Fálase

O Colexio Profesional de Xornalistas de Galicia e o Club de Prensa de Ferrol retiran o nome de José Couso do Premio Internacional de Liberdade de Prensa que organizan, atendendo á petición expresa da familia Couso Permuy, segundo publican nun comunicado. O Premio Internacional de Liberdade de Prensa –recolle dito comunicado– ten o obxectivo de recoñecer e difundir o traballo dunha persoa viva ou organización existente destacada na defensa da liberdade de prensa ou cunha salientable traxectoria profesional, libre e independente. As galardoadas nesta última edición [Na imaxe CC-BY-SA CPXG] foron as xornalistas iranianas Nilufar Hamedi e Elahe Mohammadi, coñecidas por informar do caso de Mahsa Amini. 

• As iranianas Nilufar Hamedi e Elahe Mohammadi, condenadas a prisión polas súas informacións, gañan o Premio Couso

O Banco Sabadell, propietario do desaparecido Banco Gallego, rexeita a oferta de fusión co BBVA ao considerar que o "infravalora". A entidade catalá, que ten como conselleiro delegado a quen o fora da antiga Novagalicia Banco, César González-Bueno, considera que a súa continuidade" como entidade independente xerará un maior valor engadido para os seus accionistas". Así o fixo oficial mediante un comunicado á CNMV. Na imaxe [CC BY-SA Praza.gal], sucursal da entidade en Muros, situada onde estivera o Banco Olimpio Pérez, unha das orixes do Gallego.

• HEMEROTECA | Galicia bate récords de cartos depositados nos bancos mentres o número de sucursais é o menor dende 1974
• HEMEROTECA | Barrios sen sucursais e perda de servizos financeiros: o peche de oficinas impacta tamén nas cidades
• HEMEROTECA | Unha década despois das caixas, o recorte bancario restrinxe servizos e ameaza miles de empregos en Galicia
• INTERACTIVO | O sistema financeiro galego, esfarelado nunha década pola crise e a mala xestión

Rueda confirma que non se opuxo a que o concelleiro da Illa de Arousa condenado por violencia machista fose reintegrado no PP. O presidente da Xunta e dos populares galegos respondeu este luns que "tomou coñecemento" do decidido pola dirección pontevedresa do partido e "non manifestei oposición". Antes das eleccións municipais de 2023 asegurara que Matías González Cañón non volvería ser parte do PP. [Imaxe: CC BY-SA David Cabezón / Xunta]

• O PP gaba a "exemplaridade contra a violencia machista" dun condenado por violencia machista ao que recupera como edil
• HEMEROTECA (2023) | O candidato do PP na Illa négase a deixar a candidatura tras saberse que foi condenado por violencia machista

Emilio Cao, galardón honorífico nos Premios Martín Códax da Música 2024. O artista compostelán será homenaxeado no Pazo da Cultura de Pontevedra o vindeiro 15 de maio. Músicas ao Vivo destaca o seu papel pioneiro e renovador na música galega sendo “unha figura clave na súa apertura ao ámbito internacional”

A Xunta vén de publicar as listaxes provisionais de admisión nas súas escolas infantís para o curso 24-25. Pódense consultar nesta ligazón

• HEMEROTECA | A Xunta axusta criterios para entrar nas súas escolas infantís mentres as privadas agardan a fin da opacidade
• HEMEROTECA | A precariedade "histórica" nas escolas infantís da Xunta
• HEMEROTECA | Traballadoras das Galiñas Azuis mobilízanse ante a “improvisación” da Xunta: “somos escolas, non gardarías”

Feijóo insta a "volver saír á rúa" pola "liberdade de prensa". Faino en declaracións a EsRadio nas que anuncia mobilizacións do PP contra o Goberno de España. As declaracións do ex-presidente e actual líder do PP chegan ás portas do sexto aniversario do movemento Defende a Galega, que esixe o cumprimento íntegro da lei dos medios de comunicación públicos e a fin da "manipulación" na CRTVG. [Na imaxe, Feijóo entrevistado na TVG na súa etapa como presidente]

• A Xunta impulsa unha nova lei para os medios públicos tras unha década de incumprimento da anterior
• Día da Liberdade de Prensa en Galicia: das eternas materias pendentes á lei europea que vén
• Respostas á arenga de Feijóo pola "prensa libre": "Puido empezar polos medios públicos galegos"

PARO REXISTRADO | As inscricións nas oficinas de emprego diminuíron en 2.677 durante o mes de abril en Galicia (-2,08% e na media estatal, -2,22%) e quedan en 126.334, outro mínimo dende que hai datos comparables. Son 13.009 menos que un ano antes (-9,34% interanual, máis do duplo que a media, situada no -4,37%). No mesmo mes, a afiliación media á Seguridade Social aumentou en 6.740 persoas (+0,63%) e chega aos 1,068 millóns, o que supón un aumento do 1,72% interanual. Na media estatal, o incremento da afiliación media é do 0,95% e supón superar o fito dos 21 millóns de persoas cotizando á Seguridade Social, un 2,36% máis que un ano antes. 

• AMPLIAMOS 👉 O abril con máis cotizantes en década e media marca outro mínimo de inscricións no paro en Galicia

O BNG levará o Parlamento "unha Lei do Viño de Galiza", co obxectivo de "apoiar" aos produtores e ás produtoras e "dar ao sector o impulso que precisa". Ana Pontón anunciou na celebración da XXXI Feira do Viño de Vilachá, na Pobra do Brollón, que o proxecto de lei formará parte dunha batería de iniciativas en defensa dun sector "clave para o desenvolvemento do rural" pola súa capacidade "para xerar riqueza e emprego, para fixar poboación e para preservar o territorio". 

O Celta anuncia a posta en marcha do equipo de fútbol feminino para a próxima tempada. O club únese coa Unión Deportiva Mos para este proxecto, que presenta baixo o liderado da nova presidenta, Marián Mouriño. "O equipo nacerá a próxima tempada en Terceira Federación, máis equipos infantil, cadete e filial, coa clara vocación de crecer sen pausa", sinala o Celta nun comunicado. [Fotografía © RC Celta]

• HEMEROTECA | A UE considera a cidade deportiva do Celta "complexo hoteleiro" a efectos de impacto ambiental 
• HEMEROTECA | A xustiza fai firme que a cidade deportiva do Celta comezou de xeito ilegal

Ponte...nas Ondas! leva a Lisboa a súa defensa do patrimonio inmaterial galego-portugués. Unha delegación de alumnos, profesores e músicos galegos representou a iniciativa Ponte... nas Ondas! en Lisboa para presentar o modelo de boas prácticas co patrimonio cultural inmaterial que a UNESCO inscribiu en decembro de 2022 a proposta de Portugal e España. O Centro Galego acolleu unha xornada na que a rapazada puido entrevistar a Graciano Espinheira, de Barciademera; o grupo de pandereita Ghalderios; a Luiz Caracol e á cantora galega Uxía, madriña deste proxecto que se desenvolve nas aulas.

• HEMEROTECA | Patrimonio, radio e lazos coa Lusofonía: o modelo de Ponte nas Ondas esténdese por 20 novos centros de ensino
• HEMEROTECA | A UNESCO recoñece a irmandade galego-portuguesa de Ponte nas Ondas! como exemplo de boas prácticas
• HEMEROTECA | Santi Veloso: "Parece que un proxecto educativo é algo menor, pero este premio demostra que Ponte nas Ondas debía ser apoiado"