Inditex financiará a apertura de rutas aéreas da Coruña a Londres, Istambul, Lisboa e París. A multinacional téxtil asina un convenio co Consorcio de Turismo polo que achegará 1,5 millons de euros en ano e medio para a "promoción turística da cidade", segundo indica o Concello. A maior parte deses cartos irán destinados a reforzar a conectividade aérea de Alvedro.
O Concello das Pontes informa das recomendacións de seguridade para a voadura controlada das torres de refrixeración da antiga central térmica, que terá lugar o vindeiro xoves 30 de xullo ás 16 horas. A operación, que terá unha duración de 1,2 segundos, cun nivel de ruído semellante ao producido por uns fogos artificiais. Dende as 15.30 e ata as 16.30 estarán cortadas as estradas próximas e durante ese intervalo non estará permitido o acceso á zona de seguridade nin á área de exclusión establecida.
O Ministerio de Cultura incorpórase ao padroado da Fundación Rosalía de Castro. No órgano de dirección da entidade que vela polo legado de Rosalía, presidido por Anxo Angueira, figuran xa institucións galegas como a Xunta, a Deputación da Coruña, o Consello da Cultura e a RAG, así coma os concellos de Santiago e Padrón e as tres universidades públicas, entre outras. A incorporación do Ministerio ao padroado concrétase un ano despois de que o seu titular, Ernest Urtasun, avanzase nunha visita á Casa-Museo -na imaxe- o apoio do Goberno de España á rehabilitación dun dos seus edificios. [Imaxe: © Fundación Rosalía de Castro]
Sofía Ruvira gaña a décima edición do Premio Illa Nova de Narrativa coa súa obra Dos afectos, o río. O xurado, composto polas xornalistas Mar Mato e Cláudia Morán, a escritora María Quiroga -gañadora en 2015- e Malores Villanueva, en representación da Editorial Galaxia, destaca que "s trata dunha obra de notable calidade literaria, que se achega cunha mirada fonda e sensible ás diversas formas de violencia presentes na sociedade" tomando "como punto de partida un acontecemento histórico situado na vila de Allariz". Este galardón da Editorial Galaxia está dirixido a autoras e autores menores de 35 anos e toma o nome da colección que, inaugurada en 1957, procurou "dar continuidade ao proxecto editorial a través das novas xeracións e cunha permanente vontade de renovación".
Ana Pontón pide a Alfonso Rueda "unha reunión urxente para avanzar cara a un pacto real a prol do galego". A portavoz nacional do Bloque formalizou a petición nunha carta ao presidente, a quen a formación considera "o gran ausente neste asunto", sinala a vicevoceira da formación no Parlamento, Olalla Rodil. Este mércores os populares prevén os contactos cos grupos parlamentarios a respecto do novo Plan Xeral de Normalización Lingüística. Na imaxe, a líder do Bloque dá os parabéns a Rueda tras a súa toma de posesión como presidente en 2024 [CC BY-SA David Cabezón / Xunta]
O Consello de Ministros aproba e envía ás Cortes o proxecto da nova a lei do tabaco, que equipara cigarros electrónicos aos convencionais e amplía a prohibición de fumar a espazos como terrazas hostaleiras, praias ou piscinas. A ministra de Sanidade, Mónica García, subliña as arredor de 50.000 mortes anuais vencelladas ao tabaquismo e que a vontade do Executivo é avanzar cara a unha "xeración libre de tabaco". [Imaxe: Pawel Czerwinski / Unsplash]
O BNG da Coruña "dá por rotos" os seus pactos co goberno local do PSdeG. A voceira e candidata á alcaldía do Bloque, Avia Veira, atribúe a decisión a que "o executivo de Inés Rey incumpriu sistematicamente" os acordos de investidura e de orzamentos deste 2026. De agora en diante, apunta, "sempre se se traia algo positivo ao pleno terá o noso apoio", se ben "dados os incumprimentos, sentímonos liberadas de calquera atadura". Na imaxe, Veira este martes en conferencia de prensa.
Os empresarios do 'caso Plus Ultra' mudan de estratexia procesual e acusan agora a Zapatero de mediar para lograr o préstamo estatal de rescate da compañía na pandemia e cobrar por facelo. O ex-presidente do Goberno de España vén mantendo que non falou con "absolutamente ninguén do sector público" para que a aeroliña lograse o crédito.
O Supremo anula a autorización dun gran parque eólico en Moeche porque o estudo de impacto ambiental non analiza os efectos con parques e infraestruturas próximas. O alto tribunal bota abaixo o permiso administrativo concedido polo Estado (e non pola Xunta) por ser unha instalación de máis de 50 MW de potencia.
Ghaleb Jaber Ibrahim, empresario palestino afincado en Santiago, será o pregoeiro das Festas do Apóstolo. O tamén doutor e impulsor da Fundación Araguaney nos anos 80, salienta o goberno local compostelán, desenvolveu na capital galega unha ampla actividade empresarial no sector hoteleiro (Araguaney) e audiovisual coa produtora CTV, ademais de "contribuír a proxectar" a cidade como "lugar de intercambio cultural". A súa intervención dende os balcóns do Pazo de Raxoi será este mércores, día 22, xornada de inicio das festas, ás 21:30. Na imaxe, Ghaleb Jaber coa alcaldesa de Santiago, Goretti Sanmartín, e a edil de Festas, Pilar Lueiro.
