O popular Fernández Mañueco, reelixido presidente de Castilla y León á fronte dun bipartito con Vox. O pacto, na liña dos xa asinados pola formación de Feijóo noutros territorios, outorga a Vox unha vicepresidencia e tres consellerías e contempla diversas promesas contra as persoas migrantes como a discriminación no acceso a servizos públicos, entre outras. [Imaxe: © Cortes de Castilla y León]
Os técnicos da Unesco recomendan que a Ribeira Sacra non sexa elixida Patrimonio da Humanidade. O informe do Icomos, organismo asesor da Unesco, considera que a candidatura non xustificou o seu valor excepcional e propón que sexa rexeitada na asemblea anual de finais de xullo.
A folga do metal na provincia da Coruña paraliza boa parte da actividade nos polígonos industriais e en grandes empresas do sector. O paro, que se estenderá ata o xoves, foi convocado por CIG, CCOO e UGT, que reclaman un convenio digno para os 18.000 traballadores e traballadoras afectadas e denuncian o bloqueo da negociación por parte da patronal. Foto: CC-BY-SA CCOO Galicia
Dependentas do téxtil trasladan a súa acampada reivindicativa ás portas da sede da patronal galega en Compostela para reclamarlle un acordo que blinde os convenios provinciais tras a sinatura do convenio estatal. Traballadoras moven o campamento da Coruña a Santiago, onde protestan ante a CEG e denuncian o "recorte de dereitos" que supón o novo marco laboral para todo o Estado.
O Ministerio de Sanidade confirma o plan para fornecer preservativos de balde á poboación de 16 a 22 anos a través das farmacias "como un dereito" a partir de 2027 en colaboración cos colexios farmacéuticos. [Imaxe: CC BY rhsupplies]
O Leyma Coruña gaña o ascenso á ACB ante o Estudiantes tras ir perdendo e forzar unha agónica prórroga na Final Four disputada esta fin de semana na propia cidade. Na ACB agardan para a próxima tempada outros dous equipos galegos, o Breogán, que se mantén, e o Obradoiro, que xa ascendera como primeiro clasificado na liga regular da Primeira FEB. [Imaxe: FEB]
O Leyma Coruña xogará este domingo a final de ascenso á ACB tras gañar a semifinal ao Palencia por 92-81. O equipo coruñés enfrontarase ao Estudiantes, gañador da outra semifinal ante o Oviedo dunha Final Four que se está a disputar na Coruña. Na ACB agardan para a próxima tempada dous equipos galegos, o Breogán, que se mantén, e o Obradoiro, que vén de ascender como primeiro clasificado na liga regular da Primeira FEB. Na imaxe, do propio equipo, tras gañar en cuartos de final.
O papa León XIV vén de iniciar unha visita de sete días a Madrid, Barcelona e Canarias moi centrada na pobreza e as migracións e na que o luns falará ante o Congreso dos Deputados. Prevost vén amosando a súa sintonía co Goberno de España fronte ao belicismo de Trump.
O BNG confirma o deputado Món Fernández como novo candidato á alcaldía de Ferrol. A asemblea local da formación ratificouno por unanimidade como cabeza de cartel.
O delegado da Xunta que cesou para ser remudado polo ex-conselleiro Alfonso Villares, novo director de urbanismo do Concello de Lugo. El Progreso adianta que a candidatura de Javier Arias para o posto foi a única presentada ao proceso de selección aberto por Candia o mesmo día en que o Consello da Xunta aprobou o nomeamento do ex-conselleiro do Mar. Na imaxe, Arias canda o conselleiro Diego Calvo durante a toma de posesión de Villares, o pasado martes.
