Fálase

PSdeG e BNG de Lugo acusan a Candia de negarse a revelar "o custo da construción do novo despacho habilitado para a concelleira tránsfuga", a ex-socialista María Reigosa, que o pasado maio deu aos populares a alcaldía da cidade co seu apoio á moción de censura. Nun comunicado conxunto socialistas e nacionalistas denuncian o que consideran "trato denigrante, absoluta falta de respecto e deriva autoritaria" por parte da agora alcaldesa e membros do seu goberno durante dúas comisións municipais nas que formularon preguntas coma estas. "Foi incapaz de indicar o importe desta actuación, así como de aclarar se os traballos foron executados mediante medios propios do Concello ou mediante contratación externa", aseguran sobre a devandita obra.

• En Lugo non hai praia malia á censura
• HEMEROTECA | O PP encomenda á tránsfuga de Lugo a comisión de Urbanismo do Concello
• HEMEROTECA | Candia procura blindaxe legal á participación da tránsfuga no goberno de Lugo cun inédito decreto

Leyma lanza unha campaña reivindicando o mandilón "das avoas" como "un dos símbolos máis emocionais da cultura popular galega". A iniciativa, que busca celebrar conxuntamente o Día Nacional de Galicia (25 de xullo) e o día dos avós e avoas (26 de xullo), pendurou na Rúa da Raíña de Lugo ducias de prendas con mensaxes como "Mandilón que te criou", "E ti, de que mandilón saíches?" ou "Avoa 100% galega", enlazando así coa etiqueta de Leite 100% galego da marca pertencente ao Grupo Lence.

A Mostra Internacional de Teatro (MIT) de Ribadavia entrega o seu Premio de Honra a Paula Carballeira e o Premio Abrente de Textos Teatrais 2026 a Alberto Ramos. A Carballeira recoñécenlle a súa "traxectoria artística e á súa valiosa contribución á escena galega" e a Ramos a calidade do seu texto 'Por unanimidade'.

• HEMEROTECA (2023) | Paula Carballeira, Premio Nacional de Literatura Dramática: "O teatro acontece sempre no presente, é moi difícil de controlar"
• HEMEROTECA (2024) | Alberto Ramos gaña o Premio Narrativa Breve Repsol con 'Pirotecnia'

Achado un proxectil de artillería de 62 milímetros coa espoleta activada na parroquia compostelá de San Xoán de Fecha. A Policía Nacional, que realizou a súa "detonación controlada" a pasada noite, "non descarta que puidese corresponder á guerra civil española" -isto é, a ataques posteriores ao golpe do 36 na cidade- un artefacto achado por persoal que "se atopaba efectuando labores de roza na zona". Antes de estoupalo os Tedax inspeccionaron a contorna e atoparon tamén "un tramo de cordón detonante e varios metros de mecha lenta" que agora van analizar nos laboratorios, informan.

• 90 anos do golpe dos 3.500 asasinatos e as 15.000 represións en Galicia

O Goberno de España asume o mando nos incendios que atinxen a Madrid e Ávila tras renunciar o Executivo madrileño a seguir exercéndoo mediante a figura da "situación operativa 3 de interese nacional". A "dirección operativa da emerxencia" nos grandes fogos destas provincias corresponde agora á Unidade Militar de Emerxencias [Imaxe: © Ministerio de Defensa]

• As patrullas militares contra incendios en Galicia adiántanse aos días en que comezou a gran vaga de 2025

Zapatero: "Non me corrompín, sempre respectei a legalidade". Na primeira entrevista que concede tras as súas imputacións xudiciais, en Televisión Española, o ex-presidente socialista considera unha "invención" as acusacións dos empresarios que, tras mudaren de estratexia procesual, aseguran que interveu para que o Estado concedese un crédito á aeroliña Plus Ultra. Imaxe da emisión ao vivo de RTVE.

• HEMEROTECA | Zapatero nega que influíse no rescate de Plus Ultra e defende a súa inocencia: "Non teño nada fóra de España"
• HEMEROTECA | Os retos do caso contra Zapatero: probar xestións coa SEPI, Facenda ou o Goberno para Plus Ultra

A conselleira de Política Social non vai á reunión co Estado sobre menores migrantes tras viaxar a Madrid para asistir. Tras sumarse ao plantón do resto de gobernos autonómicos do PP, Fabiola García esgrime ante a sede do Ministerio de Inclusión que "Galicia sempre participou en todas as conferencias sectoriais pero hoxe non podemos asistir a un novo paripé" porque o Goberno de España "nos vén de negar todo tipo de información sobre a celebración desta conferencia sectorial". "Lle pedimos que respecte as comunidades autónomas e unha política migratoria consensuada", di a conselleira, que incluíu a asistencia a esta xuntanza na súa axenda oficial deste xoves. A ministra de Inclusión, Elma Saiz, lamenta a "espantada" dun PP que "deixou de ser un partido de Estado para ser un partido antisistema". Na imaxe, García e o director xeral de Infancia, Jacobo Rey, nunha imaxe de arquivo.

• HEMEROTECA | Política Social evita revelar ao Parlamento cantos menores migrantes acolle Galicia
• HEMEROTECA | Menores migrantes en Galicia, da integración á segregación pola pugna da Xunta co Estado

Activistas galegas e portuguesas ocupan a mina de San Juan na Gudiña, en denuncia da "prórroga ilegal concedida pola Xunta" a unha mina de volframio con "inminentes impactos transfronteirizos". Durante a ocupación despregouse unha enorme faixa de 40 metros de lonxitude esixindo "a fin da impunidade mineira". A mina proxectada sitúase a apenas dous quilómetros da fronteira portuguesa, moi próxima ao Parque Natural de Montesinho e ás cabeceiras do río Rabaçal,

O Goberno de España proporá Yolanda Díaz como directora xeral da Organización Internacional do Traballo (OIT). "Por primeira vez, unha muller e o noso país estarían á fronte desta institución fundamental para a defensa do traballo digno e a xustiza social", destaca Pedro Sánchez a través das redes sociais. Díaz enfrontarase ao actual director, o togolés Gilbert F. Houngbo, criticado polo seu achegamento a Trump. A elección terá lugar o vindeiro 16 de novembro, pero o elixido o elixida non tomaría posesión ata un ano despois, polo que Díaz continuará como ministra de Traballo e vicepresidenta segunda.

O Consello do Poder Xudicial avala moi dividido a decisión de apartar o xuíz Luís Villares dos casos eólicos. O bloque conservador impuxo os seus 11 votos aos 10 do bloque progresista grazas ao voto de desempate da presidenta do Consello, Isabel Perelló. A decisión de afastar a Villares polo seu pasado en En Marea da sección da sala do Contencioso-Administrativo do TSXG que analiza esas e outras decisións da Xunta foi tomada pola nova presidenta da sala, María Azucena Recio, nada máis chegar ao cargo en marzo. Ademais deste pronunciamento do Consello Xeral do Poder Xudicial, a decisión de apartar a Villares foi denunciada por diversos colectivos ante a Fiscalía. Na imaxe, do CXPX, Isabel Perelló.

• HEMEROTECA (25/3/2026) | O xuíz Villares, afastado á forza da sección do TSXG que sentencia sobre eólicos e contratos da Xunta
• HEMEROTECA (2/6/2026) | A Fiscalía do Supremo analizará se foi legal que o TSXG apartase o xuíz Villares dos casos eólicos
• HEMEROTECA (18/6/2026) | A Fiscalía de Galicia rexeita a decisión do TSXG de apartar dous xuíces da sección que xulga os eólicos