Fálase

O PP de Cariño pide perdón “polo erro cometido” e Rueda defende que Fraga merece todo o cariño e recoñecemento. A alcaldesa de Cariño, Ana María López, asegurou este sábado que o seu grupo (PP) “é plenamente consciente da figura transcendental que don Manuel Fraga supón para a historia de noso partido, para o pasado e para o presente actual de Galicia e para a política en xeral” e pediu perdón a través dun audio. Tamén o presidente da Xunta, Alfonso Rueda, aproveitou un acto en Ourense para ensalzar a figura de Fraga, que “merece todo o cariño e recoñecemento”. O PP de Cariño abstívose nun acordo para cambiar o nome de Fraga dunha rúa o pasado xoves.

[Imaxe: rúa Manuel Fraga en Cariño. Google Maps]

• O Concello de Cariño, gobernado polo PP, retira o nome de Manuel Fraga a unha rúa

O PSdeG denuncia o aumento das agresións a profesionais sanitarios e esíxelle á Xunta máis seguridade. Elena Espinosa advertiu de que “a saturación e o colapso” en servizos como a atención primaria e as urxencias poñen “ao límite” aos profesionais e levan aos pacientes a situacións de frustración e verdadeira desesperación.

[Imaxe: Concentración do persoal do CHUAC no acceso a Urxencias do hospital © SATSE]

• O apuñalamento dun enfermeiro no CHUAC abre o debate sobre a seguridade do persoal sanitario

O TSXG confirma a condena de 22 anos de cárcere para José Eirín polo asasinato de Jessica Méndez, de 29 anos, no concello de Barro en marzo de 2022. A xustiza considera probado que o home empregou o seu vehículo como arma do crime e chocou intencionadamente coa muller, que agardaba para incorporarse á N-550 desde unha estrada secundaria. Na sentenza da Audiencia Provincial de Pontevedra, ratificada agora polo alto tribunal, que desestima todos os recursos da defensa do acusado, sinálase que "foi a indiferenza" da vítima cara ao seu asasino, "unida ao feito de vir tal indiferenza dunha muller", o que determinou a decisión deste de dirixir o seu vehículo contra o conducido pola muller, "impactando violentamente contra el". A sentenza non é firme, pode recorrerse no Supremo. [📸 CC-BY-NC-SA Gz Contrainfo]

• No fogar, en domingo ou nas vacacións: unha análise dos 58 asasinatos machistas de 2023

📺🎶Guadi Galego e Tanxugueiras presentan Inconformismo, un novo sinxelo que xorde da colaboración entre o trío formado por Sabela Maneiro, Aida Tarrío e Olaia Maneiro e a artista cedeiresa. 

O Supremo absolve a Rafael Louzán do delito de prevaricación polo que foi inhabilitado. O ex-presidente da Deputación de Pontevedra poderá seguir á fronte da Federación Española de Fútbol. [Foto: © RFGF]

• AMPLIACIÓN 👉 O Supremo absolve a Louzán, que seguirá á fronte da RFEF sen cargos

A novela gráfica O Corpo de Cristo, coa que Bea Lema gañou o Premio Nacional do Cómic do Ministerio de Cultura, edítase agora en galego por Astiberri. Tras cinco edicións en castelán, a editorial aposta por publicar o cómic na lingua na que naceu a historia, inicialmente gañadora do Premio de Cómic Castelao da Deputación da Coruña. Esta obra cambiou a vida da autora coruñesa: "É o poder da arte, que nos axuda a vivir tanto cando a contemplamos e podemos sentirnos reflectidas como pola nosa propia capacidade de expresarnos, que tamén é liberadora en si mesma", asegurou na entrevista con Praza.gal, na que tamén avanzou que traballa na adaptación da historia ao audiovisual. 

• ENTREVISTA | Bea Lema: "Sentín que tiña que contarme a miña propia historia"

O conselleiro de Sanidade nega que o uso da aplicación do Sergas sexa unha barreira para a poboación de máis idade: "E unha merda", usan a tecnoloxía "que te cagas", afirmou Antonio Gómez Caamaño durante unha conferencia en Vigo, na que apoiou a súa afirmación no alto nivel de uso de Sergas Móbil e outros servizos que permiten acceder a prestacións da sanidade pública sen acudir presencialmente ao centro de saúde.

• HEMEROTECA | Sanidade aplaude que desta volta só marche o 20% do persoal médico de familia formado no Sergas
• HEMEROTECA | O incendio que acelerou a dixitalización do Sergas: 20 anos da historia clínica electrónica
• HEMEROTECA | O Sergas prevé estender as consultas por videoconferencia en atención primaria e hospitalaria

Pescados Rubén entra en concurso de acredores. A empresa mariñá entrara xa en preconcurso en novembro polas débedas con bancos e financeiras. O Xulgado de Primeira Instancia número 2 de Lugo vén de aceptar a solicitude e confirma unha oferta de adquisición da nave e a produción.

• A crise de Pescados Rubén deixa no aire 80 empregos na Mariña

O BNG esixe revelar todo o contido do acordo asinado con Altri en 2021 pola empresa que creou a Xunta con Abanca para captar fondos europeos. Ese "acordo político", di o deputado Luís Bará, deixou todo "amañado para un final que vai ser a aprobación do proxecto" e que, coida, xa prevía a implantación da "macrocelulosa" en Palas "con todas as bendicións do PP", favorecendo unha "segunda onda eucaliptizadora". A existencia dese "memorando de entendemento" entre Altri e Impulsa Galicia foi comunicado pola compañía ao regulador do mercado de valores portugués, pero o seu contido non é público.

• O que é público (e o que non) do pacto da Xunta con Altri
• HEMEROTECA | Contas volve esixir transparencia e "control público" na empresa coa que a Xunta impulsa o proxecto de Altri
• HEMEROTECA | Altri triplicou a produción prevista na súa fábrica galega dende que pactou coa empresa da Xunta

As oposicións de Educación xa teñen data: serán o sábado 21 de xuño. A oferta pública de emprego constará de 1.664 prazas de 50 especialidades distintas.