Fálase

O derbi galego da ACB entre o Básquet Coruña e o Río Breogán finaliza con vitoria lucense por 98-106 tras un intenso encontro seguido ao vivo por 9.236 persoas no Coliseum da Coruña nun clima de irmandade entre afeccións, que principiaron o partido entoando ao unísono o himno galego. O conxunto breoganista chegou a dispor dunha vantaxe de 27 puntos e o equipo coruñés estivo a piques de culminar a remonta, achegándose a só catro puntos pouco antes do remate do encontro. [Imaxe: Concello da Coruña] 

Altri non! As vilas da bacía do Ulla protestan este domingo contra o proxecto da celulosa. A Plataforma Ulloa Viva convoca a veciñanza da bacía do Ulla a sair ás prazas das súas vilas ás 12 horas deste domingo "para berrar alto e claro Altri Non!" O colectivo anunciou que “exercitará todas as medidas administrativas e xudiciais en contra das resolucións que autoricen o proxecto Altri”. Tamén en Pontevedra a APDR convoca unha concentración ao mediodía na Praza da Peregrina.

[Na imaxe: concentración no Pico Sacro, este sábado]

• Luz verde ambiental da Xunta a Altri
• As cifras de Altri: dos 75 metros de cheminea aos 46 millóns de litros diarios de auga

Aberto o prazo de matrícula para as escolas infantís públicas autonómicas. As familias poden solicitar unha das máis de 10.500 prazas ofertadas ata o vindeiro 4 de abril, segundo publicou este venres o DOG

•  HEMEROTECA | A precariedade "histórica" nas escolas infantís da Xunta

Víctor Freixanes remata a súa etapa como presidente da Real Academia Galega tras oito anos á fronte da institución.  Polo de agora ocupará interinamente a presidencia a secretaria, Margarita Ledo Andión, a quen lle corresponde poñer en marcha o proceso electoral. Os estatutos da Academia establecen un período non superior a tres mes para a elección da nova comisión executiva.

[Imaxe: xuntanza do Plenario celebrada na tarde deste venres no pazo de María Pita]

• HEMEROTECA |  Víctor Freixanes: "Oxalá a Academia puidese facer a política lingüística"
•  A RAG alerta de que o galego está preto do "limiar do colapso" con menos de 35.000 falantes entre 5 e 14 anos

Os socialistas de Lugo convocan congreso provincial o 10 de maio. O calendario aprobado establece que o proceso congresual comezará coa presentación de precandidaturas ás primarias entre os días 24 e 28 de marzo, seguido do período de recollida de avais ata o 7 de abril. A primeira volta das primarias para elixir a Secretaría Xeral Provincial terá lugar o 27 de abril. 

[Imaxe: Reunión do Comité Provincial do PSdeG de Lugo]

• O PSdeG sae do seu XV Congreso Nacional coa convicción de ser "a alternativa" pola esquerda en Galicia
• HEMEROTECA | O PSdeG perde cinco escanos e asina o peor resultado da historia nunhas autonómicas

CDU, SPD e Verdes chegan a un acordo para unha modificación da Constitución alemá que permita un maior endebedamento para poder incrementar o gasto militar e en Defensa. Os Verdes uníronse ao acordo tras ofrecerlles Friedrich Merz un fondo para o clima de 100.000 millóns de euros.

Luz verde ambiental da Xunta a Altri. A Consellería de Medio Ambiente aproba a declaración de impacto ambiental da celulosa, unicamente supeditada a varias condicións adicionais e un "programa de vixilancia ambiental". 

• AMPLIAMOS 👉 Luz verde ambiental da Xunta a Altri
• HEMEROTECA | Un escudo público-privado abeira á Xunta para non amosar o acordo con Altri
• HEMEROTECA | A Xunta prepara o camiño para Altri con eloxios das súas autorizacións ambientais tras varias anuladas pola xustiza

Portugal anticipa as eleccións ao 18 de maio, a terceira cita coas urnas para a elección da Assembleia da República en catro anos. O presidente da República, Marcelo Rebelo de Sousa, dirixiuse este xoves á cidadanía para avanzar uns comicios "que ninguén quería", pero resultaron inevitables ao estar en dúbida a "ética" do Primeiro Ministro. O presidente portugués instou a todos os partidos, e á sociedade no seu conxunto, a un debate electoral "claro, directo, esclarecedor, pero sereno, digno, elevado, tolerante, respectuoso coa diferenza e o pluralismo. Que fortaleza e non debilite a democracia, e que non abra aínda máis a porta a experiencias que se sabe como empezan e como acaban".

• Portugal encamíñase ás terceiras eleccións en tres anos tras perder Montenegro a moción de confianza

A Xunta convoca mañá unha comparecencia da conselleiras de Medio Ambiente e Economía para "informar sobre a tramitación de proxectos estratéxicos para a Comunidade". Será ás 10 da mañá cando falen ante os medios Ángeles Vázquez e María Jesús Lorenzana. 

O presidente de RTVE confirma á Mesa pola Normalización Lingüística que este ano "haberá un aumento de contidos en galego en TVE e comezarán as emisións en galego" na canle infantil Clan. José Pablo López, como xa avanzara o pasado xaneiro, reafirmou a a Marcos Maceira e Celia Armas en representación da entidade galega que "tamén se incrementará a presenza da nosa lingua nos contidos radiofónicos do ente estatal", sinalan. A Mesa ve estes avances como froito da "mobilización e da iniciativa popular Xabarín", para a que logrou o apoio do Parlamento en 2021. Na imaxe, a xuntanza coa Mesa na sede de RTVE, este mércores. [Imaxe: A Mesa]

• HEMEROTECA | Menos do 5% da programación televisiva infantil emítese en galego 
• HEMEROTECA | "O do Xabarín non é nostalxia, é cabreo. É moita a xente que di: 'de rapaz tiven unha oportunidade que hoxe os meus fillos non teñen'"
• HEMEROTECA | Máis da metade da audiencia dos medios de comunicación reclama máis contido en galego