Fálase

A conselleira de Política Social non vai á reunión co Estado sobre menores migrantes tras viaxar a Madrid para asistir. Tras sumarse ao plantón do resto de gobernos autonómicos do PP, Fabiola García esgrime ante a sede do Ministerio de Inclusión que "Galicia sempre participou en todas as conferencias sectoriais pero hoxe non podemos asistir a un novo paripé" porque o Goberno de España "nos vén de negar todo tipo de información sobre a celebración desta conferencia sectorial". "Lle pedimos que respecte as comunidades autónomas e unha política migratoria consensuada", di a conselleira, que incluíu a asistencia a esta xuntanza na súa axenda oficial deste xoves. A ministra de Inclusión, Elma Saiz, lamenta a "espantada" dun PP que "deixou de ser un partido de Estado para ser un partido antisistema". Na imaxe, García e o director xeral de Infancia, Jacobo Rey, nunha imaxe de arquivo.

• HEMEROTECA | Política Social evita revelar ao Parlamento cantos menores migrantes acolle Galicia
• HEMEROTECA | Menores migrantes en Galicia, da integración á segregación pola pugna da Xunta co Estado

Activistas galegas e portuguesas ocupan a mina de San Juan na Gudiña, en denuncia da "prórroga ilegal concedida pola Xunta" a unha mina de volframio con "inminentes impactos transfronteirizos". Durante a ocupación despregouse unha enorme faixa de 40 metros de lonxitude esixindo "a fin da impunidade mineira". A mina proxectada sitúase a apenas dous quilómetros da fronteira portuguesa, moi próxima ao Parque Natural de Montesinho e ás cabeceiras do río Rabaçal,

O Goberno de España proporá Yolanda Díaz como directora xeral da Organización Internacional do Traballo (OIT). "Por primeira vez, unha muller e o noso país estarían á fronte desta institución fundamental para a defensa do traballo digno e a xustiza social", destaca Pedro Sánchez a través das redes sociais. Díaz enfrontarase ao actual director, o togolés Gilbert F. Houngbo, criticado polo seu achegamento a Trump. A elección terá lugar o vindeiro 16 de novembro, pero o elixido o elixida non tomaría posesión ata un ano despois, polo que Díaz continuará como ministra de Traballo e vicepresidenta segunda.

O Consello do Poder Xudicial avala moi dividido a decisión de apartar o xuíz Luís Villares dos casos eólicos. O bloque conservador impuxo os seus 11 votos aos 10 do bloque progresista grazas ao voto de desempate da presidenta do Consello, Isabel Perelló. A decisión de afastar a Villares polo seu pasado en En Marea da sección da sala do Contencioso-Administrativo do TSXG que analiza esas e outras decisións da Xunta foi tomada pola nova presidenta da sala, María Azucena Recio, nada máis chegar ao cargo en marzo. Ademais deste pronunciamento do Consello Xeral do Poder Xudicial, a decisión de apartar a Villares foi denunciada por diversos colectivos ante a Fiscalía. Na imaxe, do CXPX, Isabel Perelló.

• HEMEROTECA (25/3/2026) | O xuíz Villares, afastado á forza da sección do TSXG que sentencia sobre eólicos e contratos da Xunta
• HEMEROTECA (2/6/2026) | A Fiscalía do Supremo analizará se foi legal que o TSXG apartase o xuíz Villares dos casos eólicos
• HEMEROTECA (18/6/2026) | A Fiscalía de Galicia rexeita a decisión do TSXG de apartar dous xuíces da sección que xulga os eólicos

Inditex financiará a apertura de rutas aéreas da Coruña a Londres, Istambul, Lisboa e París. A multinacional téxtil asina un convenio co Consorcio de Turismo polo que achegará 1,5 millons de euros en ano e medio para a "promoción turística da cidade", segundo indica o Concello. A maior parte deses cartos irán destinados a reforzar a conectividade aérea de Alvedro. 

O Concello das Pontes informa das recomendacións de seguridade para a voadura controlada das torres de refrixeración da antiga central térmica, que terá lugar o vindeiro xoves 30 de xullo ás 16 horas. A operación, que terá unha duración de 1,2 segundos, cun nivel de ruído semellante ao producido por uns fogos artificiais. Dende as 15.30 e ata as 16.30 estarán cortadas as estradas próximas e durante ese intervalo non estará permitido o acceso á zona de seguridade nin á área de exclusión establecida.

• HEMEROTECA | A voadura das torres de refrixeración da central das Pontes apunta a finais de xullo

O Ministerio de Cultura incorpórase ao padroado da Fundación Rosalía de Castro. No órgano de dirección da entidade que vela polo legado de Rosalía, presidido por Anxo Angueira, figuran xa institucións galegas como a Xunta, a Deputación da Coruña, o Consello da Cultura e a RAG, así coma os concellos de Santiago e Padrón e as tres universidades públicas, entre outras. A incorporación do Ministerio ao padroado concrétase un ano despois de que o seu titular, Ernest Urtasun, avanzase nunha visita á Casa-Museo -na imaxe- o apoio do Goberno de España á rehabilitación dun dos seus edificios. [Imaxe: © Fundación Rosalía de Castro]

• HEMEROTECA | O Día de Rosalía enche o país de homenaxes ao seu símbolo: "Unha muller brava e combativa"
• HEMEROTECA | Maruxa Villanueva revive como avatar para guiar as visitas virtuais á Casa de Rosalía

Sofía Ruvira gaña a décima edición do Premio Illa Nova de Narrativa coa súa obra Dos afectos, o río. O xurado, composto polas xornalistas Mar Mato e Cláudia Morán, a escritora María Quiroga -gañadora en 2015- e Malores Villanueva, en representación da Editorial Galaxia, destaca que "s trata dunha obra de notable calidade literaria,  que se achega cunha mirada fonda e sensible ás diversas formas de  violencia presentes na sociedade" tomando "como punto de partida un acontecemento histórico situado na vila de Allariz". Este galardón da Editorial Galaxia está dirixido a autoras e autores menores de 35 anos e toma o nome da colección que, inaugurada en 1957, procurou "dar continuidade ao proxecto editorial a través das  novas xeracións e cunha permanente vontade de renovación".

• Colaboracións de Sofía Ruvira en Praza.gal

Ana Pontón pide a Alfonso Rueda "unha reunión urxente para avanzar cara a un pacto real a prol do galego". A portavoz nacional do Bloque formalizou a petición nunha carta ao presidente, a quen a formación considera "o gran ausente neste asunto", sinala a vicevoceira da formación no Parlamento, Olalla Rodil. Este mércores os populares prevén os contactos cos grupos parlamentarios a respecto do novo Plan Xeral de Normalización Lingüística.  Na imaxe, a líder do Bloque dá os parabéns a Rueda tras a súa toma de posesión como presidente en 2024 [CC BY-SA David Cabezón / Xunta]

• +INFO 👉 O PP inicia contactos sobre o plan do galego e Pontón reclama negocialo con Rueda
• O plan para o galego admite "urxencia" e suxire mudanzas no decreto do ensino
• O plan do galego alén das aulas: "derrubar" prexuízos ou "acollemento lingüístico" a inmigrantes
• A Xunta ve posibles "axustes" no decreto do galego e acusa a BNG e PSdeG de criticaren o Plan sen lelo

O Consello de Ministros aproba e envía ás Cortes o proxecto da nova a lei do tabaco, que equipara cigarros electrónicos aos convencionais e amplía a prohibición de fumar a espazos como terrazas hostaleiras, praias ou piscinas. A ministra de Sanidade, Mónica García, subliña as arredor de 50.000 mortes anuais vencelladas ao tabaquismo e que a vontade do Executivo é avanzar cara a unha "xeración libre de tabaco". [Imaxe: Pawel Czerwinski / Unsplash]

• HEMEROTECA | Prohibir o tabaco á mocidade nada de 2006 a 2010 evitaría un millón de mortes por cancro de pulmón