A Plataforma para a defensa da sanidade do Carballiño convocou este domingo unha manifestación na vila para reclamar a restitución das consultas de Pediatría no seu centro de saúde. Esta mobilización para que o Sergas non deixe a esta comarca sen atención especializada para as crianzas súmase a outras na provincia, como as dos últimos días en Xinzo e Verín. [Fotografía CC-BY-SA PSdeG de Ourense]
Besteiro avanza que o PSdeG vaise "sumar e apoiar" a manifestación pola crise dos 'pellets' do 21 de xaneiro en Santiago baixo o lema En defensa do noso mar "xunto cos pescadores, mariscadoras, biólogos, ecoloxistas e voluntarios". O candidato socialista á Presidencia da Xunta defendeu este domingo na praia de Portocubelo, en Lira, unha Galicia "limpa da contaminación das mentiras" que –dixo– están a impoñer "a Xunta, o PP e o presidente Rueda".
Ana Pontón e Martiño Noriega asinan este domingo un acordo de BNG e Anova para as eleccións do 18F. As eleccións chegan xusto 12 anos despois da asemblea de Amio que dividiu o nacionalismo. Na imaxe, do BNG no 40 aniversario da formación, Xosé Manuel Beiras e Ana Pontón.
Paula Alvarellos, actual voceira do Goberno local e concelleira de Sostibilidade Urbana e Recursos Internos, será a nova alcaldesa de Lugo, en substitución de Lara Méndez, número 2 da lista do PSdeG pola provincia lucense ás eleccións do 18F. O Grupo Municipal do Partido Socialista anunciou a decisión esta tarde e Alvarellos (terceira pola esquerda na imaxe) será investida alcaldesa o vindeiro xoves nun pleno extraordinario
Un cento de persoas convocadas polo Concello de Ribeira e Greenpeace limpan pellets nas praias de Balieiros e As Barreiras, preto do cabo Corrubedo, o lugar onde chegaron os primeiros sacos de plásticos o 13 de decembro. Este longo areal forma parte da Zona de Especial Conservación Complexo Húmido de Corrubedo, na Rede Natura 2000.
A asociación Dereito a Morrer Dignamente concéntrase en Santiago polo Día da Morte Digna en Galicia, na data do aniversario da morte de Ramón Sampedro. Dende hai xá 26 anos este é un día sinalado na reivindicación da liberdade das persoas e na defensa do seus dereitos, tamén na etapa final das súas vidas. Este colectivo solicitou no Parlamento un recoñecemento oficial desta data ao considerar que "contribuirá ao progreso na atención e coidado ás persoas na etapa final da súa vida, ao respecto á súa autonomía e liberdade, e ao progreso da morte digna".
Lara Méndez formaliza a súa renuncia como alcaldesa de Lugo para concorrer ás eleccións galegas como número dous da lista lucense do PSdeG, que encabeza José Ramón Gómez Besteiro. No seu derradeiro pleno como rexedora, Méndez subliñou que mantén o "compromiso de seguir traballando por e para Lugo" dende as súas novas responsabilidades. Á espera da elección da nova alcaldía, posto para o que se perfila a concelleira socialista Paula Alvarellos, o bastón de mando fica provisionalmente nas mans de Rubén Arroxo (BNG), primeiro tenente da Alcaldía. [Imaxe: Concello de Lugo]
O Salario Mínimo Interprofesional subirá ata 1.134 euros mensuais en catorce pagas, 54 máis que actualmente. O Ministerio de Traballo acorda cos sindicatos CC.OO. e UGT esa alza dun mínimo do 5% mentres a patronal CEOE se desmarca.
Suráfrica presenta a súa acusación contra Israel na Corte Internacional de Xustiza acusándoo de manter "un patrón de conduta xenocida" en Gaza con "asasinatos en masa". Este venres é a quenda das autoridades israelís para responderen os argumentos expostos polo Goberno surafricano. Nesta ligazón pódese consultar íntegra a acusación de Suráfrica no tribuna da Haia. Na imaxe [© UN Photo/ICJ-CIJ/Frank van Beek. Courtesy of the ICJ], un intre da sesión.
Principio de acordo entre sindicatos e Vitrasa para desconvocar a folga do transporte urbano de Vigo. O preacordo acadado este xoves inclúe subas salariais ou a retirada das sancións pola folga do Marisquiño, segundo informou o comité de empresa nun comunicado. Os traballadores decidirán en asemblea durante este venres se ratifican a proposta.
