Fálase

O pleno de Santiago valida a cuestión de confianza formulada pola alcaldesa vencellada aos orzamentos de 2026, que quedan aprobados inicialmente. Goretti Sanmartín acudiu a esta fórmula, que sae adiante cos votos do goberno de BNG e CA e mais do grupo de non adscritos, xusto ao día seguinte de que o pleno -na imaxe- rexeitase as contas por mor da abstención dos antigos edís socialistas. Na votación deste xoves os dous concelleiros do PSdeG abstivéronse e o PP volveu votar en contra, mentres que os non adscritos xustifican a mudanza para non demorar un mes as contas xa que, sinalan, non había posibilidade ningunha de que apoiasen unha moción de censura contra a rexedora. [Imaxe: © Concello de Santiago]

Avia Veira será a candidata do BNG á alcaldía da Coruña nas municipais de 2027. A asemblea local do Bloque na cidade ratificará a súa candidatura este serán e, xa con esa condición, este xoves estará acompañada por Ana Pontón nunha primeira presentación ante os medios. Nas últimas dúas eleccións municipais a concelleira ocupara o número dous da lista encabezada por Francisco Jorquera, quen recentemente anunciou a súa retirada da primeira liña da vida política tras unha dilatada traxectoria. [Imaxe: BNG]

Folga conxunta nos medios públicos nas vindeiras eleccións xerais ou municipais. A plataforma RTVs Públicas en Loita conclúe en Sevilla o seu segundo encontro co acordo de convocaren unha mobilización unitaria en todos os medios aos que representan "coincidindo co arranque das próximas eleccións xerais ou municipais de 2027". O comité intercentros da CSAG -antiga CRTVG- integra esta plataforma, constituída en Santiago o pasado 2025, canda os seus homólogos dos medios públicos de Euskadi, Catalunya, Andalucía, Madrid, Asturias, Estremadura, Canarias, Castilla-La Mancha, Aragón, Balears e a Comunitat Valenciana, así como de seccións sindicais de CCOO e CGT en RTVE e de CCOO en Murcia. Na imaxe, participantes no encontro, nun plató de informativos de Canal Sur.

• HEMEROTECA | Comités de medios públicos do Estado crean unha "alianza estratéxica" para defenderse da "manipulación"
• HEMEROTECA | Segunda dirección dos medios públicos do PP dende 2009 tras trece anos a esquivar a lei

Acordo entre o sindicato médico O'Mega e o Sergas para suspender a folga na Atención Primaria que leva provocada a suspensión dunhas 70.000 consultas dende o pasado día 2. 

• AMPLIAMOS 👉 Trinta consultas de 10 minutos: os motivos de O'Mega para frear a folga nos centros de saúde
• Sanidade culpa o Estado de que poboación galega sexa a menos satisfeita coa súa Atención Primaria

O festival Sinsal confirma que continuará celebrándose na Illa de San Simón este ano, pero na fin de semana seguinte "ampliará a súa actividade" á cidade de Vigo e outras localidades da contorna. Ante a controversia xerada pola posibilidade de que a declaración de San Simón como Lugar de Memoria Democrática impedise celebrar o evento, que acumula quince edicións, a organización confirma que volve á illa co seu cartel secreto do 24 ao 26 de xullo e, ademais, do 31 de xullo ao 2 de agosto "contará con directos e propostas culturais" expandíndose pola cidade olívica e puntos do Camiño Portugués. Na imaxe, un concerto no festival [© Olalla Lojo]

• HEMEROTECA | As capas da Memoria de San Simón dialogan co presente
• HEMEROTECA | "Poder rodar ‘San Simón’ no mesmo lugar onde ocorreron os feitos foi un privilexio e un reto"
• HEMEROTECA | A declaración de San Simón como Lugar de Memoria, un "acto de xustiza e reparación" aos centos de mortos na illa
• HEMEROTECA | “Que San Simón, a illa dos poetas, fose tamén un campo de concentración é algo demasiado brutal”
• HEMEROTECA | Do museo involuntario do Porto de Vigo á illa da Memoria: un Sinsal para descubrir músicas e recuperar costumes sostibles

O presidente da Junta de Andalucía convoca eleccións para o 17 de maio, en vésperas da conclusión da lexislatura iniciada coas eleccións de xuño de 2022, nas que o PP acadara unha maioría absoluta que Juan Manuel Moreno aspira agora a revalidar. A convocatoria precipita, ademais, a saída do Goberno de España da vicepresidenta e ministra de Facenda, María Jesús Montero, para ser candidata do PSOE. [Imaxe: © Junta de Andalucía]

📩❗️As socias e socios de Praza.gal veñen de recibir un correo cun importante adianto informativo 

• 🤗 Faite da comunidade de Praza.gal dende 5 euros ao mes
• ✅ Ata o 80% da achega anual devólvencha coa declaración da renda

A edil ex-socialista María Reigosa abandona o grupo de goberno do Concello de Lugo e déixao en minoría ao ficar como non adscrita, avanza El Progreso. Reigosa chegou á corporación lucense en outubro do pasado 2025 -na imaxe- como remuda do falecido concelleiro Pablo Permuy e tras manifestar diversas discrepancias deuse de baixa no PSdeG a principios deste ano mentres unía o seu voto ao do PP nalgunhas iniciativas no pleno municipal. A concelleira asegura, non obstante, que non participaría nunha moción de censura co PP, formación que agora pasa a estar empatada a 12 edís co grupo de goberno, composto por 7 representantes socialistas e 5 do BNG. Na imaxe, [©Concello de Lugo], Reigosa tomando posesión da acta de concelleira polo PSdeG.

Meloni perde o referendo da reforma xudicial en Italia. Co reconto xa moi avanzado, o "non" á controvertida modificación, sinalada polas esquerdas como unha tentativa do goberno ultra por incrementar o control sobre a Xustiza, rolda o 54% dos votos e a propia primeira ministra admitiu xa a derrota a través dun vídeo divulgado nas redes sociais. Na imaxe, un acto do Partido Democrático contra a reforma agora fracasada [© PD]

• HEMEROTECA | Bruxelas copia a Meloni e autoriza centros de deportación de migrantes fóra da UE
• HEMEROTECA | O que me gusta de Meloni e traballar dez horas diarias
• HEMEROTECA | "A ultradereita fréase con políticas que combatan a desafección e acheguen a recuperación económica á maioría"
• HEMEROTECA | O inmediato futuro de Italia: unha explicación do melonismo

Pontón pide a transferencia a Galicia de Meirás como lugar de memoria e Rueda a súa xestión para incluír "toda" a traxectoria do pazo. O presidente quere que tamén se lembre a Pardo Bazán porque "a sociedade galega é plural e aberta". 

• HEMEROTECA (2020) | O plan de usos da Xunta para Meirás dedica apenas seis liñas á memoria e obvia como caeu nas mans de Franco
• HEMEROTECA (2020) | Feijóo completa a súa viraxe sobre Meirás cun plan centrado en Pardo Bazán que dilúe a memoria histórica