Unha muller é asasinada presuntamente pola súa exparella nunha vivenda na parroquia de Palmeira, no Concello de Ribeira. O crime, do que se tivo coñecemento a última hora da tarde deste martes, está a ser investigado como un posible caso de violencia machista pola Policía. [Na imaxe, o porto de Palmeira CC-BY-SA Concello de Ribeira]
Alcoa di agora que está "iniciando contactos con potenciales compradores" da fábrica de San Cibrao e promove modificar o seu plan de viabilidade en aspectos como "atrasar" investimentos ou "flexibilidade" no reinicio das cubas que principiou o pasado xaneiro.
Representantes do Comité Intercentros da CRTVG presentarán as súas demandas para os medios públicos galegos e as denuncias de manipulación no ente público na sede do Parlamento Europeo en Bruxelas. A eurodeputada do BNG, Ana Miranda, logrou este martes que a súa petición fose incluída na orde do día da Comisión de Peticións do mes de abril. "Virán aquí para denunciar a manipulación da TVG, para pedir medios públicos galegos de calidade, ecuánimes, e sobre todo para defender as súas condicións laborais", sinala Miranda, quen lembra que hai máis de medio ano que esta petición foi admitida a trámite mais estivo "bloqueada" por "continuas manobras do PP, Vox e Ciudadanos".
Rueda asume o despacho dos asuntos da Consellería de Infraestruturas tras o cesamento da ata agora conselleira Ethel Vázquez e ata que faga un novo nomeamento. Vázquez era conselleira desde 2014 e desde este luns é secretaria da Mesa do Parlamento e o presidente
O BNG cede ao PSdeG un posto na Mesa do Parlamento, que se constitúe esta mañá. O Bloque volverá situar no órgano reitor da Cámara a Montse Prado como vicepresidenta segunda, posto que xa exerceu na pasada lexislatura, e permite que os socialistas continúen coa secretaría segunda "en aras a visibilizar a pluralidade da Cámara tamén nos seus órganos de dirección". Na imaxe, o grupo parlamentario do BNG.
O primeiro director xeral de Conservación da Natureza do Goberno de Feijóo, Ricardo García-Borregón, exerce como asesor da celulosa portuguesa Navigator, que busca solo en Galicia para a produción de eucalipto. Revélao este domingo Faro de Vigo. García-Borregón fala nesa condición para Produtores Florestais, revista da empresa, que tamén destaca o seu currículo como integrante de "muitas associações do setor e agências governamentais" e que actualmente é, asemade, vogal da Fundación para a Promoción e Desenvolvemento Rural (Fundesar). García-Borregón foi tamén voceiro do PP no Concello de Santiago. Na imaxe [CC BY-SA Xunta], García-Borregón comparecendo no Parlamento como director xeral, cargo que ocupou ata 2013.
O galego David Barro, novo director de Es Baluard, o Museo de Arte Contemporánea de Palma, tras gañar o concurso público convocado pola institución para o posto. Barro, actual director da compostelá Fundación DIDAC, ten unha dilatada traxectoria no ámbito da xestión cultural, a arte contemporánea e o deseño, así como no impulso de eventos como o Festival Plataforma, que codirixe. [Imaxe: © Es Baluard]
Un tremor de terra de magnitude 3,7 con epicentro en Sarria é percibido en gran parte da provincia de Lugo. O movemento sísmico, segundo o IGN, rexistrouse ás 16:39 desta tarde. A vila sarriá é epicentro de tremores con relativa asiduidade. Rexistrou actividade especialmente intensa nos anos 90 do século pasado, cando foi coñecida como parte do triángulo sísmico da provincia lucense xunto a Triacastela e Becerreá.
A CIG entrega ás traballadoras da limpeza de Lugo o seu Premio 8 de Marzo pola súa "exemplar loita" na que "foron capaces de soster unha folga durante 130 días" fronte a unha patronal estatal "moi belixerante e intransixente", lembra a secretaría das Mulleres do sindicato, que as sinala como "exemplo de resistencia e dignidade para toda a clase obreira". A folga finalizou o pasado febreiro tras lograren melloras como incremento salarial total do 18,3% ata 2026. [Imaxe: CIG]
O BOE fai oficial o índice de prezos de alugueiro de vivenda, que permite aplicar límites aos prezos do arrendamento en "zonas tensionadas" se as comunidades autónomas así o dispoñen. Polo momento, só Catalunya tramitou esa solicitude, mentres que a Xunta se nega a aplicala "de oficio" e responsabiliza os concellos de xustificar esas peticións para valorar se as tramita ou non. A Coruña e Santiago xa avanzaron que o pedirán, pero a decisión final depende do Goberno galego
