Fálase

🇬🇧🗳️O Partido Laborista logra unha gran vitoria nas eleccións do Reino Unido con 407 escanos, a dez deputados do histórico resultado de Tony Blair en 1997. Keir Starmer xa é o novo primeiro ministro británico. Aínda co reconto sen rematar e con máis de vinte escanos por asignar, o golpe dos conservadores do primeiro ministro Rishi Sunak é evidente: perden 273 deputados, conservarían 112. Medra significativamente o Partido Liberal Demócrata, que se sitúa como terceira forza con 69 escanos no Parlamento británico, e a formación ultra de Niguel Farage logra entrar na cámara con catro deputados. [Fotografía da noite electoral dos laboristas © @Keir_Starmer]

👉CRÓNICA | O laborismo regresa catorce anos despois a Downing Street tras varrer do mapa os 'tories'

🇬🇧🗳️Reino Unido decide se remata cos gobernos conservadores e inicia unha nova etapa co partido laborista en Downing Street. Preto de 50 millóns de persoas poden participar nestas eleccións británicas. As enquisas sinalan que o candidato laborista Keir Starmer podería facer historia e o xa o comparan coa contundente vitoria de Tony Blair cando chegou o poder en 1997. Os tories enfrontan as consecuencias dos escándalos da lexislatura, que levaron o primeiro ministro Rishi Sunak a adiantar os comicios a este 4 de xulllo, cando a formación de ultradereita de Nigel Farage pode aumentar a súa representación. [Na imaxe, Keir Starmer e Rishi Sunak indo a votar © @RishiSunak @Keir_Starmer]

• PODCAST | Té con Gotas (2021): Máis impostos e máis Estado para recuperar a economía británica
• PODCAST | Té con Gotas (2021): Superxoves electoral no Reino Unido: a pandemia reforza os partidos no goberno e o independentismo escocés gaña impulso
• PODCAST | Té con Gotas (2020): Reino Unido di adeus á UE: e agora, que? 

Xunta e Deputación de Pontevedra ratifican a compra do antigo Cine Fraga de Vigo a Abanca por 9,3 millóns de euros. A Xunta achegará o 51% e o restante, a institución provincial, segundo detallaron os seus presidentes, Rueda e López, nunha xuntanza este mércores, na que evitaron dar detalles sobre o futuro "plan de usos" do edificio. O histórico edificio comezou a ser rehabilitado por Caixa Galicia en 2008 como centro sociocultural nunha operación duns 16 millóns de euros a piques de finalizar cando se concretou a fracasada fusión con Caixanova.

• HEMEROTECA | REPORTAXE -  A "vergoña" de Abanca: o cine Fraga esmorece, rehabilitado, no centro de Vigo

O PP rompe as negociacións para unha posible moción de censura contra Jácome en Ourense. Así o veñen de ratificar os conservadores, que culpan da ruptura a PSdeG e BNG. Tras as municipais de 2023 Democracia Ourensana foi primeira forza na cidade e os populares garantíronlle a alcaldía a Jácome a cambio de reteren para si o goberno da Deputación.

• HEMEROTECA | Haberá moción de censura en Ourense se a alcaldía é do PSdeG
• HEMEROTECA | O PSdeG de Ourense concreta en 14 puntos a oferta a PP e BNG para botar a Jácome
• HEMEROTECA | O acordo PP-PSdeG e a promesa de Rueda que romperon os populares para volver pactar con Jácome

Falece o historiador Justo Beramendi. Catedrático emérito de Historia Contemporánea da Universidade de Santiago de Compostela e presidente do Museo do Pobo Galego ata 2022, Beramendi escolleu ser galego e deixa unha gran contribución á cultura do país con obras como De provincia a nación. Historia do Galeguismo político, co que gañou o Premio Nacional de Ensayo en 2008. 

• OBITUARIO | Morre Xusto Beramendi, o historiador do galeguismo que 'escolleu' ser galego

Aprobado o Real Decreto polo que se crea a especialidade de Medicina de Urxencias e Emerxencias. O Consello de Ministros dá luz verde a esta nova especialización no eido médico, que terá un período de formación mínimo de catro anos, coincidindo os dous primeiros coa especialidade de Medicina Familiar e Comunitaria. A norma establece un procedemento para que os profesionais nunha das dúas especialidades poidan obter o título da outra, mediante unha proba de avaliación e un período formativo. [Imaxe @Monica_Garcia_G]

• Sanidade non concreta como supervisará o persoal médico en formación que pase consulta no verán
• Sanidade aproba que persoal médico en formación pase consulta no verán e di que o Ministerio "non achega" solucións

A tenista Jessica Bouzas Maneiro logra a súa primeira vitoria nun Grand Slam na pista central do torneo de Wimbledon. A vilagarciá elimina a actual campioa de Wimbledon en dous sets e seguirá competindo nas seguintes rondas. "É un dos momentos máis importantes da miña vida e da miña carreira. Este é un dos torneos máis incribles nos que xoguei", dixo Bouzas desde a pista tras resultar vencedora. [Imaxe © Wimbledon]

O correspondente da TVG en Madrid, novo director da sede da Xunta na capital de España. O Goberno galego confirma o nomeamento de Luis Ramos como responsable da Casa de Galicia en Madrid, co que di pretender "consolidar" o papel desta delegación como "espazo de representación institucional da Xunta" na cidade. Ramos viña exercendo na delegación madrileña da Televisión de Galicia dende hai vinte anos, onde "cubriu os principais acontecementos da política española", salienta a Xunta nun comunicado. O anterior responsable da Casa de Galicia en Madrid veu sendo o concelleiro do PP de Lugo Javier Vázquez.

O conselleiro de Educación, Ciencia, Universidades e Formación Profesional, Román Rodríguez, asina o acordo das comunidades gobernadas polo PP para organizar unhas probas de acceso á universidade comúns. "Estamos facendo o que non fai o Goberno de Pedro Sánchez no que se refire a xerar un marco de igualdade de oportunidades para todos os estudantes", afirmou Rodríguez no acto do seu partido presidido por Feijóo, quen explicou que esta ABAU terá "datas comúns de exames, formatos coa mesma estrutura e mesmos criterios de corrección" que "poderá facilitar a mobilidade dos alumnos". 

• Feijóo volve abrir a porta a condicionar a selectividade en Galicia ao ditado pola cúpula estatal do PP

A asociación LGTBI+ ALAS A Coruña convoca unha vixilia polo terceiro aniversario do asasinato de Samuel Luiz. Será este mércores, 3 de xullo, ás 20h na Avenida de Bos Aires, ao carón da discoteca Playa Club. Co fin de respectar o proceso xudicial, no que a asociación exerce a acusación popular, non farán lectura de ningún manifesto. O xuízo, con xurado popular, comezará o 16 de outubro na Audiencia da Coruña. 

A presidenta de ALAS A Coruña, Ana G. Fernández, incide no "impacto que os discursos de odio teñen na sociedade, normalizando actitudes hostís ou mesmo abertamente violentas, contra as que estaremos sempre vixiantes, para facer da nosa sociedade unha plenamente igualitaria". [Imaxe da homenaxe a Samuel Luiz na véspera do primeiro aniversario do seu asasinato CC-BY-SA Marea Atlántica]

• HEMEROTECA | "Crueldade extrema" e "fonda animadversión á homosexualidade": a Fiscalía pide de 22 a 27 anos polo asasinato de Samuel Luiz
• HEMEROTECA | Milleiros de persoas lembraron a Samuel Luiz nas cidades galegas nun Día do Orgullo LGBTI de reivindicación