Fálase

O PP pecha máis a porta á moción de censura para desbancar a Jácome en Ourense ao considerar "absurdo" que a alcaldía sexa para o PSdeG por ter "só seis edís". Así o afirma o líder provincial do partido, Luis Menor, en declaracións a La Voz de Galicia. No pasado mandato, os populares entregaron o bastón de mando a Democracia Ourensana malia ser a terceira forza da corporación. A socialista Natalia González conta con 10 votos a prol para ser alcaldesa (os socialista e 4 do BNG), tantos coma os que ten DO, pero a clave da operación pasa polos 7 votos do PP, segunda forza do concello. Na imaxe, Menor e Jácome durante unha xuntanza o pasado abril [© Deputación de Ourense]

• Rueda deixa a moción de censura en Ourense en mans dos seus edís e afea "liñas vermellas" do BNG co PP
• Haberá moción de censura en Ourense se a alcaldía é do PSdeG

Leilía, Borja Golán, Maite Isla (Solidariedade Galega co Pobo Saharauí), Amancio López Seijas e o colectivo médico Asomega reciben a Medalla Castelao de mans do presidente da Xunta. O Goberno galego entrega o galardón cadrando co aniversario do plebiscito do primeiro Estatuto de Autonomía e tamén coa data do regreso dos restos de Alfonso Daniel Rodríguez Castelao a Galicia. Na imaxe, Rueda e o conselleiro Calvo coas persoas galardoadas, no Panteón de Galegas e Galegos Ilustres. [CC BY-SA David Cabezón / Xunta]

• HEMEROTECA | "Galicia non quere favores, quere un goberno propio": aniversario do primeiro Estatuto
• HEMEROTECA | "Castelao é unha liña recta. Eticamente non hai nada que reprocharlle"

O primeiro debate presidencial dos EUA evidencia as limitacións de Biden e as mentiras de Trump. O actual presidente estadounidense e aspirante á reelección dispara as alarmas no Partido Demócrata e as voces que claman por unha candidatura alternativa tras un encontro televisivo na CNN marcado polas súas pausas, dúbidas e lagoas mentres o ex-mandatario e novamente candidato republicano faltaba á verdade en aspectos como as políticas migratorias ou o asalto ao Capitolio, entre outros aspectos. [Imaxe: © Retransmisión CNN]

Castelao, nacionalista galego. Un facsímile recupera o histórico texto de Uxío Novoneyra no cuadraxésimo aniversario da traída dos restos do político e artista a Galicia. O volume, presentado este xoves ante o Panteón de Galegos e Galegas Ilustres, publícase acompañado por un estudo histórico de Miguel Anxo Seixas e unha carta na que Tereixa Navaza relata como viviu aquela histórica xornada, retransmitindo o acto e as manifestacións da xornada para RTVE Galicia. Na imaxe, representantes das fundacións que impulsan a publicación, na presentación xunto ao secretario xeral da Lingua, Valentín García.

• Unha ducia de momentos do regreso dos restos de Castelao a Galicia en 1984
• HEMEROTECA | Miguel Anxo Seixas | "Castelao é unha liña recta. Eticamente non hai nada que reprocharlle"
• HEMEROTECA | Tereixa Navaza: "A maioría consideraba que o xornalismo era un mundo de homes. Non aturaban que unha muller tivese criterio e pelexase por el"

O xuízo polo crime de Samuel Luiz comezará o 16 de outubro na Audiencia Provincial da Coruña, no que supón un aprazamento en relación á data inicialmente prevista do 13 de setembro.

• "Crueldade extrema" e "fonda animadversión á homosexualidade": a Fiscalía pide de 22 a 27 anos polo asasinato de Samuel Luiz

O PSdeG de Ourense confirma a Natalia González como candidata á alcaldía nunha eventual moción de censura contra Jácome. A edil socialista contaría xa con 10 votos, os 6 do seu grupo e mais os 4 do BNG, polo que a posibilidade de desbancar a DO (10 edís) do goberno ourensán fica nas mans do PP (7 edís). "Estamos chamadas a ser exemplo de que a política é un instrumento útil para cambiar a vida da xente e que a cultura do diálogo e o consenso polo interese público, superando as nosas diferenzas, é o camiño para poder volver a confiar nun futuro mellor para a terceira cidade de Galicia", sinalan. [Imaxe: PSdeG]

• Haberá moción de censura en Ourense se a alcaldía é do PSdeG
• O PSdeG de Ourense concreta en 14 puntos a oferta a PP e BNG para botar a Jácome

Activistas de Greenpeace despregan unha faixa coa mensaxe 'Altri Non' na fachada da Catedral de Santiago. Este domingo está convocada unha manifestación en Compostela, ante a sede da Xunta, que busca "arrodear San Caetano". Hai dúas semanas o buque de Greenpeace Arctic Sunrise estivo na ría de Arousa, onde foi recibido cunha manifestación marítima, e acolleu debates e encontros con entidades sociais nos que se visibilizou o rexeitamento ao proxecto de celulosa de Altri.

• AMPLIAMOS 👉 Greenpeace desprega unha faixa na fachada da Catedral de Santiago para esixir a paralización do proxecto de Altri
• Ulloa Viva e a Plataforma en Defensa da Ría de Arousa chaman a "arrodear San Caetano" para protestar contra Altri
• Defensa da pesca e marisqueo artesanal e oposición a industrias como Altri, demandas de Greenpeace na Ría de Arousa

Ana Peleteiro alerta en vésperas dos Xogos Olímpicos de que "en Europa hai unha corrente fascista que gañou moito poder": "A xente que temos un altofalante temos que falar para que a xente sexa consciente", agrega a atleta ribeirense nunha entrevista con RTVE, na que aborda os comentarios racistas que ela tamén sofre e, sobre todo, pon o foco no seu reto de obter o ouro olímpico en París: "Téñoo na cabeza cada día". [Imaxe: © RTVE]

• HEMEROTECA | Ana Peleteiro salta á gloria e trae o bronce olímpico para Galicia
• HEMEROTECA | Peleteiro dedica o seu novo éxito ao 8M e "a todas esas mulleres que loitan por ocupar o lugar que merecen"
• HEMEROTECA | O agradecemento de Ana Peleteiro pola Medalla Castelao: "Sobre todo, eu son galega"

Ampla condena internacional ao intento de golpe de Estado en Bolivia, que o goberno de Luis Arce logrou sufocar. O xeneral que encabezou o levantamento militar, Juan José Zúñiga, xa foi detido. Na imaxe  [© Goberno de Bolivia], Arce dirixíndose á multitude en La Paz para agradecer o apoio ante a tentativa golpista.

• HEMEROTECA | Retornos. Por Xulio Ríos

A Audiencia Provincial de Pontevedra ordena indemnizar con 15.000 euros a Laureano Oubiña por vulnerar o seu dereito á intimidade nunha escena sexual da serie 'Fariña', baseada no libro de Nacho Carretero sobre o narcotráfico en Galicia e producida por Bambú e Atresmedia e Netflix. A xustiza entende que esa escena coa súa falecida segunda esposa non está xustificada "pola liberdade creativa innegable dos creadores e produtores" e falla a favor de eliminar esas imanes das plataformas nas que aínda se pode ver a serie. Os maxistrados non estiman o resto das peticións de Oubiña contra a serie na súa sentenza, contra a que cabe interpoñer recurso. [Na imaxe © Netflix, Carlos Blanco interpretando a Oubiña en 'Fariña' e Javier Rey como Sito Miñanco]

• HEMEROTECA | O éxito de 'Fariña', desacougo polo regreso do pasado incómodo de Galicia