Os 'Mozos de Arousa' corrixen á TVG: o deputado do PP non será presentador. Ante o balbordo xerado polo anuncio da Televisión de Galicia, os 'Mozos de Arousa' "aclaran" que só dous deles conducirán o novo espazo 'A superfesta' por mor dos "compromisos coa vida política" de Raúl Santamaría
Feijóo encarga a Tellado "que chame aos grupos" do Congreso que apoiaron a investidura de Pedro Sánchez para que "digan se o seu apoio ao PSOE segue intacto" tras o encarceramento do ex-secretario de organización do PSOE, Santos Cerdán. Junts rétao a reunirse con Puigdemont "fóra do Estado, por razóns sobradamente coñecidas" se quere os seus votos para unha eventual moción de censura. O BNG reitera que nunca participaría nunha moción de censura con PP e Vox. Na imaxe, Tellado na súa etapa como secretario xeral do PPdeG.
A Xunta asume este 1 de xullo oficialmente as competencias sobre o litoral cuxo traspaso asinou co Goberno de España o pasado abril. O DOG publica este martes o decreto polo que, por primeira vez en 17 anos, o Goberno galego amplía o autogoberno.
Un vídeo divulgativo sobre o número Pi, gañador da 13ª edición do certame ‘Explícoche matemáticas 2.0’ para o fomento do uso do galego como medio de transmisión das matemáticas. A gañadora foi Antía Fernández Paulos, alumna do IES Castro Alobre (Vilagarcía de Arousa), que realizou o vídeo Xogando a aproximar Pi. O segundo premio correspondeulle ao traballo conxunto A tartaruga de Fleury dos alumnos Adrián Arnoso Bermúdez, Manuel Díaz Sánchez e Saúl López Souto, do IES Isaac Díaz Pardo de Sada.
O xuíz envía a prisión provisional sen fianza a Santos Cerdán, ex-secretario de organización do PSOE, tras tomarlle declaración. Faino atendendo a petición da Fiscalía, que observou riscos de fuga e destrución de probas para o tamén ex-deputado, investigado por delitos de suborno, organización criminal e tráfico de influencias. Nunha primeira reacción tras coñecer a noticia, Pedro Sánchez subliña que Cerdán foi "afastado do PSOE", que actuou "de maneira contundente" contra el e que agora "é o momento da Xustiza". [Imaxe: © PSOE]
Fin de semana de noites tropicais, en moitos lugares de Galicia a temperatura non baixou dos 20 graos nas dúas últimas noites. MeteoGalicia salienta que incluso en Fornelos de Montes ou Xesteiras (Cuntis) tiveron noites ecuatoriais, que suceden cando o termómetro non baixa dos 25º de temperatura. Os avisos por calor continúan este derradeiro día de xuño con nivel laranxa no sur da provincia de Lugo, na comarca de Valdeorras e na zona do Miño de Ourense; e están en nivel amarelo no centro e na montaña de Lugo, no interior da Coruña, no noroeste e no sur de Ourense e na zona do Miño de Pontevedra. Para o martes 1 de xullo seguirán activas as alertas por altas temperaturas en Ourense e Lugo.
Galicia atravesa unha fin de semana con temperaturas por enriba da media. Este sábado Ourense alcanzou os 41,5º, en Salvaterra de Miño o termómetro marcou 38.8º, en Monforte 38º, en Mondariz 37,6º, na cidade de Lugo superáronse os 36º e en Tui os 35º. Para este domingo MeteoGalicia ten activado o nivel de alerta laranxa por calor no sur das provincias de Lugo e Ourense, así como na comarca de Valdeorras e nas zonas do Miño de Pontevedra e Ourense. O resto do interior do país está en nivel amarelo, como permanecerá en gran medida no derradeiro luns de xuño.
Falece José Antonio Redondo, catedrático de Economía Financiera da Facultade de Ciencias Económicas e Empresariais da Universidade de Santiago de Compostela, e que foi conselleiro maior do Consello de Contas de Galicia. O lucense era académico numerario da Real Academia de Ciencias Económicas e Financeiras de España e académico numerario da Sección de Ciencias Económicas e Sociais da Real Academia Galega de Ciencias. [📸 RAGC]
A Xunta entregou este sábado en San Domingos de Bonaval as Medallas Castelao 2025 a Luar na Lubre, Víctor F. Freixanes, Emilio Pérez Nieto, Rosa Rodríguez Álvarez (en nome das e dos profesionais da atención primaria) e á Asociación Agaela. Uns galardóns que, en palabras do presidente Rueda, "recoñecen a persoas e institucións que, desde traxectorias vitais e profesionais moi diversas, contribuíron a engrandecer 'a fe na cultura, na historia e no ser dun pobo', o noso". [📸 David Cabezón/Xunta de Galicia]
Mobilización para a "reconquista" da illa de Toralla "por terra e por mar". Asociacións veciñais e ecoloxistas arribaron por terra e mar este sábado á illa de Toralla, no litoral vigués, para reclamar a "entrada libre" á illa e a realización da senda peonil litoral "que garantice o acceso á costa" de toda a cidadanía. Os manifestantes solicitan "máis implicación" do Concello de Vigo e esixen á Xunta e ao Goberno de España que "fagan cumprir a lei". [📸 Ecoloxistas en Acción]
