeda’. Na rolda final de clasificados foron tamén seleccionados os fanzines ‘Macheta 7’, da Asociación Artístico-cultural Huhú e Asociación Teixo; ‘Así somos’, de Raquel Montero; e ‘sólo una vez más’, de Aisha Rey
Pedro Sánchez querélase contra o xuíz Peinado por prevaricación. A decisión chega na xornada en que o maxistrado que investiga á súa esposa, Begoña Gómez, acudiu ao Palacio de La Moncloa a tomarlle declaración como testemuña, acto no que o presidente do Goberno de España se acolleu ao seu dereito a non declarar e no que Peinado estivo acompañado por avogados das persoas investigadas no caso e mais dunha avogada de Vox no rol de coordinadora das partes que comparecen como acusacións populares. [Imaxe: CC-BY-NC-ND Eugenia Morago / PSOE]
O xuíz Peinado acode á Moncloa a interrogar como testemuña a Pedro Sánchez, que se acolle ao seu dereito a non declarar. O maxistrado citou o presidente do Goberno de España no marco do caso que segue contra a súa esposa, Begoña Gómez, orixinado nunha denuncia da organización ultra Manos Limpias. Tras rexeitar a petición de Sánchez de usar o suposto legal de declarar por escrito, Peinado foi á sede da presidencia do Goberno acompañado das defensa das tres persoas investigadas no caso e mais dunha avogada de Vox no rol de coordinadora das partes que comparecen como acusacións populares. [Na imaxe, de arquivo, Sánchez nas instalacións do Palacio de La Moncloa [© Pool Moncloa / Borja Puig de la Bellacasa]
ERC anuncia un preacordo para investir o socialista Salvador Illa como novo presidente da Generalitat catalá. A formación republicana asegura que ese pacto, que dependerá en última instancia dunha votación da súa militancia, inclúe competencias para que o Goberno catalán recade "o 100% dos impostos" xerados no seu territorio, entre outras mudanzas que, admiten, precisarían dunha reforma da lei que rexe o modelo de financiamento das comunidades autónomas, caducado dende 2014. Na imaxe, dirixentes de ERC anunciando o preacordo o pasado serán.
Alberto Ramos gaña o 19º Premio Abrente de textos teatrais da Mostra Internacional de Teatro de Ribadavia co texto Os servizos prestados. O xurado destaca a obra "polo seu interese social, con posibilidade de xerar debate arredor da explotación e da autoexplotación laboral e o risco que conleva de perda de dereitos da clase traballadora conquistados historicamente". O premio do público da MIT foi para Iribarne, de ButacaZero. [Imaxe: © Sabela Iglesias]
A Asociación Pro-Fundación Manoel Vello celebra a súa primeira xornada sobre o uso do galego nas contornas dixital, laboral e radiofónica. A 1ª Xornada Manoel Vello, dedicada ao galeguista finado en decembro do ano 2022, terá lugar o venres 2 de agosto na Casa de Cornes, en Santiago de Compostela,
Primeira valoración da Xunta sobre sentenza do accidente de Angrois: a preguntas da prensa tras o Consello, Rueda "celebra" que "houbese unha sentenza" tras once anos e asegura que se "alegra" se "as vítimas e as súas familias se senten reparadas". En calquera caso, o presidente considera que "unha vez que hai unha sentenza, sempre hai xustiza" aínda que "poida gustar máis ou menos". [Imaxe: CC BY-SA Mónica Arcay Carro / Xunta]
A Deputación da Coruña ofrece acollida a persoas refuxiadas da guerra de Malí na residencia do IES Rosalía Mera -na imaxe, un dos seus cuartos-, que ata hai pouco acolleu refuxiados da guerra de Ucraína e nos anos 90 do século pasado fora refuxio de poboación desprazada polo conflito bélico na antiga Iugoslavia. O presidente da institución provincial, Valentín González Formoso, ratifica o ofrecemento de 44 prazas nunha xuntanza co delegado do Goberno de España en Galicia: "Tócanos estar á altura das circunstancias e seguir exercendo o espírito ante a grave crise humanitaria que están a vivir", sinala. O Estado prevé a chegada de arredor de medio milleiro de persoas procedentes de Malí a Galicia. [Imaxe: Deputación da Coruña]
