Fálase

O Concello de Vigo reitera cun concerto de centos de membros de corais da cidade a reclamación de construír unha nova liña de alta velocidade cara á Meseta por Cerdedo para non ter que "dar unha volta de cen quilómetros por Santiago", expresa o alcalde, Abel Caballero. "O Goberno de España ten que acelerar a tramitación e os que nos deixaron sen AVE, pedirlle perdón a esta cidade", reclamou o rexedor no acto. [Imaxe: Concello de Vigo]

• HEMEROTECA | O AVE a Vigo por Cerdedo que os políticos rexeitan só en privado demórase outros 3 anos
• HEMEROTECA | Avril, ancho UIC, Cerdedo, Taboadela, Corredor Atlántico: de que se fala cando se mira máis alá do AVE
• HEMEROTECA | UGT renuncia ao AVE por Cerdedo que nacera dunha proposta súa hai dúas décadas e pide unha nova liña polo Miño

Un ex-alto mando da Policía, o lucense Germán Rodríguez Castiñeira, confirma na Audiencia Nacional que recibiu a petición de rastrexar deputados de Podemos e as súas confluencias elixidos en 2016, segundo informa elDiario.es. Castiñeira, xa xubilado, asegura que se negou a realizar esas buscas. Nas procuras en bases de datos policiais durante o Goberno de Rajoy denunciadas por esta formación figuraban catro deputados de En Marea. Na imaxe, Castiñeira en 2017 co daquela ministro do Interior do PP, Juan Ignacio Zoido. [© Ministerio do Interior]

• HEMEROTECA | Catro deputados de En Marea figuran nos rastrexos policiais sobre Podemos durante o Goberno de Rajoy

Oitava semana de folga indefinida na CRTVG coa vista posta na manifestación do sábado, 30 de novembro, en Santiago. O persoal mobilizado da TVG e da Radio Galega volveu parar por vixésimo segunda xornada, impedindo unha vez máis a emisión do programa O Termómetro. As representantes das traballadoras dos medios públicos volverán esta semana ao Parlamento europeo para trasladar as súas reivindicacións e intentar "poñer en coñecemento das parlamentarias e das institucións os incumprimentos das leis comunitarias nas que incorre a CRTVG". [📸 Comité Intercentros]

• A xustiza volve ver indicios de que a CRTVG vulnera o dereito á folga do persoal na vixésima xornada de paros
• "Novo chanzo represivo" nos medios públicos: o comité de folga denuncia que a CRTVG abre expedientes "por falta moi grave"
• HEMEROTECA | O PP emprega as críticas ao bipartito como escudo para bloquear no Parlamento europeo a denuncia de manipulación na CRTVG

Pedro Sánchez confirma a designación de Sara Aagesen como vicepresidenta terceira do Goberno de España e ministra de Transición ecolóxica e reto demográfico, da que salienta o seu "rigor, profesionalidade e coñecemento experto". Aagesen formaba parte do equipo de Teresa Ribera como secretaria de Estado de Enerxía e é membro do consello asesor da ONU para o medioambiente e o desenvolvemento industrial. No Goberno de España encargouse da coordinación e definición do plan nacional integrado de enerxía e clima 2021-2030 e da estratexia de descarbonización a longo prazo (2050).

CRÓNICA | Gaña Ribera, perde Weber e Feijóo queda só: dez días de ruído en Bruxelas que non moveron nada

O Frente Amplio volve ao Goberno no Uruguai con Yamandú Orsi á fronte. O candidato da esquerda imponse na segunda volta electoral co 49,8% dos votos, segundo o escrutinio xa finalizado. "Volverá a alegría para a maioría" di a formación do novo presidente, quen se compromete a ser "o presidente do crecemento nacional, dun país que avance". [Imaxe: Frente Amplio]

• HEMEROTECA | Uruguai: A década da Fronte Ampla (2005-2015)

O xurado popular do Caso Samuel acada un veredicto. Será lido este domingo ás 13 horas, confirma o Tribunal Superior de Xustiza de Galicia. A acusación sinala os cinco encausados por asasinato.

• AMPLIAMOS 👉 Catro dos cinco axuizados por matar a Samuel Luiz, culpables do asasinato
• O clamor de xustiza para Samuel, nas mans dun xurado popular tres anos despois

Sumar Galicia constitúese ratificando por unanimidade a Verónica Martínez Barbero como presidenta e a Paulo Carlos López como secretario xeral. O primeiro obxectivo do partido, sinala López, é "implantar o proxecto de país" definido nos documentos políticos abordados na asemblea da formación, celebrada este sábado en Santiago e clausurada coa presenza de Yolanda Díaz. Na imaxe, o acto de clausura coa militancia participante na asemblea e delegacións convidadas.

Emerxencias amplía a alerta laranxa por temporal costeiro a todo o litoral das provincias da Coruña e Pontevedra e activa outra por vento de ata 100 km/h "no oeste e suroeste da Coruña". Para este domingo, agrega a Xunta, "actívase tamén unha alerta amarela por chuvias en diferentes áreas da Coruña e de Pontevedra". O 112 subliña "a importancia de afastarse de diques, rompentes e paseos marítimos", así como "retirar os obxectos que poidan caer á rúa desde os tellados, balcóns e fiestras, e evitar pasar preto de edificios en ruínas ou en construción, de árbores, de paneis publicitarios e de obxectos susceptibles de desprazarse con vento". A información actualizada das alertas pódese seguir no sitio web da Axencia Galega de Emerxencias e o detalle meteorolóxico, nos avisos de MeteoGalicia.

• DOCUMENTO | Alerta laranxa por fenómenos costeiros
• DOCUMENTO | Alerta amarela por chuvias e vento

Diversas vilas e cidades acollen os actos de izado da bandeira galega en conmemoración da I Asambleia Nazonalista que as Irmandades da Fala celebraron en Lugo en 1918, dando lugar ao primeiro programa político nacional para Galicia. A acción é promovida un ano máis pola plataforma Vía Galega, que destaca que chegou "máis de 170 localidades con actos en 56 concellos". Nas imaxes, os izados da bandeira en Santiago e Lugo -cidades nas que participaron cadansúas alcaldesas e outros membros dos gobernos municipais- e mais en Vigo. [Imaxes: Concello de Santiago | Concello de Lugo | Vía Galega]

• HEMEROTECA | "Terra, a nosa!": cen anos do primeiro programa político nacional para Galicia
• HEMEROTECA | "Co corazón ateigado de esperanza, autonomía integral para Galicia"
• HEMEROTECA | Cen anos do día en que o Concello da Coruña foi a primeira institución que izou a bandeira galega

Xosé Vizoso será homenaxeado no Día da Ilustración 2025. O artista mindoniense foi deseñador principal de Sargadelos ao carón de Isaac Díaz Pardo e como cartelista leva décadas poñendo imaxe a algunhas das principais festas populares do país, a comezar polas San Lucas da súa vila. O de 2025 será así o primeiro Día da Ilustración que homenaxea un autor en vida. A Consellería de Cultura, que organiza a conmemoración canda a Asociación Galega de Profesionais da Ilustración cada 30 de xaneiro cadrando co nacemento de Castelao, confirmou a elección este sábado. Na imaxe, diversos carteis festivos deseñados por Vizoso.

• HEMEROTECA | Xosé Vizoso, unha vida a ilustrar as festas (e a alma) do país