Folga nos buses urbanos da Coruña o vindeiro 16 de novembro. A representación laboral na Compañía de Tranvías convoca paro pola negociación do convenio e advirte dunha excesiva carga de traballo "mentres a empresa, a máis rendible de España, enche os petos de billetes", con récord de viaxeiros e beneficios. O beneficio neto da empresa foi de case 6,5 millóns de euros o pasado ano. A convocatoria é apoiada por UGT, CIG e GGT e rexeitada polo CSIF.
29N O Supremo rexeita estender a suspensión do dereito a voto a fillos e fillas de persoas que obtiveron a nacionalidade ao abeiro da Lei de Memoria Democrática por "presunción" de exilio, aos que si prohibiu votar. Sobre os pais e nais destas persoas seguirá vixente a suspensión cautelar da alcumada como lei de netos, concedida por petición das formacións de extrema dereita Vox e Iustitia Europa, que agora pedían ampliala
Vítimas de Angrois serán recibidas este martes polo vicepresidente primeiro do Goberno de España, Carlos Cuerpo, encargado tamén da área de Transportes. Tras reunirse con afectados polo sinistro de Adamuz, agora a plataforma de Angrois pediralle que se aprenda das traxedias pasadas e que se revise a investigación técnica oficial que no seu día se fixo do accidente de Santiago, descualificada pola UE.
Rueda e o resto de membros do Goberno galego conclúen o seu "retiro" no hotel do antigo mosteiro de San Clodio, en Leiro, anunciando un futuro plan para "facilitar a implantación de industrias" que tramite "nun só solo naves preparadas e solucións de vivenda para os traballadores onde sexan necesarias". Segundo o Executivo, a estancia de dous días dos membros do Consello da Xunta serviu para "afondar na cooperación entre departamentos" e "fixar prioridades de futuro". Tras a conclusión do evento, o presidente dedicou gran parte do domingo a participar en actos de precampaña do PP. Rueda recuperou nesta lexislatura os "retiros" que Fraga implantara cos seus conselleiros. [Imaxe: CC BY-SA David Cabezón / Xunta]
Prisión preventiva en Suecia para Roberto García, o conselleiro delegado da mina de wolframio da Gudiña. A compañía Eurobattery Minerals, promotora da mina, confirmou nun comunicado que García Martínez fica en prisión preventiva en Suecia. Roberto Martínez xa fora condenado a dous anos de cárcere por en España.
[Foto: Ecoloxistas en Acción]
O filme ‘KIRO’, de María Yáñez, acada o premio ao mellor documental musical nacional no festival In-Edit de Barcelona. A directora dedicou o galardón á memoria de Ana Kiro e á comunidade galega en Barcelona. O premio súmase á Calpurnia á Mellor Película, ao Premio do Público e á mención especial á Mellor Dirección que o documental obtivo no Festival de Cine de Ourense.
Besteiro advirte de que o 29N os galegos e galegas escollerán entre o Goberno socialista que defende manter e incrementar as axudas aos gandeiros e o PP e VOX, que queren recortar a PAC. O líder dos socialistas galegos visita a Feira de Santos de Gontán -Abadín- onde reclama unha PAC “suficiente, con financiamento e que chegue a todas as explotacións”
Destituído e arrestado por presunta corrupción Santiago Peña, xa expresidente de Paraguai. Santiago Peña vén de ser detido pola Policía e posto en arresto domiciliario no medio dun xuízo político aberto polo escándalo financiero do Ueno Bank.
A comunidade educativa de Vigo alerta da falta de persoal e de recursos para atender a diversidade. O IES Santa Irene acolleu este xoves un encontro baixo o lema «O estado da educación. Tecendo pontes entre todos os colectivos polo futuro do ensino público», que reuniu representantes de todas as etapas educativas e diferentes colectivos para analizar a situación do ensino e formular futuras accións. Acordaron crear unha comisión mixta encargada de impulsar diferentes iniciativas nas vindeiras semanas, coa participación de toda a comunidade educativa.
[Foto: Asembleas Abertas do Ensino Público]
Un detido en Caldas na operación contra a organización neonazi Núcleo Nacional. A Subdelegación do Goberno de España en Pontevedra confirma que a localidade foi unha das atinxidas por un operativo contra este grupo ultradereitista dirixido dende un xulgado de Xixón que, informa elDiario.es, implicou cando menos catorce detencións e acusacións de incitación ao odio, asociación ilícita e tenza de armas. A organización prevía unha manifestación esta fin de semana en Madrid, detalla a Cadena SER. Na imaxe, detalle dun vídeo propagandístico do grupo.
