Fálase

Xabier Deive recibe a título póstumo o Premio de Honra Marisa Soto da Asociación de Actores e Actrices. "Con este galardón -explica a AAAG- distínguese a traxectoria do desaparecido actor ao tempo que se celebra a súa dimensión humana e o gran cariño que sentía e segue a sentir tanto a profesión escénica como o público polo intérprete". A asociación entrega este premio honorífico no marco dos seus galardóns anuais, os María Casares. "A AAAG non concibe a concesión deste galardón como unha despedida nin como un epílogo, senón como unha celebración plena e agarimosa da figura de Xabier Deive", falecido en xullo de 2024. Será "un festexo colectivo da persoa, do intérprete e do compañeiro", agregan. [Imaxe: © AAAG]

• HEMEROTECA | Falece o actor Xabier Deive, "compañeiro querido e respectado"
• ‘O dragón de ouro’ e ‘Iribarne’ encabezan as finalistas aos María Casares

Israel rompe a tregua en Gaza e mata máis de 300 persoas. O goberno de Netanyahu retoma a guerra total mentres aumentan as súas crises internas. Na imaxe, vivendas destruídas en Gaza por anteriores ataques israelís [© UNRWA] 

• HEMEROTECA | "Hai ferramentas para deter violacións de dereitos. Fíxose con Rusia e non vexo por que non se podería facer con Israel"
• HEMEROTECA | Israel sela un alto o fogo con Hamás tras desatar un inferno en Oriente Medio con máis de 46.000 vítimas

O DOG publica a nova lei dos medios públicos e inicia o contador para a súa entrada en vigor. En vinte días comezan a correr os prazos que terán como primeiros fitos o cambio de nome da actual CRTVG e a activación do proceso para remudar a dirección xeral, substitución que en virtude do novo texto só precisa os votos do PP. Pola mesma vía cumprirá elixir outra volta o consello de administración.

• O que vén na CRTVG: da fin do nome histórico á nova dirección só cos votos do PP

Folga nas residencias privadas da terceira idade e nos centros de día. A CIG confirma a convocatoria da mobilización para os días 10 e 22 de abril e mais o 7 e 21 e maio en demanda do "convenio digno" ao que "se nega a patronal". "Unhas 8.000 das 12.000 persoas ocupadas neste sector están por baixo do salario mínimo", subliña o sindicato, que sacará a protesta á rúa cunha manifestación o 26 de abril en Santiago na que tamén procurarán facer ver a situación de "falta de persoal e sobrecarga de trabalo". "Son condicións de escravitude", afirman as traballadoras. [Imaxe: CC BY-NC-SA CIG]

• HEMEROTECA | A falta de persoal nos centros de maiores: residentes mal atendidos e traballadoras "ao límite"
• HEMEROTECA | Máis da metade das prazas de residencias de maiores en Galicia teñen xestión con ánimo de lucro
• HEMEROTECA | O TSXG acredita que residencias privadas de maiores incumprían o descanso do persoal previsto no convenio

O derbi galego da ACB entre o Básquet Coruña e o Río Breogán finaliza con vitoria lucense por 98-106 tras un intenso encontro seguido ao vivo por 9.236 persoas no Coliseum da Coruña nun clima de irmandade entre afeccións, que principiaron o partido entoando ao unísono o himno galego. O conxunto breoganista chegou a dispor dunha vantaxe de 27 puntos e o equipo coruñés estivo a piques de culminar a remonta, achegándose a só catro puntos pouco antes do remate do encontro. [Imaxe: Concello da Coruña] 

Altri non! As vilas da bacía do Ulla protestan este domingo contra o proxecto da celulosa. A Plataforma Ulloa Viva convoca a veciñanza da bacía do Ulla a sair ás prazas das súas vilas ás 12 horas deste domingo "para berrar alto e claro Altri Non!" O colectivo anunciou que “exercitará todas as medidas administrativas e xudiciais en contra das resolucións que autoricen o proxecto Altri”. Tamén en Pontevedra a APDR convoca unha concentración ao mediodía na Praza da Peregrina.

[Na imaxe: concentración no Pico Sacro, este sábado]

• Luz verde ambiental da Xunta a Altri
• As cifras de Altri: dos 75 metros de cheminea aos 46 millóns de litros diarios de auga

Aberto o prazo de matrícula para as escolas infantís públicas autonómicas. As familias poden solicitar unha das máis de 10.500 prazas ofertadas ata o vindeiro 4 de abril, segundo publicou este venres o DOG

•  HEMEROTECA | A precariedade "histórica" nas escolas infantís da Xunta

Víctor Freixanes remata a súa etapa como presidente da Real Academia Galega tras oito anos á fronte da institución.  Polo de agora ocupará interinamente a presidencia a secretaria, Margarita Ledo Andión, a quen lle corresponde poñer en marcha o proceso electoral. Os estatutos da Academia establecen un período non superior a tres mes para a elección da nova comisión executiva.

[Imaxe: xuntanza do Plenario celebrada na tarde deste venres no pazo de María Pita]

• HEMEROTECA |  Víctor Freixanes: "Oxalá a Academia puidese facer a política lingüística"
•  A RAG alerta de que o galego está preto do "limiar do colapso" con menos de 35.000 falantes entre 5 e 14 anos

Os socialistas de Lugo convocan congreso provincial o 10 de maio. O calendario aprobado establece que o proceso congresual comezará coa presentación de precandidaturas ás primarias entre os días 24 e 28 de marzo, seguido do período de recollida de avais ata o 7 de abril. A primeira volta das primarias para elixir a Secretaría Xeral Provincial terá lugar o 27 de abril. 

[Imaxe: Reunión do Comité Provincial do PSdeG de Lugo]

• O PSdeG sae do seu XV Congreso Nacional coa convicción de ser "a alternativa" pola esquerda en Galicia
• HEMEROTECA | O PSdeG perde cinco escanos e asina o peor resultado da historia nunhas autonómicas

CDU, SPD e Verdes chegan a un acordo para unha modificación da Constitución alemá que permita un maior endebedamento para poder incrementar o gasto militar e en Defensa. Os Verdes uníronse ao acordo tras ofrecerlles Friedrich Merz un fondo para o clima de 100.000 millóns de euros.