Fálase

28M - ENQUISA | O PSdeG podería continuar gobernando en Vilalba catro anos despois da histórica mudanza no Concello da vila, segundo unha enquisa que publica este luns o xornal El Progreso. Atendendo ao inquérito, a socialista Elba Veleiro mantería a alcaldía como candidata da forza máis votada e con 7 ou 8 edís (actualmente ten 8) seguida polo PP, con 6 ou 7 (ten 7). Para aspirar á maioría na corporación, o PSdeG precisaría o apoio de Vilalba Aberta, que oscila entre 2 e 3 edís (ten 2) ou dun BNG que podería regresar á corporación cun concelleiro.

• A Galicia vilega ante o 28M: o PP busca recuperar o poder municipal perdido nuns concellos que viraron á esquerda
• HEMEROTECA | Elba Veleiro: "A maioría absoluta do PP en Vilalba nos últimos 40 anos viña enlazada ás mesmas familias que os 40 anos anteriores da ditadura"

28M | A CRTVG comeza a emitir hoxe, luns, os seus debates das eleccións municipais coas candidaturas das sete cidades. O primeiro é o de Vigo e, como todos os demais, é emitido ás 10 da mañá pola TVG, a Radio Galega e o sitio web da corporación e ofrecido en redifusión pola segunda canle da Televisión de Galicia ás 22h45. Na imaxe, un debate organizado pola CRTVG previo ás municipais de 2019 con candidatos e candidatas de Lugo, igualmente ás 10 da mañá.

La Voz de Galicia publica este domingo unha nova entrega da súa sondaxe electoral para as cidades galegas, sen grandes cambios en relación ás anteriores. O PSdeG mantería as alcaldías de Vigo, A Coruña, Lugo e Santiago e o BNG a de Pontevedra. O PP podería facerse co Goberno local de Ferrol por un só edil e, ademais, converteríase na forza máis votada en Ourense, pero necesitaría apoios para chegar ao poder, cun escenario moi igualado entre populares, socialistas e Democracia Ourensana.

Este sábado abriu as portas en Allariz a décimo terceira edición do Festival Internacional de Xardíns baixo o tema central de “A volta ao mundo en once xardíns”

• Unha ducia de xardíns galegos para recibir a primavera

Os xulgados de Ourense confirman a recepción de dúas denuncias de Jácome por revelación de segredos pola publicación dos seus audios, divulgados nos últimos días no xornal La Región. Fontes do TSXG ratifican que ambas se atopan "pendentes de incoar" e que o alcalde de Ourense e aspirante á reelección por DO actúa "contra un medio de prensa escrita". Unha foi formulada o pasado día 8 e a outra, este mesmo venres.

• Jácome declárase vítima dunha "mafia" de empresas "xonquis de cartos públicos" cos audios que a Fiscalía xa investiga
• Baltar logra adiar o seu xuízo rápido por ir no coche oficial a 215 km/h e Jácome denuncia que o espían

CRISE DE PREZOS| O incremento interanual dos prezos sitúa o IPC no 4,1% en Galicia, que iguala o dato estatal por primeira vez dende o inicio da actual crise de prezos. O custo dos alimentos, acouga lixeiramente o seu incremento, pero aínda seguen sendo un 12,7% máis caros, de media, que hai un ano (unha décima por baixo da media estatal). Este dato permite que o dato da inflación subxacente (a que non ten en conta o dato dos alimentos frescos e os prezos da enerxía) diminúa por primeira vez dende o pasado setembro e quede, na media estatal, no 6,6%. 

• AMPLIAMOS 👉 O prezo dos alimentos modera a súa suba mentres a inflación xeral repunta ata o 4,1%

Persoal da CRTVG principia a nova xornada de folga manifestándose ante Rueda no acto de apertura da campaña do 28M do PP en Santiago. Xunto ao novo día de paro, cadrando co inicio da campaña, os medios públicos afrontan tamén varias demandas xudiciais por "traslados forzosos" e "represalias" ao persoal. O máis destacado do día de folga na CRTVG, hoxe en Praza.gal. [Imaxe: CIG CRTVG]

• A CRTVG afronta outra folga e varias demandas xudiciais por "traslados forzosos" e "represalias" ao persoal
• Todas as asociacións de prensa do Estado, agás a da Coruña, esixen á CRTVG que "cumpra" xa a lei de medios

Rueda informa de que Baltar finalmente compareceu este xoves no seu xuízo por delito contra a seguridade viaria e di que “é bo e procedía”. Fontes do Tribunal Superior de Xustiza de Castilla y León informaran inicialmente de que Baltar non acudira e de que o xulgado fixaría unha nova data “reservándose a posibilidade de impoñer as sancións que correspondan”. Máis información, hoxe en Praza.gal

• AMPLIAMOS 👉 Baltar logra non ser xulgado ata despois das eleccións por delito contra a seguridade viaria por ir a 215 km/h

Baltar esquiva por terceira vez o xuízo rápido por delito contra a seguridade viaria e o xulgado da Pobra de Seabra advírteo de posibles sancións. Fontes do Tribunal Superior de Xustiza de Castilla y León informan de que o procurador que actúa no nome do presidente da Deputación de Ourense e do PP nesa provincia enviou "un novo escrito solicitando a suspensión" da segunda cita fixada para a vista pola súa condución a 215 km/h no coche oficial e "manifestando a súa vontade de non comparecer" hoxe, polo que o xuízo "non se puido celebrar". "O xulgado volverá efectuar un novo sinalamento, reservándose a posibilidade de impoñer as sancións que correspondan", agrega. Previamente, presentara unha solicitude de adiamento e, ao non ser atendida, forzou a suspensión ao non acudir o seu avogado. Nesta terceira volta, esquívao a través do procurador. Máis información, hoxe en Praza.gal

• Baltar e Jácome amargan o aniversario da investidura de Rueda
• O exceso de velocidade de Baltar e os audios comprometedores de Jácome axitan a batalla do 28M en Ourense
• Baltar logra adiar o seu xuízo rápido por ir no coche oficial a 215 km/h e Jácome denuncia que o espían

Feijóo reclama desafiuzar en 24 horas as persoas que sexan denunciadas como ocupantes ilegais e que demostren a posteriori se son ou non residentes legais. O ex-presidente e actual líder do PP vai alén na súa campaña ao respecto reclamando "un procedemento" segundo o cal "hai que inverter a carga da proba". Na imaxe, Feijóo con Rueda nun mitin no Pino o pasado abril.

• A Xunta de Feijóo reduciu a cero a nova vivenda pública de alugueiro malia aos milleiros de peticións pendentes
• HEMEROTECA | O PP promete para os concellos oficinas 'antiocupacións' como a que pagou na Xunta, con 30 consultas nun ano
• HEMEROTECA | 2022 rematou con quince desafiuzamentos por cada novo caso de ocupación en Galicia