Fálase

O conselleiro de Educación, Ciencia, Universidades e Formación Profesional, Román Rodríguez, asina o acordo das comunidades gobernadas polo PP para organizar unhas probas de acceso á universidade comúns. "Estamos facendo o que non fai o Goberno de Pedro Sánchez no que se refire a xerar un marco de igualdade de oportunidades para todos os estudantes", afirmou Rodríguez no acto do seu partido presidido por Feijóo, quen explicou que esta ABAU terá "datas comúns de exames, formatos coa mesma estrutura e mesmos criterios de corrección" que "poderá facilitar a mobilidade dos alumnos". 

• Feijóo volve abrir a porta a condicionar a selectividade en Galicia ao ditado pola cúpula estatal do PP

A asociación LGTBI+ ALAS A Coruña convoca unha vixilia polo terceiro aniversario do asasinato de Samuel Luiz. Será este mércores, 3 de xullo, ás 20h na Avenida de Bos Aires, ao carón da discoteca Playa Club. Co fin de respectar o proceso xudicial, no que a asociación exerce a acusación popular, non farán lectura de ningún manifesto. O xuízo, con xurado popular, comezará o 16 de outubro na Audiencia da Coruña. 

A presidenta de ALAS A Coruña, Ana G. Fernández, incide no "impacto que os discursos de odio teñen na sociedade, normalizando actitudes hostís ou mesmo abertamente violentas, contra as que estaremos sempre vixiantes, para facer da nosa sociedade unha plenamente igualitaria". [Imaxe da homenaxe a Samuel Luiz na véspera do primeiro aniversario do seu asasinato CC-BY-SA Marea Atlántica]

• HEMEROTECA | "Crueldade extrema" e "fonda animadversión á homosexualidade": a Fiscalía pide de 22 a 27 anos polo asasinato de Samuel Luiz
• HEMEROTECA | Milleiros de persoas lembraron a Samuel Luiz nas cidades galegas nun Día do Orgullo LGBTI de reivindicación

A extrema dereita imponse na primeira volta das eleccións lexislativas en Francia cun 34% dos votos, segundo as primeiras proxeccións de Ipsos para os medios públicos franceses. Tras a formación de Le Pen e os seus aliados sitúase a Nova Fronte Popular con arredor do 28% e en terceira posición, as candidaturas do partido do presidente Emmanuel Macron, con arredor do 20%. Nesta ligazón pódese consultar o escrutinio oficial dos comicios, que vivirán a semana vindeira unha transcendental segunda volta na que non é desbotable un escenario de bloqueo. Tras o peche das urnas tanto Macron coma o esquerdista Mélenchon e outros líderes chaman á concentración do voto contra a extrema dereita nas segunda volta, informa Libération. Na imaxe, o hemiciclo da Asemblea Nacional francesa. 

AMPLIAMOS 👉 A primeira volta das lexislativas francesas deixa a extrema dereita ás portas do Goberno

Principian en Vila Nova de Famalicão os XV Xogos do Eixo Atlántico, con 2.400 mozas e mozas de toda a Eurorrexión, a cifra máis alta da historia desta competición. Desenvólvense ata o día 5 entre Famalicão e Braga con competición de balonmán feminino e masculino, voleibol feminino, baloncesto masculino e feminino, natación e natación adaptada, atletismo e atletismo adaptado e, como novidade desta edición, ao Fútbol 7 masculino e tamén feminino.

• Famalicão e Braga acollen os XV Xogos do Eixo Atlántico, con 2.400 participantes de toda a eurorrexión

Milleiros de persoas responden á convocatoria de Ulloa Viva e a APDR para arrodear a sede central da Xunta en rexeitamento á fábrica de Altri en Palas de Rei. 

• AMPLIAMOS | CRÓNICA E GALERÍA 👉 Berro masivo contra Altri ás portas da Xunta

🏳️‍🌈Vigo e Pontevedra pecharon este sábado as mobilizacións galegas polo Día do Orgullo LGBTI+. Na imaxe, a masiva manifestación viguesa do Orgullo Crítico, na que os colectivos alertaron de posibles retrocesos en dereitos conquistados e advertiron: "Se atacan a unhe, respostamos todes". [Imaxe: CC BY-NC-SA BNG Vigo]

• Orgullo LGBTI alegre e combativo nas rúas galegas
• "Non é unha decisión, é o que somos": un Orgullo pola igualdade e o respecto fronte ás agresións

O PP pecha máis a porta á moción de censura para desbancar a Jácome en Ourense ao considerar "absurdo" que a alcaldía sexa para o PSdeG por ter "só seis edís". Así o afirma o líder provincial do partido, Luis Menor, en declaracións a La Voz de Galicia. No pasado mandato, os populares entregaron o bastón de mando a Democracia Ourensana malia ser a terceira forza da corporación. A socialista Natalia González conta con 10 votos a prol para ser alcaldesa (os socialista e 4 do BNG), tantos coma os que ten DO, pero a clave da operación pasa polos 7 votos do PP, segunda forza do concello. Na imaxe, Menor e Jácome durante unha xuntanza o pasado abril [© Deputación de Ourense]

• Rueda deixa a moción de censura en Ourense en mans dos seus edís e afea "liñas vermellas" do BNG co PP
• Haberá moción de censura en Ourense se a alcaldía é do PSdeG

Leilía, Borja Golán, Maite Isla (Solidariedade Galega co Pobo Saharauí), Amancio López Seijas e o colectivo médico Asomega reciben a Medalla Castelao de mans do presidente da Xunta. O Goberno galego entrega o galardón cadrando co aniversario do plebiscito do primeiro Estatuto de Autonomía e tamén coa data do regreso dos restos de Alfonso Daniel Rodríguez Castelao a Galicia. Na imaxe, Rueda e o conselleiro Calvo coas persoas galardoadas, no Panteón de Galegas e Galegos Ilustres. [CC BY-SA David Cabezón / Xunta]

• HEMEROTECA | "Galicia non quere favores, quere un goberno propio": aniversario do primeiro Estatuto
• HEMEROTECA | "Castelao é unha liña recta. Eticamente non hai nada que reprocharlle"

O primeiro debate presidencial dos EUA evidencia as limitacións de Biden e as mentiras de Trump. O actual presidente estadounidense e aspirante á reelección dispara as alarmas no Partido Demócrata e as voces que claman por unha candidatura alternativa tras un encontro televisivo na CNN marcado polas súas pausas, dúbidas e lagoas mentres o ex-mandatario e novamente candidato republicano faltaba á verdade en aspectos como as políticas migratorias ou o asalto ao Capitolio, entre outros aspectos. [Imaxe: © Retransmisión CNN]

Castelao, nacionalista galego. Un facsímile recupera o histórico texto de Uxío Novoneyra no cuadraxésimo aniversario da traída dos restos do político e artista a Galicia. O volume, presentado este xoves ante o Panteón de Galegos e Galegas Ilustres, publícase acompañado por un estudo histórico de Miguel Anxo Seixas e unha carta na que Tereixa Navaza relata como viviu aquela histórica xornada, retransmitindo o acto e as manifestacións da xornada para RTVE Galicia. Na imaxe, representantes das fundacións que impulsan a publicación, na presentación xunto ao secretario xeral da Lingua, Valentín García.

• Unha ducia de momentos do regreso dos restos de Castelao a Galicia en 1984
• HEMEROTECA | Miguel Anxo Seixas | "Castelao é unha liña recta. Eticamente non hai nada que reprocharlle"
• HEMEROTECA | Tereixa Navaza: "A maioría consideraba que o xornalismo era un mundo de homes. Non aturaban que unha muller tivese criterio e pelexase por el"