Fálase

Ghaleb Jaber Ibrahim, empresario palestino afincado en Santiago, será o pregoeiro das Festas do Apóstolo. O tamén doutor e impulsor da Fundación Araguaney nos anos 80, salienta o goberno local compostelán, desenvolveu na capital galega unha ampla actividade empresarial no sector hoteleiro (Araguaney) e audiovisual coa produtora CTV, ademais de "contribuír a proxectar" a cidade como "lugar de intercambio cultural". A súa intervención dende os balcóns do Pazo de Raxoi será este mércores, día 22, xornada de inicio das festas, ás 21:30. Na imaxe, Ghaleb Jaber coa alcaldesa de Santiago, Goretti Sanmartín, e a edil de Festas, Pilar Lueiro.

A Xunta concede a Medalla de Galicia á empresaria hoteleira arxentina Claudia Álvarez; á fiscal en Suíza Beatriz Gil; á xornalista en Venezuela Carla Angola e á odontóloga brasileira Camila Fernández como "homenaxe á colectividade galega no exterior". A concesión deste 2026 é a primeira desde que o Goberno galego reformou a normativa que regula estas Medallas, mudanza aprobada tras concederlla en 2025 á princesa Leonor sen ponderar os méritos como marcaba a anterior regulación. Na imaxe, un dos dous actos en torno ás Medallas, o pasado ano.

• HEMEROTECA | Investigada polo TSXG, a Xunta reforma a Medalla de Galicia tras darlla á princesa Leonor sen ponderar méritos
• HEMEROTECA | A Xunta deu a Medalla de Galicia á princesa Leonor sen ponderar os seus méritos
• HEMEROTECA | Bos e xenerosos que xa non terán a Medalla de Galicia

Ángel Mato gaña as primarias do PSdeG en Ferrol e volverá ser candidato á alcaldía. O ex-alcalde e actual voceiro municipal impúxose na votación á ex-concelleira Eva Martínez Montero por 163 fronte a 142 votos e unha participación próxima ao 85%, segundo informa a Comisión Nacional de Ética dos socialistas galegos. Ferrol foi a única localidade galega na que a militancia socialista tivo que votar, ao haber nas demais cidades e vilas atinxidas polo proceso de primarias  -concellos con máis de 20.000 habitantes sen alcaldía socialista- polocadansúa única candidatura. No caso das sete principais cidades estas candidaturas únense ás dos aspirantes á reelección en Vigo e na Coruña, Abel Caballero e Inés Rey.

• O PSdeG define as súas apostas urbanas para 2027 e só terá primarias en Ferrol

Varios concellos do interior de Galicia en alerta amarela na tarde deste domingo por altas temperaturas ou por tormentas. O aviso esténdese a luns e martes por calor en parte das provincias de Lugo e Ourense, coincidindo cunha vaga de calor que afectará boa parte da península ibérica pero non a Galicia. 

O PP volve cambiar de cabeza de cartel en Ourense e designa a concelleira Ana Méndez como candidata á alcaldía. Tras gobernar en 2015 co ex-conselleiro Jesús Vázquez, a quen sacrificaran como líder local en 2019 para pactar con Democracia Ourensana a cambio do apoio a Baltar na Deputación, en 2023 recuperaran o antigo rexedor Manuel Cabezas, que renunciou como edil pouco despois do segundo acordo dos populares con Gonzalo Pérez Jácome, de quen agora a secretaria xeral do PPdeG, Paula Prado, afirma que "só pensa no seu propio beneficio e no show". O PP presenta as súas candidaturas ás alcaldías de capitais provinciais de todo o Estado este sábado cun acto en Santiago encabezado por Feijóo. [Imaxe: PPdeG]

• HEMEROTECA | O acordo PP-PSdeG e a promesa de Rueda que romperon os populares para volver pactar con Jácome
• 🔊 HEMEROTECA | PODCAST - FÁLASE | Anatomía do de Ourense

O Ministerio de Traballo dá luz verde ao novo convenio estatal do téxtil logo de ser corrixido. O texto fora emendado por facilitar os contratos temporais e de substitución, entre outras eivas. O novo marco laboral, rexeitado masivamente en Galicia, onde non conta co apoio de CIG nin UGT, afecta unhas 35.000 persoas no país. Foto: CC-BY-NC-SA CIG. 

Un incendio en Boborás arrasa o castro de Xurenzás tras queimar unhas 20 hectáreas. O fogo, controlado desde esta mañá, iniciouse no mediodía do pasado xoves provocado, segundo parece, polos traballos de roza dun tractor. Imaxe: Brif Laza. 

Os concellos de Ribadavia e Carballeda de Avia inician negociacións para unha fusión municipal. Os alcaldes das dúas localidades confirman as conversas para conformar un único concello duns 6.000 habitantes, segundo conta La Región. Sería a terceira fusión en Galicia tras as de Oza Cesuras e Cerdedo Cotobade. Foto: CC-BY-SA Luis Miguel Bugallo Sánchez

• A Xunta poderá impoñer a anexión dun concello en crise por outro saneado que acepte
• Sete fusións de concellos: o informe que manexa a Xunta para reformular o mapa municipal

O Tribunal da UE avala a lei de Amnistía. Considera que a normativa non bate cos intereses financeiras da UE nin é contraria á directiva en materia de terrorismo. A sentenza non concede directamente a amnistía ás persoas afectadas pero si fixa unha interpretación do dereito europeo obrigatoria para os tribunais españois. O Tribunal de Cuentas e a Audiencia Nacional deberán reiniciar os procesos suspendidos e ditar as súas resolucións respectado o criterio de Luxemburgo.  Foto: Junts per Catalunya. 

• AMPLIAMOS 👉 O Tribunal da UE avala a amnistía

Extinguido o incendio que ardía dende o sábado en Ribas de Sil e que atinxiu a 190 hectáreas. Segundo Medio Rural, a extinción finalizou pasadas as 11 da pasada noite nun foco que, segundo transcendeu, tivo a súa orixe nun raio. Dende ese día a Xunta deu conta unicamente deste incendio e máis do que afectou a Vimianzo e Laxe, sen ofrecer datos dos demais que aconteceron en aplicación das restricións informativas que vén aplicando dende o verán de 2009. Na imaxe, traballos de extinción en Ribas de Sil [Brif Tabuyo]

• Incendios (cando menos) en Ribas de Sil, Laxe e Vimianzo